24°C , Mostly cloudy | Kigali-Rwanda
Umuyobozi Mukuru wa RTDA Kalisa Guy ubanza ibumoso asobanura iby'imihanda yadindiye (Foto Gisubizo)

Hagaragajwe impamvu umuhanda Huye-Kibeho-Nyaruguru wadindiye

Yanditswe na SEZIBERA ANSELME

Ku ya 11-05-2018 saa 05:43:40

Umuyobozi w’Ikigo k’Igihugu gishinzwe iterambere ry’ubwikorezi (RTDA) Kalisa Guy, yasobanuye ko ikibazo k’idindira ry’umushinga wo gukora umuhanda wa kaburimbo ureshya na kilometero 63 Huye-Kibeho-Nyaruguru cyatewe no kuba abaterankunga bo mu gihugu cy’u Bushinwa baratinze gusinyana amasezerano n’u Rwanda kuko bifuje kuyasinyira rimwe n’andi yose icyo gihugu giteramo inkunga u Rwanda.

Umuyobozi Mukuru wa RTDA Kalisa Guy ubanza ibumoso asobanura iby’imihanda yadindiye (Foto Gisubizo)

Ibyo byagarutsweho ubwo icyo kigo RTDA cyatangaga ibisobanuro by’uburyo gikoresha ingengo y’imari gihabwa imbere ya Komisiyo y’Inteko Ishinga Amategeko ishinzwe ingengo y’imari ku itariki ya 08 Gicurasi 2018 nyuma y’uko abayigize basabaga ibisobanuro ku mishinga igenda idindira kandi yaremewe.

Umuyobozi Mukuru wa RTDA, Kalisa Guy, yatangarije abagize iyo komisiyo ko itinda ryo gusinya amasezerano y’inkunga yo gukora umuhanda Huye-kibeho- Nyaruguru ryababereye inzitizi ikomeye.

Agira ati Umuhanda Huye-Kibeho-Nyaruguru, ni umushinga duterwamo inkunga n’Abashinwa, twari twemeje ko tuzasinya amasezerano muri uyu mwaka w’ingengo y’imari 2018/2019, baza kudusaba ko twategereza tugazasinyana muri Nyakanga kuko bashaka kuzasinya amasezerano yose y’imishinga baduteramo inkunga icyarimwe. Ibyo rero twaje kubimenya muri Mutarama nyuma y’ivugururwa ry’ingengo y’imari”.

Nk’uko Kalisa abisobanura mu ishyirwa mu bikorwa ry’uwo mushinga, mu ngengo y’imari ya 2017-2018 ku ruhande rw’u Rwanda hari hashyizwemo amafaranga arenga 2 000 000 000, mu gihe mu ngengo y’imari ya 2018-2019, biteganyijwe ko u Rwanda ruzashyiramo Frw 1 700 000 000.

Usibye umushinga wo gukora uwo muhanda hanagaragajwe ko hari n’undi ureshya na kilometero 66,5 ugomba kuva mu Karere ka Ngoma ukagera mu ka Nyanza, aho RTDA igaragaza ko uwo mushinga ugeze muri gahunda zo gutanga amasoko ku buryo mu ngengo y’imari itaha imirimo izaba yatangiye.

Ibisobanuro ku mushinga w’umuhanda Huye-Kibeho-Nyaruguru byagarutsweho mu gihe Perezida wa Repubulika Paul Kagame yawemereye abaturage bo mu Karere ka Nyaruguru mu mwaka wa 2013, ukaba wari uteganyijwe gutangira kubakwa muri Kamena 2017 kugeza ubu imirimo ikaba itaratangira.

Muri Nzeri 2016, Ikigo k’Igihugu gishinzwe Iterambere ry’Ubwikorezi (RTDA), cyavugaga ko nta gihindutse ibikorwa byo kubaka umuhanda Huye-Kibeho-Nyaruguru byagombaga gutangira muri Kamena 2017, bityo ukazaba watangiye gukoreshwa mu mpera za 2019.

 

TANGA IGITEKEREZO

Leave a Reply

Your email address will not be published. Required fields are marked *