26°C , Mostly cloudy | Kigali-Rwanda
Dr. Yvonne Kayiteshonga n'Umushinjacyaha Mukuru Mutangana Jean Bosco (iburyo) na Bosenibamwe Aimé baganira nyuma y'ibiganiro byo kureba uko ikibazo k'ibiyobyabwenge bihagaze mu Rwanda (Foto James R.)

Hagaragajwe impamvu abakoresha ibiyobyabwenge biyongera mu Rwanda

Yanditswe na MUTUNGIREHE SAMUEL

Ku ya 13-06-2018 saa 05:55:53

Umuyobozi ushinzwe ishami ry’ubuzima bwo mu mutwe mu Kigo k’igihugu gishinzwe ubuzima RBC, Dr Yvonne Kayiteshonga, yatangaje ko imibare y’abakoresha ibiyobyabwenge ikomeje kwiyongera uko imyaka ishira kandi mu mpamvu zibitera zirimo n’uko ababikoresha babibona n’ibibazo umuntu ahura nabyo.

Dr. Yvonne Kayiteshonga n’Umushinjacyaha Mukuru Mutangana Jean Bosco (iburyo) na Bosenibamwe Aimé baganira nyuma y’ibiganiro byo kureba uko ikibazo k’ibiyobyabwenge bihagaze mu Rwanda (Foto James R.)

Yabitangaje ejo hashize, tariki ya 12 Kamena 2018 ubwo Minisiteri y’Ubuzima n’Ikigo k’igihugu gishinzwe ubuzima RBC bahuraga n’izindi nzego ziri mu bufatanye bwo kurandura ibiyobyabwenge zirimo amadini n’amatorero, Ikigo k’igihugu k’igororamuco (NRS), Polisi y’u Rwanda, amashuri makuru na kaminuza, inzego z’ubuvuzi, inzego z’ubutabera n’indi miryango ifite inshingano zo kurwanya ibiyobyabwenge mu rubyiruko.

Dr Kayiteshonga avuga ko mu Rwanda ubushakashatsi bwa Minisiteri y’Urubyiruko na kaminuza y’u Rwanda bwo mu 2012 bwagaragaje ko abari hagati y’imyaka 14 na 35 bangana na 52% bagerageje gukoresha ibiyobyabwenge kandi muri bo 92% bakomeje kubikoresha, abangana na 7% babaye imbata y’inzoga, 5% baba imbata ya nicotine naho 2% baba imbata y’urumogi.

Yakomeje avuga ko ibiva mu mibare yo mu bitaro hirya no hino, izashyirwa ahagaragara mu Kuboza uyu mwaka, bigaragaza ko ikibazo kiyongera.

Avuga ku mpamvu ituma abakoresha ibiyobyabwenge biyongera, yagize ati “Impamvu ya mbere ni ukuba biboneka; impamvu ya kabiri ni ibibazo by’amarangamutima, birimo agahinda, kumva utiyizeye, ubabaye ugashaka umunezero mu biyobyabwenge. Ikindi ni amakimbirane mu miryango atuma umwana agirwa inama mbi na bagenzi be n’agakungu mu rubyiruko”.

Dr. Kayiteshonga yavuze ko ishami ry’umuryango mpuzamahanga ryita ku bibazo by’ibiyobyabwenge rigaragaza ko abantu miliyoni 200 ku Isi bafata ibiyobyabwenge nibura rimwe buri mwaka, muri bo miliyoni 25 babaye imbata zabyo, kandi buri mwaka abantu ibihumbi 200 bicwa n’indwara batewe n’ibiyobyabwenge; ikibabaje abana n’urubyiruko ari bo bugarijwe na byo.

Umuvugizi wa Polisi y’u Rwanda, CP Theos Badege, yavuze ko ibiyobyabwenge mu bwoko bwabyo bwose bikiri ikibazo gihangayikishije ariko hashyirwamo ingufu mu kubihashya no guhana.

Yasobanuye ko ikibazo kigihari mu kubirwanya kiri mu ruhare rwa buri wese mu gufasha inzego kurandura aho ibiyobyabwenge bifite imizi nko ku mipaka no ku babikoresha.

Ati “Ni uruhare rwa buri muturarwanda wese uturiye umupaka ubona urumogi rwinjira ntarubuze, ubona umwana w’umuturanyi anywa urumogi ntamubuze, ubona umuturanyi ateka kanyanga mu ijoro inzego z’ubuyobozi zidahari hafi ntabitangaze, umuyobozi wo mu nzego z’ibanze ubona kanyanga itekwa ntabibuze kuko wenda bamuhaye ku nyungu bakuramo, ni icyo dukeneye cyagombye gukorwa”.

Umushinjacyaha Mukuru Jean Bosco Mutangana yavuze ko bageze ku kigero kirenga 90% mu gutsinda imanza zifitanye isano n’ibiyobyabwenge kuko haba hari ibimenyetso bigaragara.

Umuyobozi Mukuru w’Ikigo k’igihugu k’igororamuco, Bosenibamwe Aimé, yavuze ko uburemere bw’icyo kibazo burushaho kumvikana iyo ugeze aho urubyiruko rugera ku 4 000 buri mwaka rujya i Wawa biyongeraho n’ahandi mu gihugu, barangwa n’ingaruka zo gukoresha ibiyobyabwenge, kandi igihugu gitanga miliyari 100 buri mwaka zo kubitaho.

Mu gukemura ibyo bibazo, Bosenibamwe yavuze ko hagiye gushyirwaho uburyo buhamye bwo kurinda ko hari uwasubira mu biyobyabwenge n’utarabijyamo ntabigemo.

TANGA IGITEKEREZO

Leave a Reply

Be the First to Comment!

avatar