22°C , Mostly cloudy | Kigali-Rwanda

Hakwiye ibikorwa remezo bituma abagore bari mu mihango banoza isuku – Dr. Nzabonimpa

Yanditswe na Mutungirehe Samuel

Ku ya 13-01-2020 saa 19:41:05
Dr. Nzabonimpa Anicet asanga abagore n'abakobwa bakoroherezwa hagashyirwaho ibikorwa remezo bibafasha mu kunoza isuku cyane mu gihe k'imihango (Foto Samuel M)

Inzobere mu by’ubuzima bw’imyororokere Dr. Nzabonimpa Anicet, asanga ahantu hahurira abantu benshi haba mu biro, ahabera inama, ibitaramo, amahugurwa n’ibindi hakwiye kongerwa ibikorwa remezo bifasha abagore n’abakobwa kunoza isuku mu gihe k’imihango.

Dr. Nzabonimpa avuga ko kujya mu mihango k’umugore n’umukobwa ari ikimenyetso cy’ubuzima bwiza, ariko rikaba ibanga kuri we, bityo kugira ngo isuku ibe nziza bakwiye kubifashwamo n’ahantu hafite ibyangombwa bibunganira.

Akomeza agira ati: “Ni ngombwa kugaragaza isano iri hagati y’isuku mu gihe k’imihango n’ibikorwa remezo bituma iyo suku ishoboka; isuku mu gihe k’imihango ni ikintu gikomeye, umukobwa ashobora no kugira ‘Pads’ (ibikoresho by’isuku by’abagore) yambara mu gihe k’imihango akabura aho ayambarira. Hari n’umuntu ushobora kugira nk’ikinini anywa, cyangwa nk’abafata imiti igabanya ubukana bwa virusi itera sida, akabura aho akinywera kuko aho akorera baba babyigana mu cyumba kimwe kandi agomba kubikora mu ibanga rye.

N’izo ‘Pads’ z’abagore, ashobora kujya kuyambarira mu bwiherero ikibazo kikaba aho ari buyishyire, n’aho bagerageza gushyiramo utudobo ni twa tundi dutobaguye cyangwa tudapfundikiye ku buryo amaze kuyikoresha akayijugunyamo uwaza nyuma yavuga ati umuntu usohotse ari mu mihango.

Ariko buriya bigenze neza muri bwa bwiherero hajyamo akadobo kabugenewe, kamwe ukandagiraho, ukajugunyamo ikintu kagahita kifunga ku buryo undi atamenya icyagiyemo kandi n’uza kuhakora isuku ntihagire ikimubangamira kuko na we ni umuntu ukeneye isuku.”

Dr. Nzabonimpa avuga ko bikwiye ko n’ahandi hahurira abantu benshi ku mpamvu runaka naho ibyo bikoresho biba bikenewe bikorohereza abagore n’abakobwa, hatirengagijwe ko umunsi ku wundi umugore cyangwa umukobwa akeneye iyo suku.

Ati “Ibikorwa remezo rero ni byiza, bituma isuku ishoboka, ndetse hagashyirwa imbaraga mu biganiro n’abayobozi, ababyeyi ndetse n’abakobwa.

Aho mukorera mu nama y’abakozi, abayobozi mukabiganira, kugira ngo harebwe icyakorwa mu guteza imbere ubuzima bwiza bw’umugore n’umukobwa. Ibi byose bikaba byaboneka ahantu abantu bakorera cyangwa bahurira. Aho umugore cyangwa umukobwa ari bugere hagomba gushyirwa ibyo bikoresho.”

Mu mpera z’umwaka ushize wa 2019 ni bwo Leta yatangaje ko yakuyeho imisoro ku nyungu VAT, ku bikoresho abagore n’abakobwa bifashisha mu gihe k’imihango ‘Pads’, umwanzuro wafashwe hagamijwe korohereza abagore n’abakobwa kubona ibi bikoresho.

Nyiramana Djalia avuga ko usibye kuba idini ya Islam asengeramo ishyira imbere isuku,  ubundi umugore aho ari hose agomba kuba afite isuku ihereye ku mubiri, imyambaro, aho aba n’aho akorera n’ahandi hose aba ari.

Ati “Igihe k’imihango cyo ni igihe kiba kihariye umugore aba agomba kongera isuku kandi akirinda ko hagira umenya ko ari mu mihango kugira ngo hatagira umubona ukundi kandi akabitoza abana b’abakobwa nabo bagakura bazi ko isuku ari ubuzima.”

Akomeza avuga ko abakoresha bamwe batabyitaho gushyira ibikoresho bihagije mu bwiherero bw’abagore ariko n’umugore cyangwa umukobwa abyitwararikamo mu gihe abona nta bikoresho bikenewe nk’ibyo biri aho akorera akajya areba ukundi yabyifatamo ariko isuku akayigeraho neza.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.