21°C , Partly cloudy | Kigali-Rwanda
Inzego zitandukanye zijeje ubufasha abahinzi b'ibirayi (Foto Ngaboyabahizi P)

Guverineri Gatabazi yahumurije abahinzi b’ibirayi bataka ibihombo

Yanditswe na Ngaboyabahizi Protais

Ku ya 01-11-2018 saa 09:44:21

Abayobozi b’uturere tweramo ibirayi mu Ntara y’Amajyaruguru basabwe kugenzura imikorere y’amakoperative agura umusaruro w’ibirayi avugwaho gutsikamira abahinzi.

Guverineri Gatabazi Jean Marie Vianney uyobora iyi ntara yavuze ko abacuruzi n’abamamyi bahenda abahinzi cyangwa umuhinziagatinda kwishyurwa, badashobora kwihanganirwa.

Ni nyuma y’uko abahinzi bagaragaje ko hari abantu bishyiriraho ibiciro uko bashatse, bakunama ku muhinzi w’ibirayi cyangwa bagatwara umusaruro we bagatinda kumwishyura.

Gatabazi yagize ati: “Iki kibazo cyo kuba umuhinzi w’ibirayi yahora ataka igihombo kubera abamamyi bahora bamutsikamira, twe nk’ubuyobozi tugiye kukigira icyacu dufatanyije n’inzego z’ibanze n’abasanzwe bakora mu bucuruzi n’ubuhinzi bw’ibirayi.”

“Ntabwo bikwiye ko umuhinzi amara iminsi itatu atabonye amafaranga ye, kandi yaratanze umusaruro, cyangwa ngo abacuruzi n’abamamyi bamwunameho bamushakamo inyungu iri hejuru, turasaba abayobozi b’uturere guhaguruka bakagenzura imikorere y’amakoperative, abacuruzi, natwe nk’ubuyobozi bw’Intara turahari tugafatanya kurengera inyungu y’umuhinzi.”

Guverineri Gatabazi akomeza avuga ko ubu umuhinzi na we agiye gukomeza gushyiraho ibiciro by’ibirayi hagendeye ku bihe by’ihinga (saisons) ngo kuko burya ibihe bigenda bitandukana mu ishoramari kandi bitewe n’uburyo umuhinzi yagiye atakaza mu gikorwa k’ihinga nk’imbuto n’ibindi.

Inzego zitandukanye zijeje ubufasha abahinzi b’ibirayi (Foto Ngaboyabahizi P)

Umwe mu bahinzi b’ibirayi bo mu Murenge wa Kinigi, Musabyimana Emmanuel, yagize ati: “Ubwo abayobozi bacu batwijeje ko na bo bagiye kubijyamo, bakabigira ibyabo, tugiye kongera gushyira ingufu muri ubu buhinzi ”.

Avuga ko yishimiye kandi uburyo bazajya bishyurwamo. Yagize ati: “Mbere dutangira guha umusaruro amakoperative twari twijejwe ko nta muhinzi uzajya arenza iminsi 3 atarishyurwa, ariko twamaraga n’iminsi igera kuri 5, ariko ubwo Guverineri n’izindi nzego batwijeje ko bigiye gukemuka, tugiye kujya duhinga ibirayi twizeye guhita twishyurwa”.

Umuyobozi w’Akarere ka Burera, Uwambajemariya Florence, na we ashimangira ko koko ubuyobozi bukwiye kuba hafi y’umuhinzi w’ibirayi.

Yagize ati: “Umuyobozi mu nshingano ze akwiye kureberera, kugira inama no kuyobora akenerekera umuturage uburyo akwiye kugira imibereho myiza. Mu bahinzi b’ibirayi rero, n’ubwo twajyaga tubikurikirana twiyemeje kongera imbaraga mu kurwanya abitwikira ijoro bagashyiraho ibiciro bagahombya umuhinzi, ingamba rero ni uguhanahana amakuru binyuze ku makusanyirizo, mu bahinzi ndetse n’abafite inshingano zabo mu bijyanye n’ubuhinzi”.

Ukuriye urwego rw’amakoperative mu ntara y’Amajyaruguru, Ndacyayisenga Jean Damascene, avuga ko nyuma yo kubona ko hari igihombo umuhinzi ahura na cyo babigaragarije inzego bireba ngo ari na yo mpamvu hafashwe ingamba zinyuranye.

Yagize ati: “Ni byo koko umuhinzi w’ibirayi yari afite igihombo nyuma y’igenzura twakoze, amakoperative yigenga nta bwo yitaga kuri gahunda y’imyishyurire umuhinzi akishyurwa nyuma y’amezi asaga 2 kandi yaratanze umusaruro we, ubu rero twafashe ingamba ko tugiye guha amakoperative ingufu kandi tukayaba hafi, buri koperative ikagira umucungamutungo wabyigiye ku rwego rwa kaminuza, tugakora ubugenzuzi buhoraho muri ayo makoperative.”

Ikindi ngo ni uko bakomeza kujya bahanahana amakuru binyuze mu itumanaho. Ati: “Guhana amakuru bizajya bituma turara tumenye uburyo ibiciro by’ibirayi kuri buri site yose icururizwaho ibirayi bihagaze, ikindi ni uko ibirayi bikwiye kujya bigira igiciro hakurikijwe igihembwe k’ihinga”.

Ubuyobozi bwiyemeje gufasha abahinzi b’ibirayo guhangana n’ikibazo k’igihombo bahuraga na byo, bijejwe ko hagiye gushakwa uburyo gahunda y’uko ibiciro byajya bijyana n’igihembwe k’ihinga kandi ntibihindagurike.

TANGA IGITEKEREZO

One Comment on “Guverineri Gatabazi yahumurije abahinzi b’ibirayi bataka ibihombo”

Leave a Reply

Your email address will not be published. Required fields are marked *