22°C , Partly sunny | Kigali-Rwanda

“Gutwerera Afurika ruswa ibaho n’itabaho ni ugupfobya uyu mugabane”

Yanditswe na Mugisha Benigne

Ku ya 10-10-2019 saa 14:07:34
Uwa kabiri uturutse iburyo ni Umuyobozi w’Inama ngishwanama mu kurwanya ruswa mu Muryango w’Afurika Yunze Ubumwe, Begoto Miarom

Umuyobozi w’Inama ngishwanama mu kurwanya ruswa mu Muryango w’Afurika Yunze Ubumwe, Begoto Miarom atangaza ko ruswa atari umwihariko w’Afurika ko no ku yindi migabane ihaba.

Begoto yabibwiye itangazamakuru mu nama ya 3 yahuje  inzego zishinzwe kurwanya ruswa muri Afurika, agaragaza ko abantu batekereza ko ruswa ari umwihariko w’Afurika bibeshya cyane kuko ngo no ku yindi migabane ruswa irahaba.

Yagize ati “Nta mugabane utarangwaho ruswa, nta gihugu kitabamo ruswa, no ku yindi migabane ruswa irahari. Ntibivuze ko Afurika itarimo ruswa, mvuze ko ruswa atari umwihariko w’Afurika ahubwo no iboneka no ku yindi migabane y’Isi.”

Begoto ashingiye ku mateka y’ibihugu, asanga hari ibihugu byo muri Afurika bigerageza kurwanya ruswa kurusha bimwe mu bihugu byo mu Burengerazuba bw’Isi.

Aha yatanze urugero rw’u Rwanda na Botswana bihagaze neza mu kurwanya ruswa kurusha ibihugu by’u Burayi nk’igihugu cy’u Butaliyani n’u Bugiriki, nk’uko bigaragazwa  na raporo y’Umuryango w’ubutwererane n’iterambere ry’ubukungu (OCDE).

Begoto asanga gutwerera Umugane w’Afurika ruswa yose ibaho n’itabaho byaba ari ugupfobya uyu mugabane kuko nta mugabane warazwe ruswa ndetse nta n’igihugu kitabamo ruswa, gusa nyine ruswa zirarutana ariko hose wazisangayo.

Avuga ko amafaranga atari make anyerezwa muri Afurika abitse muri za banki z’amahanga nka banki zo mu gihugu cy’u Busuwisi ngo kandi ibi birazwi, igisigaye ni ugushyira imbaraga hamwe nk’Abanyafrika kugira ngo agaruzwe kuko ari umutungo bwite w’Afurika wibwe na bamwe mu bakozi b’inzego zinyuranye z’ibihugu.

Begoto ashima cyane u Rwanda kuko imibare ya OCDE igaragaza ko iki gihugu gishyira imbaraga mu kurwanya ruswa no guhashya abayihana kuko cyashyizeho ingamba zinyuranye zo kuyikumira no kuyirwanya bihereye mu bayobozi, mu baturage no mu nzego zose z’ubuzima bw’igihugu.

Avuga ko ibihugu by’u Rwanda na Botswana ari ibihugu birangwamo ruswa nkeya kandi biri ku mugabane w’Afurika kurusha igihugu cy’u Butaliyani n’icy’u Bugiriki byitwa ko biri ku mugabane w’u Burayi.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.