19°C , Mostly cloudy | Kigali-Rwanda

Hagiye gushyirwaho ikigega RYAF Fund cyo gufasha urubyiruko rukora ubuhinzi

Yanditswe na Mutungirehe Samuel

Ku ya 13-01-2020 saa 19:28:34
Hategekimana Jean Baptiste uyobora Ihuriro ry'Urubyiruko rukora mu by'ubuhinzi n'ubworozi avuga ko ikigega RYAF Fund kizafasha urubyiruko kwihuta mu mishinga yarwo

Umuyobozi Mukuru w’Ihuriro Nyarwanda ry’urubyiruko rukora ubuhinzi RYAF, Hategekimana Jean Baptiste, atangaza ko nk’urubyiruko rwiyemeje guteza imbere urwego rw’ubuhinzi n’ubworozi mu Rwanda bagiye gushyiraho ikigega kizajya cyunganira imishinga y’urubyiruko rukeneye amafaranga mu bigo by’imari vuba kandi nta ngwate.

Ati “Turifuza ko habaho ibigo binini, ibiganiro turi kubikora mu mabanki atandukanye, aho twifuza ko habaho ikigega “RYAF Fund”.

Murabizi RYAF ni ihuriro ry’urubyiruko ruri mu by’ubuhinzi, ni ukuvuga ngo ni abantu ba mbere bakabaye bigira. Buriya buri mwaka hatangwa amafaranga ibihumbi 12 kuri buri musore n’umukobwa uri hagati y’imyaka 18 na 35 y’amavuko hakaba na konte ishyirwaho ayo mafaranga.”

Akomeza agaruka ku ntumbero bafite, ati “Twumva umunsi umwe twakabaye dushobora kuba twigira, ku buryo RYAF yabwira banki iti uyu mwana muduhere miriyoni eshatu nta bwo azakwambura turabyizeye.

Urumva twaba tumufashije kubona amafaranga noneho twe tugafatanya na Banki nayo igakora akazi kayo kuri uwo muntu ikuyemo ikintu kitwa ingwate, twe tukaba twayitanga. Mu bihugu byateye imbere kubera ko umuntu wese aba azwi, bafite imyirondoro ye, nta bwo bajya bagorana, niba ushaka inguzanyo y’ibihumbi bitanu by’amadorari urayaka bakayaguha kuko aho utuye harazwi n’ibyo ukora birazwi mbese imyirondoro yawe igihugu kirayifite”.

Hategekimana yasobanuye ko bifuza ko ibintu byo kubona amafaranga byava mu buryo bukomeye bikaba ibintu byoroshye.

Ati “Nta bwo tuzajya imbere y’ikigo k’imari kigamije inyungu tudafite natwe impamba yacu. Twashyizeho icyo kigega, turi no kugishakira abaterankunga ku buryo bashobora no kongeramo amafaranga”.

Mu bindi bikorwa urubyiruko rukora ubuhinzi rwashyizeho birimo amaguriro atandukanye mu Mujyi wa Kigali abarizwamo ibicuruzwa n’imyaka biva mu musaruro w’ubuhinzi n’ibyongerewe agaciro bifasha igihugu kuzamura ubukungu bw’imbere mu gihugu no kuzamura umusaruro w’ibiribwa ku isoko.

Ku ruhande rw’urubyiruko rukora ubuhinzi n’ubworozi mu mishinga yo kongerera agaciro, bamwe bavuga ko igihe cyose amafaranga aba akenewe yo kongerera ubushobozi inganda nto zabo kandi amafaranga nk’ayo akuriweho ingwate afasha kwihuta mu gukemura ibibazo kuko aboneka nta mvune zabayeho agakoresherezwa igihe.

Umwanditsi:

Mutungirehe Samuel

2 Comments on “Hagiye gushyirwaho ikigega RYAF Fund cyo gufasha urubyiruko rukora ubuhinzi”

  1. Ikigega “RYAF Fund” cyadufasha byinshi nk’Urubyiruko kuko dufite imishinga myinshi y’Ubuhinzi n’Ubworozi twifuza gukora mu buryo burambye ariko tukabura ubushobozi. Ahubwo byaba byiza kurushaho, ibyo Hategikamana Jean Baptiste avuga koko bishyizwe mu bikorwa ntibihere mu magambo gusa. Dushimiye rero Hategikamana nk’Umuyobozi mukuru wa RYAF ku bw’igitekerezo cyiza agize cyo kudushyirira ho icyo kigega. Ariko turanamusaba ko icyo gitekerezo cyiza yagize, ko yanadufasha kigashyirwa mu bikorwa koko nk’Urubyiruko bikadufasha kugera ku nzozi zacu zo kwigira tukiteza imbere ndetse tukanazamura igihugu cyacu ntabyo kwirirwa tubunza diploma zacu ngo turasaba akazi katanaboneka. Urugero: Nk’ubu RYAF itanga akazi, ariko akazi itanga kameze nkk’akatagira amategeko akagenga kuko ibi mvuga byabaye ku bakozi ba RYAF b’Aba TechniciensVétérinaires 30 bakoreraga mu Gishwati muri gahunda yo Kurwanya Indwara y’Ifumbi (Mastitis Control and Prevention) mu nka zikamwa hagamijwe kubungabunga ubuzima bw’izo nka no kongera umukamo w’amata cyane cyane mu bwiza(Grading milk quality and milk volume in Grade1 especially). Ubwo Kuwa 31 Ukuboza,Umwaka ushize wa 2019,ni bwo RYAF yatunguye abo bakozi bayo navuze haruguru ibabwira ko akazi kabo karangiye itarabateguje kandi na Contrats bafitanye zitarangiye rwose nta n’ikindi kibazo kiri hagati y’impande zombi(Ryaf nk’umukoresha n’abakozi bayo) kandi nyamara Ryaf yahise ihamagara abandi bakozi bashya 30 basimbura abo kandi mu masezerano bari bafitanye iyo ngingo y’ivanwa ry’Abakozi mu kazi bakoraga ntaho iri cg se yanditse na hamwe. Muby’ukuri ntaho twe turumva abakozi bose bavanwa mu kazi nta kibazo bagiranye n’Umukoresha wabo, kandi batananiwe inshingano zabo bahawe z’akazi, ndetse n’akazi bakoraga katarangiye na Contrats zigifite igihe,Ahubwo kagahabwa abandi. Ni muri urwo rwego rero twifuza ko icyo kigega cya Ryaf Fund cyashyirwaho kuko cyadufasha kuruta ako kazi batubeshyeshya kirukana umukozi nta nteguza. Kuko usanga iyo bibaye bityo umukozi nta gishoro yavana muri ako kazi kuko amafaranga yahembwe aba yarayakoresheje mu buryo bunyuranye yizeye ko amasezerano yiwe y’akazi agikomeje. Murakoze

Tanga Igitekerezo

Email yanyu ntigaragazwa ku rubuga. Amazina na Email ni ngombwa.