Habonetse abarwayi 21 n’umuntu wa 21 wishwe na COVID-19

Yanditswe na Imvaho Nshya

Ku ya 09-09-2020 saa 20:12:53

Minisiteri y’Ubuzima yatangaje ko kuri uyu wa Gatatu tariki ya 09 Nzeri 2020,  umuntu wa 21 yishwe n’icyorezo cya COVID-19 mu Rwanda, haboneka n’abarwayi bashya 21 batahuwe mu bipimo  3,805 byafashwe mu masaha 18 ashize, hataha abantu 21 bakize neza.

Uwo icyo cyorezo cyambuye ubuzima kuri uyu munsini umubyeyi w’imyaka 71 w’i Kigali akaba akurikiye uwatangajwe ku munsi w’ejo w’imyaka 70. Minisiteri y’Ubuzima ikomeje kwihanganisha imiryango y’ababura ababo bakundaga kubera COVID-19.

Abarwayi bashya barimo 17 bapimwe mu bibasiwe kurusha abandi muri Kigali, Batatu bo mu Karere ka Kirehe, n’umwe wo mu Karere ka Rusizi.

Ibyo byatumye umubare w’abamaze gukira ugera ku 2,325 bangana na 52% by’abantu 4,460 bamaze gutahurwaho icyo cyorezo mu Rwanda.

Kugeza ubu abakirimo kwitabwaho n’abaganga bageze ku 2,114 mu barwayi bamaze kuboneka  mu bipimo 451,408 byafashwe kuva umurwayi wa mbere yatahurwa muri Werurwe kugeza ubu.

Igikorwa cyo gupima abantu mu buryo bwa rusange mu Gihugu kirakomeje, ndetse ingendo zihuza Umujyi wa Kigali n’Intara mu modoka rusange zahagaritswe mu rwego rwo gukumira ikwirakwizwa ry’icyo cyorezo.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze kuri miriyoni n’ibihumbi 315 barimo abantu miriyoni bakize n’abandi basaga ibihumbi 31.7 bahitanywe na cyo. Abamaze kwandura ku Isi barasaga miriyoni 27.9 barimo abasaga  miriyoni 19.9 bakize n’abapfuye barenga ibihumbi 905.6.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.