Kigali-Rwanda

Partly cloudy
17°C
 

Hamenyekanye uko amakipe azahura mu mikino ya CECAFA Kagame Cup 2021

Yanditswe na BUGINGO FIDELE

Ku ya 27-07-2021 saa 22:30:18
Ikipe ya KCCA FC yegukanye igikombe cya CECAFA Kagame Cup 2019 iri mu itsinda A

Kuri uyu wa Kabiri taliki 27 Nyakanga 2021 ni bwo habaye tombola y’uko amakipe azahura mu irushanwa ry’amakipe yo mu Karere k’Afurika y’Uburasirazuba “CECAFA Kagame Cup 2021”.

Iri rushanwa biteganyijwe ko rizabera i Dar es Salaam muri Tanzania kuva taliki ya 01 kugeza 15 Kanama 2021 nta kipe yo mu Rwanda izaryitabira nyuma y’aho ikipe ya APR FC yikuye mu irushanwa.

Amakipe ubusanzwe yari 10 nyuma APR FC yikuyemo hasigara amakipe 9 ashyirwa mu matsinda 3.

Itsinda A ririmo ikipe ya KCCA FC yo muri Uganda ifite igikombe giheruka, Le Messenger Ngozi FC (Burundi) na KMKM SC (Zanzibar). Itsinda B ririmo Azam FC (Tanzania), Atlabara FC (South Sudan) na Tusker FC (Kenya) naho itsinda C rigizwe na Yanga SC (Tanzania), Nyasa Big Bullets (Malawi) na Express FC (Uganda).

Uko imikino izagenda, amakipe azakina imikino y’amajonjora mu matsinda hanyuma amakipe 8 bitewe n’uko yakurikiranye mu manota akomeze muri ¼  ikipe imwe isezererwe.  Imikino izakomeza muri ½ kugeza ku mukino wa nyuma.

Iri rushanwa riterwa inkunga na Perezida w’u Rwanda, Paul Kagame ryaherukaga kuba muri 2019 ubwo ryaberaga mu Rwanda, ikipe ya KCCA FC yo muri Uganda ikaba yaregukanye igikombe. Muri 2020 iri rushanwa nta bwo ryabaye kubera COVID-19.

Kuva Perezida Kagame yatangira gutera inkunga iri rushanwa muri 2002 ni bwo bwa mbere rigiye kuba nta kipe yo mu Rwanda yitabiriye.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.