22°C , Mostly cloudy with thunderstorms | Kigali-Rwanda

Habonetse amafaranga yo kubaka umuhanda Base – Butaro – Kidaho

Yanditswe na KAYITARE JEAN PAUL

Ku ya 16-05-2018 saa 08:18:30

Inguzanyo ingana n’amadolari y’Amerika miliyoni 66.60, ni ukuvuga miliyari 56 mu mafaranga y’u Rwanda, ni yo Guverinoma y’u Buhinde yahaye Leta y’u Rwanda kugira ngo hakorwe umuhanda ufite uburebure bwa kilometero 63 uva kuri Base mu karere ka Gakenke ukanyura Butaro ahubatse ibitaro bivura indwara ya kanseri ugakomeza ukazagera Kidaho mu karere ka Burera, aho uhurira n’umuhanda Musanze-Cyanika mu Ntara y’Amajyaruguru.

Minisitiri w’Imari n’Igenamigambi Dr Uzziel Ndagijimana avuga ko uyu muhanda ugiye kubakwa uzateza imbere ubukerarugendo (Foto James R.)

Amasezerano yasinywe hagati ya Guverinoma y’u Rwanda n’iy’u Buhinde ku mugoroba w’ejo hashize ku wa Kabiri tariki 15 Gicurasi 2018. Minisitiri w’Imari n’Igenamigambi Dr Uzziel Ndagijimana, avuga ko Leta y’u Rwanda ishyize imbaraga mu guteza imbere ubukerarugendo, bityo uyu muhanda ukazafasha abatemberera mu Majyaruguru kimwe n’abakora ingendo bagana ibitaro bya Burera.

Iburyo ni Minisitiri w’Imari n’Igenamigambi Dr Uzziel na Ndagijima na Tarun Sharma bashyira umukono ku masezerano y’inguzanyo (Foto James R.)

Ati “U Rwanda rushyize imbaraga mu guteza imbere ibikorwaremezo hashingiwe ku bukerarugendo. Uyu muhanda uzadufasha mu bwikorezi bw’imizigo no gutwara abantu. Ikindi hari ibikorwa by’amajyambere bizafasha uyu muhanda cyane cyane ibitaro bya Butaro by’indwara ya kanseri ndetse hari na kaminuza aho mu rwego rw’ubuzima, abashaka izo serivisi bazoroherwa n’ingendo kuko abaganaga ibitaro bya Butaro bavaga Musanze bakanyura Base, ukajya Butaro bakoze ibirometero nka 80 ariko uyu muhanda mushya uzatuma bakora ibirometero 40 gusa uvuye Musanze ujya ku bitaro bya Butaro”.

Tarun Sharma, umuyobozi mukuru wa IEI Bank (India Export Import Bank) wari uhagarariye u Buhinde muri uyu muhango, yavuze ko yizeye ko amasezerano IEI Bank igiranye na Guverinoma y’u Rwanda azagenda neza nkuko hari byinshi basanzwe bakorana n’u Rwanda kugira ngo rukomeze rutere imbere.

Ikibazo k’imihanda ikunze kwangirika itaramara igihe bitewe n’ubuziranenge bwayo, Minisitiri Dr Ndagijimana asobanura ko uyu muhanda wa Base-Butaro -Kidaho ubuziranenge bwawo n’uburyo uzubakwamo bizagenwa n’amasezerano azaba hagati ya Guverinoma y’u Rwanda na sosiyete izawukora.

Ati “Ayo masezerano ajyanye n’umuhanda, uko uzubakwa ndetse n’ubuziranenge ugomba kuba ufite n’igihe uzamara, bishyirwa mu masezerano hagati y’abazubaka umuhanda ndetse na Guverinoma y’u Rwanda, ayo twasinye uyu munsi ni amafaranga azakora uriya muhanda ariko kubaka umuhanda ni amasezerano akorwa hagati ya Guverinoma na sosiyete izawubaka.”

Biteganyijwe ko umuhanda uzatangira gukorwa 2019 ukazagenzurwa n’Ikigo k’igihugu gishinzwe guteza imbere ubwikorezi (RTDA). Inguzanyo ya miliyoni 66.60 z’amadolari Leta y’u Rwanda izayishyura mu myaka 25, ariko akazatangira kwishyurwa nyuma y’imyaka itanu nta nyungu, indi myaka isigaye ikishyurwa ku nyungu ya 1.5%.

TANGA IGITEKEREZO

Leave a Reply

Be the First to Comment!

avatar