17°C , Partly sunny | Kigali-Rwanda

Hakozwe ibikorwa by’indashyikirwa mu cyumweru cyahariwe kwita ku buzima bw’umubyeyi n’umwana

Yanditswe na NTAWITONDA JEAN CLAUDE

Ku ya May 29, 2018 saa 8:08

Nyuma yo gusoza icyumweru cyahariwe kwita ku buzima bw’umubyeyi n’umwana cyabaye tariki 14-18 Gicurasi 2018, Abanyarwanda biganjemo abagore bagaragaje ko banyuzwe na serivisi bahawe ndetse ko bungutse byinshi byatumye bava mu bujiji bwatumaga batiyitaho uko bikwiye.

Umuyobozi w’Ikigo Nderabuzima cya Rwinkwavu yakiriye Dr Turate Innocent na Depite Mukakanyamugenge Angelique

Iki cyumweru cyatangirijwe mu karere ka Rubavu tariki ya 13 Gicurasi 2018, gitangizwa na Minisitiri w’Ubuzima Dr Diane Gashumba ari kumwe na Minisitiri w’Uburinganire n’Iterambere ry’Umuryango Nyirasafari Esperance.

Muri iki cyumweru abana bafite kuva ku mezi 6 kugeza kuri 59 bahawe ikinini cya vitamini A, ikinini k’inzoka cya Mebendazole ku bana bafite kuva ku mezi 12 kugeza kuri 59, naho ikinini cya Albendazole gihabwa abana bafite kuva ku myaka 5 kugeza kuri  15.

Iki cyumweru kandi cyatanzwemo serivisi zirimo gukingira indwara zitandukanye ku bana bafite hagati y’amezi 6 kugeza ku myaka 15, gusura abaturage mu kureba ko inzitiramibu zikoreshwa neza birinda malariya, ubukangurambaga bwo kuboneza urubyaro, kwita ku isuku, kunoza imirire cyane cyane ku babyeyi batwite n’abonsa n’ ibindi.

Mukamana utuye mu Murenge wa Busasamana, Akarere ka Rubavu, yagize ati “Iki cyumweru nacyungukiyemo byinshi kuko nageze ku kigo nderabuzima ngiye gukingiza umwana, nkahava menye n’uko nategura indyo yuzuye mu byo nejeje n’imboga nsoroma ku rugo. Kubaho neza ntibihenda, byose byicwa n’imyumvire mibi.”

Minisitiri w’Ubuzima Dr. Gashumba Diane asaba Abanyarwanda bose kwirinda guheranwa n’ubujiji butuma bakomeza kwiyangiriza ubuzima. Yagarutse ku babyeyi bakomeza kubyara abo badashoboye kurera, abibutsa ko bihemukira banahemukira igihugu.

Yagize ati “Kubyara abo ushoboye kurera bituma ukomeza ufite imbaraga ukita ku rugo rwawe, ukazamura n’igihugu. Umuntu uzakubwira ngo genda ubyare uzamubwire uti ‘ngwino umfashe no kurera aba bana’.”

Gusoza iki cyumweru cyahariwe kwita ku babyeyi n’abana, byabereye mu Karere ka Kayonza, Intara y’Iburasirazuba.

Muri iki gikorwa hatewe ibiti birwanya imibu ku kigo cy’amashuri yisumbuye cya Kayonza, hanafungurwa inzu ababyeyi babyariramo ku Kigo Nderabuzima cya Rwinkwavu, n’imesero rya kijyambere aho imyenda yanduye imeswa ikaboneka mu minota 30 inoze kandi iteye ipasi.

Iyi nzu y’ababyeyi ifite agaciro karenga miliyoni 240 z’amafaranga y’u Rwanda, ikaba izafasha ababyeyi bahabyarira, ikaba yarubatswe ku bufatanye n’ikigo Partners In Health Rwanda.

