22°C , Partly cloudy | Kigali-Rwanda
Dr. Rukundo Jean Claude, umukozi wa RAB ushinzwe ubugenzuzi bw' ubuvuzi bw' amatungo yerekana imiti itemewe gukoreshwa (Foto Gisubizo G.)

Hafunzwe farumasi zafatiwemo imiti y’amatungo itujuje ubuziranenge

Yanditswe na SEZIBERA ANSELME

Ku ya 10-07-2018 saa 07:04:16

Nyuma y’ingenzurwa ryakozwe n’inzego zinyuranye zirimo Minisiteri y’Ubuhinzi n’Ubworozi (MINAGRI), Ikigo k’Igihugu gishinzwe iterambere ry’ubuhinzi n’ubworozi (RAB) ku bufatanye n’Urwego rw’Igihugu rushinzwe Ubugenzacyaha (RIB), hamaze gufungwa farumasi 4 muri 18 zasanzwemo imiti y’amatungo imaze amezi 3 irengeje igihe, iy’imyiganano n’indi ibujijwe, ibyo bikaba bibaye nyuma y’imfu z’inka zimaze iminsi mu bice bitandukanye mu gihugu.

Dr. Rukundo Jean Claude, umukozi wa RAB ushinzwe ubugenzuzi bw’ ubuvuzi bw’ amatungo yerekana imiti itemewe gukoreshwa (Foto Gisubizo G.)

Ibyo byagarutsweho mu kiganiro izo nzego zombi RIB na RAB zagiranye n’itangazamakuru mu rwego rwo kurigaragariza ibyavuye muri ubwo bugenzuzi, cyabaye ejo hashize tariki ya 9 Nyakanga 2018.

Umuyobozi w’ishami rishinzwe gukumira ibyaha muri RIB Karake Peter, avuga ko kuva tariki ya 03 kugera ku ya 06 Nyakanga 2018 ari bwo hakozwe ubwo bugenzuzi buhuriweho n’inzego zitandukanye nka MINAGRI, RIB, RAB n’Urugaga rw’Abaganga b’amatungo (RCVD) hafatwa imiti y’amatungo y’imyigananano n’indi ibujijwe y’ubwoko 6 yinjiye mu buryo butazwi yose hamwe ifite agaciro ka 24 970 925 z’amafaranga y’u Rwanda.

Karake Peter Umuyobozi Mukuru w’ishami rishinzwe gukumira ibyaha muri RIB (Foto Gisubizo G.)

Agira ati: “Twakoze ubugenzuzi muri farumasi z’imiti y’amatungo, hafatwa imiti ifite agaciro k’amafaranga  24 970 925 ikekwaho kuba imyiganano n’ibujijwe gucuruzwa mu Rwanda yafashwe, ndetse hanafatwa abantu batatu bakekwaho kuba inyuma y’ibikorwa byo kwigana imiti, kuyinjiza no kuyikwirakwiza mu Rwanda”.

Karake avuga ko muri izo Farumasi 4 zafunzwe, 3 muri zo ziri mu mujyi wa Kigali indi imwe mu karere ka Huye izisigaye zirihanangirizwa.

Umuyobozi w’ishami rishinzwe ubugenzuzi  bw’ubuvuzi bw’amatungo Dr Rukundo Jean Claude, avuga ko muri ubwo bugenzuzi bwakorewe muri farumasi 52 ziherereye mu turere 9 two mu mujyi wa Kigali no mu Ntara y’Iburasirazuba, iy’Uburengerazuba n’iy’Amajyepfo, hafatwa imiti y’imyiganano, iyarengeje igihe, ibujijwe mu Rwanda n’itagaragaza neza inkomoko.

Nk’uko Dr Rukundo abisobanura, icyari kigambiriwe cyari ugusenya itsinda ry’abantu bari mu bikorwa bibujijwe byo kwigana imiti y’amatungo, kuyinjiza no kuyikwirakwiza mu gihugu.

Itangazamakuru ryabajije aho iyo miti yaba ihuriye n’ikibazo k’imfu z’amatungo zagiye ziba mu Ntara y’Iburasirazuba, cyatangiye no kugera mu majyepfo mu karere ka Kamonyi na Muhanga, Dr Rukundo atangaza ko hari zimwe mu nka zapfuye kubera ikibazo cyo kuvangavanga imiti yica uburondwe cyabayeho, ariko hakaba n’izindi zatewe n’indwara y’ubuganga bwo mu gishanga (Rift Valley Fever) yakunze kwigaragariza mu bice byegereye ahanyura uruzi rw’Akagera, Akanyaru na Nyabarongo kuko ari ahantu imibu yororokera.

Muri icyo kiganiro hanabajijwe ibihano bigenerwa farumasi ifatiwe muri ayo makosa, Dr Rukundo avuga ko uwagaragaweho gucuruza iyo miti itujuje ibisabwa afungirwa bizinesi ye burundu, yaba ari umuganga w’amatungo wawukoresheje agashyikirizwa urugaga rw’abavuzi b’amatungo rukamugenera ibimukwiye.

Karake we anagaragaza ko kuri uwo muntu ugurisha ibitujuje ubuziranenge ahanishwa igifungo cy’amezi 6 kugera ku myaka ibiri bitewe n’uburemere bw’icyaha ndetse n’amande atari munsi ya miliyoni imwe kandi atarenze miliyoni 5 z’amafaranga y’u Rwanda.

Abanyamakuru kandi bakaba baragaragarijwe imwe mu miti y’amatungo yafashwe itemewe harimo AMITIX, imyunyu baha amatungo, ibinini by’inka yarwaye, Novarigine igabanya umuriro n’inshinge zifashishwa mu buvuzi bw’amatungo byarengeje igihe.

 

 

TANGA IGITEKEREZO

Leave a Reply

Be the First to Comment!

avatar