18°C , Mostly cloudy | Kigali-Rwanda
Turatsinze Dismas, umutoza mukuru wa Police HBC wemeza ko batakitabiriye imikino y'Afurika

Handball: Police HBC nta bwo ikitabiriye imikino y’Afurika

Yanditswe na NKOMEJE GUILLAUME

Ku ya 04-10-2018 saa 07:20:56

Mu ikipe ya Police HBC baratangaza ko batakitabiriye imikino y’amakipe yabaye aya mbere iwayo muri Afurika “2018 African Handball Champions League”, iteganyijwe kuzabera muri Cote d’Ivoire kuva tariki 19-29 Ukwakira 2018.

Turatsinze Dismas, umutoza mukuru wa Police HBC wemeza ko batakitabiriye imikino y’Afurika

Police HBC yari yabonye itike yo kuzahagararira u Rwanda muri iyi mikino y’Afurika nyuma y’uko yegukanye igikombe cya shampiyona y’uyu mwaka wa 2018.

Aganira n’Imvaho Nshya, Turatsinze Dismas yatangaje ko impamvu batazabasha kwitabira iyi mikino ari uko batinze kubona ibaruwa ibamenyesha ko bagomba kwiyandikisha basaba kwitabira iyi mikino aho yabagezeho igihe cyo kwiyandikisha cyararenze.

Yagize ati Muri rusange gahunda yo kwitabira imikino y’Afurika ntikiriho, impamvu ni uko twahawe ibaruwa itumenyesha kwiyandikisha dukererewe kuko yatugezeho tariki 20 Nzeri 2018 mu gihe itariki ya nyuma yo kurangiza kwiyandikisha yari tariki 18 Nzeri 2018.”

Avuga ko bicaye bagasanga nta gihe bafite cyo kwiyandikisha ndetse agisha n’inama hanyuma asanga bitazaborohera guhita batunguza ubuyobozi bw’iyi kipe ibijyanye n’ingengo y’imari yazakoreshwa n’iyi kipe muri mikino bahitamo kubireka.

Uyu mutoza mukuru wa Police HBC ugaragaza ko kutabasha kwitabira iyi mikino byatewe ahanini n’uko shampiyona yagombaga kugaragaza uzaserukira igihugu muri iyi mikino yatinze kurangira, ku ruhande rwe yifuza ko yajya itangira nibura muri Mutarama ikarangira muri Kamena bigahuza n’amatariki akinirwaho iyi mikino y’Afurika.

Turatsinze atangaza ko bagiye gushyira imbaraga mu gutegura irushanwa rihuza amakipe yabaye aya mbere muri Afurika y’Uburasirazuba ndetse no hagati “ECAHF Championship”, izabera muri Zanzibar kuva tariki 10 kugeza 17 Ugushyingo 2018.

Avuga ko bazatangira imyitozo bitegura iyi mikino guhera ku wa Mbere tariki 8 Ukwakira 2018.

Muri uyu mwaka wa 2018, Police HBC yagize ibihe byiza cyane uretse gutwara shampiyona, yihariye ibikombe hafi ya byose byahataniwe birimo n’icy’umunsi w’Intwari, icyo kwibuka “Handball Genocide Memorial Tournament 2018” n’icya “Carre d’AS 2018”.

 

 

 

 

 

 

 

TANGA IGITEKEREZO

Leave a Reply

Your email address will not be published. Required fields are marked *