20°C , Intermittent clouds | Kigali-Rwanda

Hakenewe ibyumba by’amashuri 24.000 mu kugabanya ubucucike mu Rwanda

Yanditswe na Mugisha Benigne

Ku ya 21-10-2019 saa 18:26:00

Hakenewe ibyumba by’amashuri 24.000 mu gihugu hose ngo ikibazo cy’ubucucike gikemuke ndetse n’abanyeshuri bo mu mashuri abanza babashe kwiga ingunga imwe.

Ibi byagarutsweho na Minisitiri w’Uburezi, Dr. Mutimura Eugène, mu nama yahuje Minisiteri n’abafatanyabikorwa bayo mu rwego rwo kurebera hamwe ibyagezweho n’ibikenewe kwitabwaho mu myaka iri imbere.

Yagize ati “Hakenewe ibyumba by’amashuri bigera ku 24.000 mu gihugu hose, twari twarihaye intego yo kubaka ibyumba abana bigiramo buri mwaka ndetse twaratangiye, ni mu rwego rwo kugabanya ubucucike mu mashuri, kugabanyiriza abana ingendo bakora bajya kwiga no gushobora kwigisha abana ingunga imwe, ibyo kwiga bamwe mu gitondo abandi inyuma ya saa sita bikarekeraho.”

Minisitiri Mutimura avuga ko kubaka amashuri y’inyongera ku yari asanzwe bizakorwa ku bufatanye bwa Minisiteri y’Uburezi na Banki y’Isi, kandi bikazafasha kugabanya umubare w’abanyeshuri imbere ya mwarimu, bityo akigisha bake kandi akabakurikirana neza, akamenya intege nke za buri wese kugira ngo abashe kumufasha.

Ati “Ibyo bizafasha kugera ku ireme ry’uburezi twifuza, mu gihe umwarimu azaba yigisha abana bake kandi abakurikirana neza, mu gihe abana bazaba biga ingunga imwe bizatuma amasaha bahura na mwarimu aba menshi, no mu gihe bazaba biga hafi y’aho batuye, badakora ingendo ndende bagana ku ishuri”.

Minisitiri Mutimura avuga ko kongera ibyumba by’amashuri bizajyana no kongera abarimu kuko n’ubundi bari bake imbere y’abanyeshuri ugereranyije uko amabwiriza abivuga.

Mu buryo bw’imibare, Dr. Mutimura avuga ko umubare w’abarimu bose bigisha mu mashuri ya Leta ari 66.401 bigisha abanyeshuri bangana na 3.115.528, aho mu mashuri abanza abarimu 42.062 bigisha abanyeshuri 2.479.366, bivuze ko umwarimu umwe yigisha abana 59 mu mashuri abanza, naho mu yisumbuye abarimu 24.339 bigisha abanyeshuri 636.162, bivuze ko umwarimu umwe yigisha abana 27.

Minisitiri w’Uburezi avuga ko ikiciro cya mbere cyo kubaka amashuri mu mwaka wa 2019/2020 cyarangiye hubatswe ibyumba by’amashuri bisaga 900 mu gihugu hose, aboneraho n’umwanya wo gushimira abafatanyabikorwa bose bagize uruhare muri icyo gikorwa.

Kwigisha abana benshi bituma umwarimu atabageraho bose

Abarezi na bo basanga imbogamizi zo kwigisha abana benshi mu cyumba kimwe k’ishuri ari uko umwarimu atabasha kubageraho bose mu myitozo bahabwa kugira ngo amenye neza abarimo kugendana na we n’abasigaye inyuma, ngo ahanini akabimenyera mu bizamini n’andi mabazwa atangwa mu ishuri.

Muteteri Enatha ni umwarimu mu mashuri abanza, avuga ko kwigisha umubare munini w’abana mu cyumba k’ishuri hari ubwo ab’imbere bumva ab’inyuma ntibumve, ngo ubundi abana mwarimu atareba neza mu maso bagafata umwanya wo kurangara, gukina ntibakurikire, ugasanga mwarimu arajyana n’abari hafi ye cyangwa abahanga kurusha abandi.

Ati “Kwigisha abana benshi icya rimwe biravuna, icya mbere bisaba umurezi kuvuga cyane kuko ab’inyuma ntibashobora gupfa kumva, bisaba umurezi kubona abana bose mu maso kandi iyo ari benshi ntibishoboka, umurezi aba abasha kureba neza abari hafi ye, akenshi usanga ari na bo ajyana na bo abandi bagasigara.”

Avuga ko bituma bamwe batsinda abandi bagatsindwa, ngo kandi umurezi abibona ahanini mu gihe k’ibizamini n’andi mabazwa akurwamo amanota yandikwa ku ndangamanota.

Muteteri avuga ko iyo umwarimu atanze imyitozo mu ishuri ririmo abanyeshuri benshi atabasha kubageraho bose ngo arebe ibyo bakoze bitewe n’umubare munini wabo, ngo ibyo rero bituma hari ubwo akomezanya na bamwe mu gihe abandi bashobora gusigara.

Karekezi Aimable na we ni umurezi, avuga ko ubucucike mu cyumba k’ishuri buri mu bibangamiye uburezi bufite ireme kuko umubare munini w’abana imbere y’umwarimu umuremerera cyane, kuko kubigisha bakumvira rimwe riba ari irindi hurizo, kongeraho kubaha imikoro n’imyitozo, kubakosora no kumenya buri umwe ikibazo afite ngo umukurikiranire hafi.

Uyu murezi yemeza ko ibyumba by’amashuri nibyiyongera n’abarezi babyigishamo bakaboneka, hari ikizahinduka mu burezi bw’u Rwanda, cyane cyane mu mashuri abanza.

Umwanditsi:

Mugisha Benigne

One Comment on “Hakenewe ibyumba by’amashuri 24.000 mu kugabanya ubucucike mu Rwanda”

  1. Bubake amashuri menshi bongere n’umushahara wa mwarimu. Ibindi bizikora. Ni gute mwarimu ahembwa ibihumbi 40 agahahira ku masoko amwe n’abahembwa magana? Hari ikibazo gikomeye cy’imishahara ihabanye. Mwarimu waragowe.

Leave a Reply to Kalisa E. Cancel reply

Email yanyu ntigaragazwa ku rubuga. Amazina na Email ni ngombwa.