18°C , Mostly cloudy | Kigali-Rwanda
Amazi y'igishanga cya Nyabarongo yarenze imbibi ajya mu muhanda hakaba harafashwe ingamba zo kuzakemura icyo kibazo (Foto James R)

Hafashwe ingamba eshatu ku kibazo k’imyuzure ku kiraro cya Nyabarongo

Yanditswe na MUTUNGIREHE SAMUEL

Ku ya 01-05-2018 saa 10:02:01

Muri iyi minsi hagwa imvura nyinshi, ku kiraro cya Nyabarongo gihuza Umujyi wa Kigali n’Intara y’Amajyepfo (akarere ka Kamonyi) amazi ararenga ku muhanda ku gice cya Kamonyi akaba yagira ingaruka ku ngendo, dore ko hari ubwo zijya zihagarikwa. Leta y’u Rwanda ikaba yarafashe ingamba eshatu zo kuvugurura iki kiraro.

Amazi y’igishanga cya Nyabarongo yarenze imbibi ajya mu muhanda hakaba harafashwe ingamba zo kuzakemura icyo kibazo (Foto James R)

Umunyamabanga wa Leta muri Minisiteri y’Ibikorwa Remezo ushinzwe gutwara Abantu n’Ibintu, Eng. Uwihanganye Jean de Dieu yatangarije Imvaho Nshya ko hari ingamba eshatu muri gahunda yo kuvugurura iki kiraro cya Nyabarongo, mu rwego rwo guhangana n’amazi ajya arenga ku muhanda uca kuri icyo kiraro agahagarika ingendo z’abantu, cyane mu bihe by’imvura nyinshi iteza imyuzure.

Eng. Uwihanganye yavuze ko muri rusange ikiraro cya Nyabarongo nta kibazo gifite, nta n’ikibazo giteza, ariko gahunda yo kuhavugurura irahari.

Ati “Uko kimeze ikiraro ubwacyo ubu nta bwo ari ikibazo, ikibazo ni amazi arenga umuhanda aba yaturutse aho Nyabarongo iva muri rusange. Hari ingamba zo kubaka umuhanda uca iruhande rw’uruganda rwa Ruliba, ugahuza Umujyi wa Kigali uciye i Mageragere kuko hari ikiraro, ibyo biri no mu masoko, ntekereza ko mu myaka ibiri bizaba byuzuye.

Hari na gahunda yo kubaka urugomero rwa Nyabarongo II ruzaba rufite metero ebyiri rukumira iyo myuzure, rukazagira uburyo ruzajya rufata ayo mazi yabaye menshi ntiyuzure ngo arenge umuhanda, ngira ngo mu myaka itatu iri imbere ruzaba rwaruzuye. Iyo ukurikiye, iriya myuzure ngira ngo ntiyica ikiraro, imyuzure irenga umuhanda, icyo dukwiye kurwanya ni ukurwanya ko iyo myuzure yongera kurenga umuhanda ahubwo igakomeza guca mu nzira yayo”.

Umunyamabanga wa Leta muri Minisiteri y’Ibikorwa Remezo yakomeje avuga ko hari gutekerezwa n’ubundi buryo bw’ikoranabuhanga bwo kwifashisha mu gihe imyuzure yaba yateje ikindi kibazo, ingendo z’abantu ntizihagarare.

Ati “Ingamba ya gatatu ni uko harimo gutekerezwa gushaka ibiraro byitwa “Mobile Bridge” binyura mu kirere, ibiraro bizajya byifashishwa igihe habaye ibibazo nka biriya kuko imihindagurikire y’ikirere ikomeje kuba myinshi, nta bwo wakwizera ko uko wabitunganya kose ko bitazaba, hakaba ikintu abantu bashobora kwitabaza igihe habaye ibibazo nka biriya, na cyo dutekereza ko mu myaka nk’ibiri, itatu iri imbere kizaba kiboneka”.

Yakomeje avuga ko gahunda ngari ya Guverinoma isaba ko habaho ubundi buryo butandukanye bwo kunganira izo ngamba burimo gufata amazi amanuka ku misozi, hongerwa imirwanyasuri, gufata amazi ku bantu batuye ku misozi bakayakoresha neza.

Muri gahunda yo kubaka urugomero rwa Nyabarongo II harimo kandi no gutunganya ibice byuhirwa birimo n’igishanga cya Nyabarongo ahahingwa ibisheke.

Muri Gicurasi 2016 ni bwo imyuzure iheruka kurengera umuhanda uca ku kiraro cya Nyabarongo ufunga urujya n’uruza rw’abantu mu ngendo. Uyu mwaka n’ubwo hatarabaho kongera gufunga uyu muhanda, ariko amazi amaze kuwurengaho.

 

TANGA IGITEKEREZO

One Comment on “Hafashwe ingamba eshatu ku kibazo k’imyuzure ku kiraro cya Nyabarongo”

Leave a Reply

Your email address will not be published. Required fields are marked *