25°C , Partly sunny | Kigali-Rwanda

Hakwiye ibihano biremereye ku bakoresha nabi indangamuntu–Kaboneka

Yanditswe na TWAGIRA WILSON

Ku ya 03-05-2018 saa 07:00:58

Minisitiri w’Ubutegetsi bw’Igihugu, Francis Kaboneka, avuga ko hakwiriye gushyirwaho ibihano biremereye ku bakoresha nabi indangamuntu y’u Rwanda, asobanura ko bigenze bityo byabera isomo n’abandi bose bashobora kugira imigambi  mibi, kuko asanga bishobora no kuvamo ibibazo by’umutekano ureba igihugu, iramutse ikoreshejwe nabi mu kindi gihugu.

Abadepite mu Nteko Ishinga Amategeko bagezwaho umushinga w’itegeko rigena iyandikwa ry’abaturage n’itangwa ry’ikarita ndangamuntu ku Banyarwanda (Foto Gisubizo G.)

Ibyo Minisitiri Kaboneka yabivugiye mu Nteko Ishinga Amategeko ejo hashize ku ya 2 Gicurasi 2018, ubwo Inteko rusange y’Abadepite yagezwagaho na Komisiyo ya politiki umushinga w’itegeko rihindura kandi ryuzuza itegeko 14/2008 ryo ku wa 4/6/2008 rigena iyandikwa ry’abaturage n’itangwa ry’ikarita ndangamuntu ku Banyarwanda, aho Abadepite ku bwiganze bw’amajwi agera kuri 53 batoye umushinga w’iryo tegeko.

Agaruka ku buremere bw’abakoresha nabi indangamuntu y’u Rwanda n’ikoreshwa nabi ry’Ibendera ry’Igihugu, Minisitiri Kaboneka yavuze ko uwibye indangamuntu agambiriye kuyikoresha ibidakwiye adashobora guhanwa kimwe n’uwakoresheje nabi ibindi birango by’igihugu nk’Ibendera,  kuko ngo umuntu ushobora kwiba indangamuntu yundi muturage itari  iye, agamije kuyikoresha ibindi bidasobanutse,  ari icyaha gikomeye.

Yagize ati Nk’umuntu wibye indangamuntu y’undi, akwiriye ibihano biremereye, bishobora kubera n’isomo abandi bashobora kugira uwo mugambi utari mwiza, kuko ashobora kuyiba akaba yayifashisha kugura simcard yakoresha mu bikorwa bibi, cyangwa, aramutse ayikoresheje mu bikorwa bitari byiza ari mukindi gihugu,  nyuma agafatwa, byagira ingaruka no ku mutekano w’igihugu. Ni yo mpamvu akwiriye ibihano bikomeye kuko ingaruka bifite ni nini”.

Depite Mukabagwiza Edda, umwe mu batanze ibitekerezo ku mushinga w’iryo tegeko ryitangwa ry’indangamuntu, ashingiye yuko ubu  abana basigaye bahabwa inzandiko z’inzira (passport cyangwa laissez-passer), bagiye kujya mu bindi bihugu bari kumwe n’ababyeyi babo, na none bakwiye kujya bahabwa indangamuntu kabone n’iyo baba batarageza imyaka 18 y’ubukure nkuko bahabwa ibindi byangombwa byose.

Minisitiri w’Ubutegetsi bw’Igihugu avuga ko ibyo bizakorwa nyuma ariko  bibanje kugibwaho impaka n’inzego zirebwa n’ikibazo, kuko ngo ku ikubitiro umwana aba afite  ikemezo cy’amavuko gitangwa n’ibiro by’irangamimerere.

Ati   “Ibyo guha abana passport cyangwa ikindi cyangombwa  umwana agisabirwa n’ababyeyi,  anagaragaza impamvu  imujyanye nk’uburwayi, kwiga, gusura abavandimwe, cyangwa ikindi.  Gutangira kwemera ko abana bafata indangamuntu, bizabanza kugibwaho impaka, nyuma babe bakwemererwa kuzihabwa,   icyo gihe n’igihugu kizaba kimaze kwiyubaka ibintu byinshi biri ku murongo’’.

TANGA IGITEKEREZO

Leave a Reply

Be the First to Comment!

avatar