21°C , Partly sunny | Kigali-Rwanda
Uhereye ibumoso ni Minisitiri w'Intebe Dr Ngirente Edouard, Umunyamabanga wa Leta muri MINECOFIN, Uwera Claudine n'Umuyobozi Mukuru wa RRA, Tusabe Richard ubwo hizihizwaga imyaka 20 RRA imaze (Foto James)

Guverinoma irashimira RRA ku bikorwa by’ingenzi yagezeho

Yanditswe na KAYITARE JEAN PAUL

Ku ya 29-09-2018 saa 11:33:07

Minisitiri w’Intebe Dr. Ngirente Edouard yavuze ko Guverinoma y’u Rwanda ishimira Ikigo k’Igihugu k’Imisoro n’Amahoro, RRA ku bikorwa by’ingenzi iki kigo cyagezeho mu myaka 20 ishize gishinzwe.

Uhereye ibumoso ni Minisitiri w’Intebe Dr Ngirente Edouard, Umunyamabanga wa Leta muri MINECOFIN, Uwera Claudine n’Umuyobozi Mukuru wa RRA, Tusabe Richard ubwo hizihizwaga imyaka 20 RRA imaze (Foto James)

Ubu butumwa Minisitiri w’Intebe yabutangaje mu birori by’impurirane, byo kwizihiza ku nshuro ya 16 umunsi wo gushimira abasora ku rwego rw’Igihugu, no kwizihiza Isabukuru y’imyaka 20 Ikigo k’Igihugu k’Imisoro n’Amahoro kimaze gishinzwe.

Dr Ngirente yagize ati “Muri iyi myaka 20 hari ibikorwa byinshi iki kigo cyagezeho, turabyishimira nk’Abanyarwanda, Guverinoma y’u Rwanda irashimira abagize umuryango mugari w’Ikigo k’Imisoro n’Amahoro uruhare babigizemo ndetse n’ubwitange, tukaba tubasaba gukorana uwo murava.”

Yavuze ko ubwo hashyirwagaho iki kigo imisoro n’amahoro byagiye byiyongera. Ati: “Ubwo hashyirwagaho RRA imisoro n’amahoro byakirwa byariyongereye ku buryo bugaragara. Imisoro iri ku isonga mu kugira uruhare runini mu ngengo y’imari y’igihugu cyacu.”

Yasobanuye ko kwihaza no kwigira ku buryo busesuye ari intego igihugu kihaye. Ati “Twihaye intego mu gihugu cyacu, kandi tuzayigeraho mu gihe cya vuba. Ibi bihura n’insanganyamatsiko y’uyu mwaka igira iti “Dusore neza, twubake u Rwanda twifuza.”

Minisitiri w’Intebe yavuze ko Guverinoma y’u Rwanda kandi  ishimira abasora neza akaba ari n’umwanya mwiza wo kwibukiranya akamaro k’imisoro nko kubaka amashuri, amavuriro n’ibindi. Ati: “Amafaranga twinjiza ntarabasha guhaza ibikenewe byose, kubigeraho ni ukwihesha agaciro.”

Abafite umuco wo kudatanga imisoro, Dr Ngirente, avuga ko atari byiza kuko bifatwa nko kunyereza imisoro.

Yizeza ko u Rwanda ruzakomeza gushyiraho amategeko yorohereza abashoramari.

Bimwe mu byagezweho mu myaka 20 ishize

Mu gihe Ikigo, RRA kizihiza imyaka 20 kimaze gikora, cyavuye ku mafaranga kinjije mu isanduku ya Leta miliyari 62.8 mu 1998 ubu kigeze kuri miliyari 1,252.6.

Komiseri Mukuru wa RRA Tusabe Richard avuga ko iki kigo kigitangira cyari gifite ibibazo ariko kugeza ubu bishimira ko abasora basora neza. Ati “Ikigo kigitangira cyari gifite ibibazo by’ubumenyi buke bw’abakozi, abasora batabyumva ariko ubu twishimira ko usora asorera aho ari adakoze urugendo kubera ikoranabuhanga.”

Ibindi byagezweho, Tusabe avuga ko kwigisha no gushishikariza abasora gusora byazamuye amafaranga yinjizwa n’iki kigo, cyane ko abasora bari bafite imyumvire iri hasi ku bijyanye no gusora.

Avuga ko hashyizweho imashini zikoreshwa n’ikoranabuhanga zigaragaza ibyagurishijwe ku munsi, ibyo bigatuma RRA igenzura ibyinjiye. Ashimangira ko ibyagezweho byose RRA yabifashijwemo na Guverinoma ndetse n’izindi nzego.

Mu mwaka wa 2018-2019 hazinjizwa mu isanduka ya Leta miliyari 1,398.2 zivuye mu misoro, avuga kandi ko hazongerwa umubare w’abakoresha imashini za EBM no gukangurira Abanyarwanda ibyiza byo gusora.

Umuyobozi w’Urugaga rw’abikorera Bafakurera Robert  avuga ko mu bufatanye n’urugaga rw’abikorera, PSF ndetse na RRA bakoranye neza hagashyirwaho amategeko anoze. Ubu bufatanye buzatuma ibibazo byabagaho bivaho, ahubwo bagasaba ko hajya hatangazwa amategeko mbere y’uko umwaka w’ingengo y’imari utangira kuko iyo bikozwe gutyo bituma igenamigambi bateguye ritagenda neza.

 

 

 

TANGA IGITEKEREZO

Leave a Reply

Your email address will not be published. Required fields are marked *