20°C , Mostly cloudy | Kigali-Rwanda
Raymond Murenzi (hagati), Umuyobozi w'Ikigo k'Igihugu gitsura ubuziranenge (Foto Ndamyirokoye F.)

Hagaragajwe uko ubuziranenge buhagaze mu makusanyirizo y’amata

Yanditswe na NDAMYIROKOYE FRANÇOIS

Ku ya 30-03-2018 saa 06:37:37

Umuyobozi w’Ikigo k’Igihugu gitsura ubuziranenge (RSB), Raymond Murenzi, ejo hashize  ku ya 29 Werurwe 2018 mu nama  yari ihuje ubuyobozi bw’iki kigo na bamwe mu bafite amakusanyirizo y’amata n’abandi bayobozi, yatangaje ko basuye 75%  by’amakusanyirizo y’amata (Milk zones) basanga ayuzuje ubuziranenge atageze kuri 30% ariko avuga ko  hakomeje gukorwa ubukangurambaga kugira ngo ibibazo birimo bikemuke.

Raymond Murenzi (hagati), Umuyobozi w’Ikigo k’Igihugu gitsura ubuziranenge (Foto Ndamyirokoye F.)

Murenzi yavuze ko amakusanyirizo basuye basanze afite ibibazo bitandukanye birimo kuba  abantu badafite ibikoresho by’ibanze birimo ibifasha kubika amata neza hagendewe ku bushyuhe bwagenwe n’amabwiriza  y’ubuziranenge, kwica amata bamwe bayavanga n’amazi, ifarini ndetse n’ifu y’ubugari.

Yagize ati “Gahunda twakoze yo gusura aya makusanyirizo hari ibibazo yatweretse birimo ibyo kuba bamwe badafite ibikoresho by’ibanze no kuba bavanga amata”.

Ku rundi ruhande avuga ko hari abo babonye batunganya amata neza akaba avuga ko  biyemeje gukomeza kubaha amahugurwa yimbitse bakarusho gutunganya amata afite ubuziranenge.

Kugira ngo ibyo bigerweho kandi yavuze ko baboherereza abafite ubumenyi bwisumbuye mu bijyanye no gutunganya amata bakabahugura.

Yavuze ko kandi bafite gahunda yo guha  ibirango by’ubuziranenge abujuje ibisabwa n’amabwiriza y’ubuziranenge ababagana bakamenya ubyuzuje n’utabyuzuje. Abatabyuzuje kandi avuga ko na bo batari ku kigero kimwe cyo kuba hari ibyo batuzuje.

Ibihano yavuze ko adashaka kubivugaho ngo ahubwo hagamijwe kubanza kubakebura, gusa hari n’abo basuraga bakavuga ko bimwe na bimwe bijyanye no kugira ngo amata agire ubuziranenge batabizi.

Inganda zo zitunganya amata, Umuyobozu wa RSB yavuze ko hafi ya zose zifite ibirango by’uburizanene, ngo kandi zimwe zifite ibibazo bimwe barimo kubiganira na bo.

Ubukangurambaga bukomeje gukorwa, akaba  ahamya ko buzatuma amata azajya agera ku muguzi ameze neza.

Ikigo k’Igihugu gitsura ubuziranenge kandi cyashyizeho gahunda yitwa “Zamukana ubuziranenge” igamije guteza imbere ubuziranenge.

Gahamanyi Françoise, umwe mu bafite ikusanyirizo ry’amata wari witabiriye iyo nama, yavuze ko we ibibazo yavuga bajyaga bagira ari ibijyanye n’umukamo muke mu gihe k’izuba. Ikindi kibazo ngo ni icyari kijyanye no gutwara amata ngo ariko ubu cyarakemutse.

Mu rwego rwo gukomeza ubwo bukangurambaga bugamije kwigisha gufata neza umusaruro w’amata no kubahiriza ubuziranenge bwayo, inama yabaye yari   igamije kureba imikorere y’amakusanyirizo y’amata n’igikwiye kugira ngo serivisi zitangirwa mu makusanyirizo y’amata zibe zujuje ubuziranenge.

 

 

TANGA IGITEKEREZO

Leave a Reply

Be the First to Comment!

avatar