21°C , Partly sunny | Kigali-Rwanda
IGP Emmanuel Gasana, Umuyobozi Mukuru wa Polisi y'Igihugu ubwo yashimiraga uwatsinze bavuze imivugo (Niyirora M. Foto)

Hahembwe abahanzi bahize abandi mu bihangano byo gukumira ibyaha

Yanditswe na NDAMYIROKOYE FRANÇOIS

Ku ya 28-09-2018 saa 05:47:28

Nyuma y’uko habayeho amarushanwa y’abahanzi  yatangiriye ku mirenge ku bihangano bijyanye n’uko umuhanzi akwiye kugira uruhare mu gukumira icyaha, ejo hashize ku ya  27 Nzeri 2018 i Kigali mu gikorwa cyabereye kuri Petit Sitade hahembwe abahanzi bahize abandi ku rwego rw’Igihugu.

IGP Emmanuel Gasana, Umuyobozi Mukuru wa Polisi y’Igihugu ubwo yashimiraga uwatsinze bavuze imivugo (Niyirora M. Foto)

Abasizi 5 n’amatorero 5 yo kubyina ni yo  yari yaturutse mu ntara zose z’igihugu ndetse n’Umujyi wa Kigali.

Akanama nkemurampaka kari kagizwe n’inzobere zari zaturutse mu bigo bitandukanye.

Umwanya wo guhatana waje kugera habanza abasizi basoje hakurikiraho abaririmba. Ibihangano  byabo byasobanuraga  ukuntu hakwirindwa ibyaba binyuze mu buhanzi bushingiye ku mbyino n’imivugo.

Akanama nkemurampaka nyuma yo kubona uko abahanzi bitwaye kaje gufata umwanya kariherera kagarutse igihe  cyo gutangaza abatsinze kigeze, uwitwa Heri Jean Claude  ni we wabaye uwa mbere mu bavuze imivugo, itorero  ryitwa Uruyenzi aba ari ryo riba irya mbere.

Uwabaye  uwa mbere mu mivugo yahawe impamyabushobozi  na sheki y’amafaranga y’u Rwanda ibihumbi 150, abamukurikiye buri wese  ahabwa impamyabushobozi  iherekejwe  n’amafaranga ibihumbi 100.

Itorero ryahize ayandi,  mu bihembo ryahawe harimo impamyabushobozi na sheki y’ibihumbi 350 by’amafaranga y’u Rwanda.

Amatorero yakurikiye,  buri torero  ryahawe impamyabushobozi iherekejwe na sheki y’ibihumbi  250 by’amafaranga y’u Rwanda.

Hatangajwe ko mu gutanga amanota ku bavuze imivugo  hagendewe ku kubahiriza insanganyamatsiko yatanzwe bifite amanota  50%,  kumva ko injyana n’amajwi binyuze amatwi bifite amanota  30%, gukoresha ikinyarwanda kinoze bifite amanota 10%, uburyo abahanzi baserutse  byari bifite 5% kubahiriza igihe na byo byari bifite  amanota 5%.

Gutoranya abaririmbyi hagendewe ku nsanganyamatsiko bifite amanota  50 %,  kuba igihangano ari umwimerere bifite amanota 20%, kuba  injyana n’amajwi binyuze  amatwi bifite amanota 20%,  ibikoresho byakoreshejwe  byo byari bifite amanota 5% naho  kubahiriza igihe  byo byari bifite amanota 5%.

Ndagijimana Yuvenali uyobora itorero Uruyenzi ryabaye irya mbere mu matorero  yavuze ko  icyatumye batsinda ari uko biteguye bihagije nyuma y’uko  babwiwe ko hari irushanwa.

Yashimangiye kandi ko atari ubwa mbere yitabiriye amarushanwa y’ubuhanzi  ngo asanzwe ayajyamo kandi agatsinda dore ko yavuze ko n’itorero ari irye.

Umuyobozi Mukuru  wa Polisi y’Igihugu IGP  Emmanuel Gasana mu ijambo rye  yashimiye  abahanzi bitabiriye amarushanwa kuva yatangira kugeza asojwe.

Yashimiye kandi itsinda ry’abari bagize akanama nkemurampaka bitwaye neza batanga amanota mu gihe gito  babikozemo.

Yibukije kandi ko Polisi y’u Rwanda n’izindi nzego z’umutekano  ko bahora baharanira ko umuturarwanda wese agira umutekano n’amahoro n’ibye ntibihungabanywe.

Yagize ati «Iyo nta mahoro ahari n’iterambere nta bwo ryaboneka. Ikintu kimwe kibuza amahoro  ni ibyaha, twese hamwe dufatanyije kugira ngo turwanye ibyaha ni ikintu gikomeye cyane.»

Kugira ngo  ibyaha bikomeze gukumirwa yavuze ko hakenewe ubufatanye bwimbitse kandi bwa buri muntu buzafasha mu gutuma u Rwanda rukomeza gukataza mu gutera imbere.

Yavuze kandi ko Polisi y’u Rwanda izakomeza gufatanya na buri wese.

Umunyamabanga wa Leta ushinzwe Itegeko Nshinga n’andi mategeko muri Minisiteri y’Ubutabera Evode Uwizeyimana  yashimiye Polisi y’Igihugu n’abafatanyabikorwa bateguye icyo gikorwa.

Yavuze kandi ko  gufatanya kw’abantu kwicungira umutekano hakumirwa ibyaha  nta kiguzi byasaba abantu bose baramutse  bafatanyije muri icyo gikorwa.

Ati «Kwicungira umutekano dukumira ibyaha nta kiguzi byadusaba turamutse dufatanyije twese kuko ingaruka z’ibyaha twese zitugeraho mu buryo bumwe cyangwa ubundi.» Yibukije abari bahari ko buri wese akwiye kuba ijisho rya mugenzi we.

Yashimiye abaturage batangira amakuru ku gihe mu rwego rwo gukumira icyaha kitaraba cyangwa kukirwanya.

Yashimiye  kandi umumotari witwa Sebanani Emmanuel utuye mu murenge wa Rusororo mu karere ka Gasabo wabashije  gukumira icyaha cyari kigiye gukorwa n’umukobwa wakoraga mu rugo rw’umuntu. Uwo mukobwa  yari agamije gutwara umwana wo muri urwo rugo bivugwa ko byatewe n’ikibazo yari afitanye n’abakoresha be.

Umumotari witwa Sebanani na we yahembewe muri iki gikorwa kubera ukuntu yakumiriye icyaha (Niyirora M.Foto)

Iki gikorwa  uyu mumotari yagikoze ku ya 17 Gicurasi 2018 aho yajyanye uwo mukobwa wari wibye umwana amushyikiriza ishami rya  Polisi i Kinyinya mu Mujyi wa Kigali. Mu gihe umuntu yaba afitanye ikibazo n’umukoresha we aho gukora amakosa, yavuze ko umuntu akwiye kwegera  ubuyobozi. Igihembo yashyikirijwe muri ibyo birori mu rwego rwo kumushimira, yahawe moto nshya.

Minisitiri w’Umuco na Siporo Uwacu Julienne yavuze ko nk’uko ijwi ry’abahanzi rigera kure adashidikanya ko  uruhare rwabo mu gukumira ibyaha ari ntagereranywa kuko n’utari  yababona ubutamwa bwabo bumugeraho.

Minisitiri w’Umuco na Siporo Uwacu Julienne ni we wari umushyitsi mukuru (Niyirora M.Foto)

 

 

TANGA IGITEKEREZO

Leave a Reply

Your email address will not be published. Required fields are marked *