22°C , Mostly sunny | Kigali-Rwanda
Umunyamabanga Nshingwabikorwa wa CNLG Dr Bizimana Jean Damascene yavuze ko imurikwa ry'icyo gitabo rigamije kubika no gukomeza gusigasira amateka ya Jenoside

Hagiye kumurikwa igitabo kuri Jenoside cyanditswe n’Abafaransa

Yanditswe na Twagira Wilson

Ku ya 05-07-2019 saa 16:11:41

Mu rwego rwo gufasha Abanyarwanda gusobanukirwa no kumenya amateka kuri Jenoside yakorewe Abatutsi mu Rwanda, Komisiyo y’Igihugu ishinzwe kurwanya Jenoside yatangaje ko hari igitabo cyanditswe n’abafaransa 2 kiswe ‘Cahiers de Memoire’ ugenekereje mu Kinyarwanda bisobanuye ‘Amakayi y’urwibutso’’ kikazamurikwa ku mugaragaro mu cyumweru gitaha.

Umunyamabanga Nshingwabikorwa wa Komisiyo y’Igihugu yo kurwanya Jenoside Dr. Bizimana Jean Damascene yabwiye Imvaho Nshya ko imurikwa ry’icyo gitabo riri mu rwego rwo gukomeza gusigasira no kubika amateka kuri Jenoside yakorewe Abatutsi mu Rwanda mu 1994, avuga ko ari igitabo gikubiyemo ubuhamya bw’abacitse ku icumu rya Jenoside yakorewe Abatutsi aho buri wese avuga amateka ye.

Abafaransa babiri banditse icyo gitabo ni Florence Pludhomme na Michelle Muller, akaba ari igitabo gihagarariwe na bamwe mu Banyarwanda barimo Louis Basengo Munyaburanga, Annonciata Mukamugema, na Dr Jean Paul Kimonyo.

Dr. Bizimana yagize ati: “Ni igitabo cya kabiri banditse gikubiyemo ubuhamya bw’abacitse ku icumu rya Jenoside yakorewe Abatutsi bavuga amateka yabo kuri Jenoside, abanditse igitabo bafashe itsinda rigizwe n’abarokotse Jenoside mu bice bitandukanye by’igihugu bahuza ubuhamya bwabo aho buri wese avuga amateka ye, ndetse akabafasha kongera kwiyubaka, ku buryo babana n’ibikomere bikabafasha mu rugendo rwo kongera kwiyubaka’’.

Ubwo CNLG yamurikaga ubushakshatsi yakozwe ku itegurwa n’ishyirwa mu bikorwa rya Jenoside yakorewe Abatutsi mu cyahoze ari Perefegitura ya Kibungo, umukozi muri iyo Komisiyo Justine Hitimana wayoboye ubwo bushakashatsi yanenze bamwe mu bayobozi bajyaga mu bigo by’ amashuri bagatoranya abana b’Abatutsi nyuma bakabatoteza birimo kubaha ibihano byo kubapfukamisha mu mihanda kandi nta cyo bakoze babaziza ubusa, yibutsa umwihariko w’itariki ya 6 Mata 1994, aho uwitwa Sylvain Mutabaruka witwaraga gisirikare yahise afata urubyiruko batangira gukora ubwicanyi mu gace ka Rukumberi, Kabarondo, Kigarama n’ahandi.

Umunyamabanga Nshingwabikorwa wa CNLG Dr Bizimana Jean Damascene yavuze ko imurikwa ry’icyo gitabo rigamije kubika no gukomeza gusigasira amateka ya Jenoside

TANGA IGITEKEREZO

Leave a Reply

Your email address will not be published. Required fields are marked *