Ababyeyi babonye serivisi zinyuranye zirimo no kuboneza urubyaro

Eugene Kayijuka Kajuga Umuyobozi w’Ikigo Nderabuzuma cya Rwinkwavu avuga ko iyi nzu y’ababyeyi igiye kubafasha mu kwita ku buzima bw’ababyeyi.

Yagize ati “Ubundi  buri kigo nderabuzima cyagombye kuba gifite iyi nzu y’ababyeyi, iki ni cyo kintu twaburaga hano ariko ubu igiye kudufasha kubungabunga ubuzima bw’ababyeyi.”

Kajuga avuga ko buri kwezi bakira ababyeyi barenga 120 bahabyarira, ibi bikaba bigaragaza akamaro k’iyi nzu y’ababyeyi.

Verdiane Nyirahabimana afite abana batatu akaba atuye mu Murenge wa Rwinkwavu, avuga ko kubyarira kwa muganga ari ingenzi kuko wirinda ibyago wahura na byo iyo ubyariye mu rugo.

Agira ati “Hari abantu bamwe duturanye usanga bishyira mu kaga ko kubyarira mu rugo, hari ubwo bigenda nabi bakaba banapfa, ariko iyo ubyariye kwa muganga umwana ubyaye yitabwaho, iyo utashye kandi umwana wawe  aba yamaze gukingirwa, iyi nzu y’ababyeyi igiye kudufasha.”

Mukanoheri Claudine na Maniragena Olive ni ababyeyi bavuriza ku Kigo Nderabuzima cya Rwinkwavu, bavuga ko bishimiye icyumweru cyahariwe kwita ku buzima bw’umubyeyi n’umwana kuko cyatumye babona indi sura y’ubuzima batatekerezaga.

Mukanoheri Claudine, (i bumoso) na Maniragena Olive bishimiye inyubako yubakiwe ababyeyi babyariramo i Rwinkwavu

Mukanoheri yagize ati “Turashima Minisiteri y’Ubuzima ku buryo yita ku buzima bw’umwana n’umubyeyi iharanira ko imfu z’abana n’ababyeyi zigabanuka. Ubu namenye yuko kubyara benshi bidatuma nsaza gusa ahubwo binashyira umuryango wose mu bibazo.”

Umuyobozi Mukuru w’Ishami rishinzwe kurwanya SIDA no gukumira izindi ndwara mu Kigo k’Igihugu cy’Ubuzima (RBC) Dr. Turate Innocent, avuga ko ubukangurambaga bwo kwita ku bana n’ababyeyi buzakomeza gushyirwamo imbaraga ndetse no gukomeza kubarinda indwara zibibasira.

Nyuma yo gushimira Leta y’u Rwanda n’abafatanyabikorwa bakora ibijyanye n’ubuzima kubera ingufu bashyira mu kubungabunga ubuzima bw’abaturage, Dr. Turate Innocent ahamya ko iki cyumweru cyabasigiye isura nyayo y’Abanyarwanda bacikanwe na zimwe muri serivisi z’ubuzima.

Icyumweru cyasize benshi babonye ubufasha mu buvuzi

Mu bushakashatsi bwakozwe hagaragajwe ko abagera kuri 19% batabona serivisi zo kuboneza urubyaro ariko kubera uburyo buba bwashyizweho bwo kwegera abaturage byatumye benshi bitabira ubwo buryo.

Dr. Turate yavuze ko ubukangurambaga bwo kwita ku buzima bw’umwana n’umubyeyi bwasize mu gihugu abagore batari bake bitabiriye kuboneza urubyaro. Abana 1,2000,000 na bo bahabwa ikinini cya Vitamin A mu gihe k’iminsi ine, bangana na 76% by’abari bateganyijwe bose.

Umuyobozi w’Akarere ka Kayonza Murenzi Jean Claude, asaba abaturage kujya bumva inama bagirwa n’Abajyanama b’Ubuzima, anashima ko abarimu bahuguwe ku buryo bwo kurwanya malariya ku ishuri bagatabara umwana urwaye  kandi bakamuvura mu minsi 18.