22°C , Partly sunny | Kigali-Rwanda

Handball: Gicumbi HBT yihaye intego yo kugaruka mu makipe ahanganira ibikombe

Yanditswe na BUGINGO FIDELE

Ku ya 09-10-2019 saa 07:45:51
Gicumbi HBT igiye kugaruka mu ruhando rw'amakipe ahanganira ibikombe mu Rwanda

Muri 2007 ni bwo Akarere ka Gicumbi kashinze ikipe  mu mukino wa Handball  “Gicumbi HBT”.  Iyi kipe yitwaye neza yegukana ibikombe 3 bya shampiyona  (2007, 2008 na 2013) nyuma ikina umwaka umwe wa 2014 ihita ihagarara kubera amikoro make.

Muri 2019 iyi kipe yongeye kugaruka  ikina shampiyona ya 2019 aho yasoreje ku mwanya wa 5.

Mu kiganiro kihariye Imvaho Nshya yagiranye na Perezida w’ikipe ya Gicumbi HBT, Dr Kurujyibwami Celestin yatangaje ko ubu iyi kipe  yihaye intego yo kugaruka mu makipe ahanganira ibikombe.

Yakomeje avuga ko ubu bihaye umurongo ngenderwaho uhamye kandi barimo gukorana n’inzego zitandukanye zirimo iza Leta ndetse n’abikorera kandi babona bizashoboka ku buryo nta kibazo cy’amikoro bazongera guhura nacyo.

Yagize ati: “Kongera kugarura iyi kipe twaricaye  turavuga tuti ko abakinnyi benshi bavuka inaha kuki  bajya gufasha andi makipe  kandi natwe tubakeneye. Twavuze tuti n’ubwo bajyayo ariko bagenda nibura dufite urwego tubagejejeho.”

Perezida wa Gicumbi HBT yakomeje avuga ko  bashaka kubaka ikipe ifite n’aho ikura abakinnyi bivuze ko  bazanashyiraho amakipe y’abakiri bato  aho bihaye imyaka 3  bakaba bubatse uburyo bazajya babona abakinnyi  bazamuka mu ikipe nkuru batiriwe bajya gushaka ab’ahandi. Ibi avuga ko bizatuma ikipe idakoresha amikoro menshi kandi ko bazajya banaha abakinnyi ayandi makipe.

Gicumbi HBT izakoresha bamwe mu bakinnyi bavuye mu makipe akomeye

Amakuru Imvaho Nshya ikesha bamwe mu bakurikiranira hafi umukino wa Handball ni uko iyi kipe ya Gicumbi HBT yamaze kumvikana na bamwe mu bakinnyi bakomeye bakiniraga  ikipe ya APR  HBC.

Aba bakinnyi bakaba barimo Muhawenayo Jean Paul, Muhumure Elyse na  Karenzi Yannick.

Perezida w’iyi kipe, Dr Kurujyibwami avuga ko  ari byo koko hari abakinnyi bagiranye ibiganiro ndetse binageze kure kuko ubu bafite urutonde rw’abakinnyi benshi  ariko mu minsi iri imbere bazatangaza urutonde ntakuka rw’abo bazifashisha mu mwaka w’imikino utaha wa 2020. Ati: “Bitarenze tariki 15 Ukwakira 2019 tuzaba twabatangarije urutonde rw’abakinnyi tuzakoresha umwaka utaha.”

Yasobanuye ko uyu mwaka wa 2019 ubwo ikipe yongeraga kugaruka muri shampiyona baje amakipe asa n’aho yamaze kwitegura bituma bashaka abakinnyi mu buryo bwihuse ariko intego ikaba yari  ugufasha ikipe  gukomeza kubaho ndetse no guhagararira akarere ariko gutwara igikombe babonaga bidashoboka.

Dr Kurujyibwami yashimiye abakinnyi bifashishije ko bitwaye neza uko bari bashoboye avuga ko ubu rero  baje mu ruhando  rwo gushaka ibikombe kuko   babonye ko ikipe ishobora kubaho kandi igatsinda igihe cyose yateguwe neza.

Yakomeje agira ati: “Uyu mwaka urangiye twabonye ko ikipe yabaho, ubu rero  nta bwo twakwishimira kuguma kubaho gutyo gusa ahubwo tugomba no kujya mu   ruhando rwo gutwara ibikombe kandi  nkurikije abakinnyi turimo kuganira ndabona  tuzabigeraho.”

Mu mpera z’iki cyumweru tariki 12 na 13 Ukwakira 2019, ikipe ya Gicumbi HBT izitabira irushanwa ryo ku mucanga “Beach Handball” kandi izifashisha bamwe mu bakinnyi bashya.

Karenzi Yannick (ibumoso) na Muhawenayo Jean Paul (iburyo) bamwe mu bakinnyi bashobora kuzainira ikipe ya Gicumbi HBT mu mwaka w’imikino wa 2020

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.