17°C , Partly sunny | Kigali-Rwanda
Police HBC ikomeje kuyobora urutonde rwa shampiyona

Handball: Police HBC na APR HBC zatangiranye insinzi mu mikino yo kwishyura

Yanditswe na NKOMEJE GUILLAUME

Ku ya 10-07-2018 saa 07:19:15

Ikipe ya Police HBC na APR HBC zitwaye neza zitsinda imikino yazo ya shampiyona y’igihugu ya Handball aho bakinaga umunsi wa mbere w’imikino yo kwishyura ikaba yarabaye mu mpera z’icyumweru gishize.

Police HBC ikomeje kuyobora urutonde rwa shampiyona

Iyo mikino yombi yo ku munsi wa 11 wa shampiyona yabaye ku wa Gatandatu tariki 7 Nyakanga 2018, APR HBC ifite igikombe cya shampiyona y’umwaka ushize wa 2017 yatsinze St Aloys HBC ibitego 46 kuri 30.

Ku rundi ruhande, ikipe ya Police HBC itozwa na Turatsinze Dismas wayifashije gusoza imikino ibanza ya shampiyona iyoboye urutonde yatsinze College Inyemeramihigo HBC ibitego 43 kuri 25.

Mu mikino yabaye ku cyumweru tariki 8 Nyakanga 2018, Police HBC yaje kongera kwitwara neza itsinda St Aloys HBC ibitego 41 kuri 23 naho APR HBC itozwa na Bagirishya Anaclet itsinda College Inyemeramihigo 38 kuri 36.

Kuri uyu munsi wa 11 wa shampiyona, imikino ibiri yagombaga guhuza ikipe y’Urumuri HBC na ADEGI HBC kuri Sitade Amahoro i Remera ndetse na Inkumburwa na Nyakabanda HBC ku Kimisagara nta bwo yabaye.

Umunyamabanga mukuru w’ishyirahamwe ry’umukino wa Handball mu Rwanda “FERWAHAND”, Ngarambe Jean Paul yabwiye Imvaho Nshya ko iyo mikino itabaye bitewe n’uko amakipe y’Urumuri na Inkumburwa atabashije kugaragara ku kibuga.

Avuga ko kugeza ku wa Gatatu tariki 11 Nyakanga 2018 ari bwo bazamenya umwanzuro uzafatwa niba kubura kw’aya makipe bifite ishingiro cyangwa azaterwa mpaga.

Kugeza ubu, Police HBC iracyayoboye n’amanota 36 mu mikino 12, ikurikirwa na APR HBC n’amanota 12 mu mikino 34, ku mwanya wa 3 haza Adegi HBC na 27, Munyove na 24, College Inyemeramihigo na 24, St Aloys na 20, Es Kigoma na 16, Inkumburwa na 14, Nyakabanda na 11, ES Urumuri na 10 naho UR- Huye ni iya nyuma (11) n’amanota 5.

TANGA IGITEKEREZO

Leave a Reply

Your email address will not be published. Required fields are marked *