25°C , Partly sunny | Kigali-Rwanda

Hashyizweho itsinda rigenzura imitungo ya Leta idakoreshwa

Yanditswe na Imvaho Nshya

Ku ya 25-09-2020 saa 16:41:45
Umuvunyi Mukuru Murekezi Anastase

Inama Ngishwanama yo Kurwanya Ruswa n’Akarengane ku rwego rw’Igihugu iyobowe n’Umuvunyi Mukuru Murekezi Anastase, yashyizeho Itsinda Tekinike rishinzwe gusuzuma imitungo ya Leta yose idakoreshwa (Idle Assets).

Iryo tsinda rigizwe n’Abakozi baturuka mu nzego zigize Inama Ngishwanama nk’ihuriro ry’abayobozi b’inzego zitandukanye zirimo iza Leta, izigenga n’Imiryango itari iya Leta zifite mu nshingano kurwanya ruswa n’akarengane.

Iryo tsinda ryahawe inshingano yo gusuzuma uko iyo mitungo imeze ubu, ndetse rigatanga inama y’icyo iyo mitungo yakoreshwa n’icyakorwa kugira ngo hakumirwe bene iyo mitungo igurwa idakenewe, n’ababigizemo uruhare bagakurikiranwa.

Abitabiriye inama yabaye ku wa Kane tariki ya 24 Nzeri 2020, baganiriye no ku gukaza ingamba zo kurwanya ruswa hashingiwe kuri raporo y’Umugenzuzi Mukuru w’Imari ya Leta yo mu mwaka wa 2018-2019, aho bagaragarijwe ko imicungire mibi y’imari n’umutungo bya Leta byateje igihombo kinini.

Mu kurushaho gushimangira poritiki yo kutihanganira na gato imyitwarire n’imikorere iganisha kuri ruswa kandi iteza Leta igihombo, iyi nama yafatiwemo n’indi myanzuro ikomeye.

Muri yo harimo gutanga ibihano byo mu rwego rw’akazi ku mukozi wese cyangwa umuyobozi wagize uruhare mu guteza Leta igihombo yemeza cyangwa akishyura imirimo itarakozwe cyangwa yakozwe nabi.

Ibyo bihano ngo biranareba abagura ibidakenewe mu mutungo wa Leta bikazajya bikorwa hatabanje gutegereza iperereza n‘ikurikiranwa mu nkiko ry’abakekwaho icyaha cya ruswa.

Na none kandi hanzuwe kongera imbaraga mu gukurikirana ishyirwa mu bikorwa ry’amasezerano ashingiye ku masoko ya Leta kugira ngo hirindwe imikorere mibi yaganisha ku guhombya Leta; Inzego zireberera Ibigo bya Leta zifatanyije na RPPA zikabigiramo uruhare rukomeye.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.