21°C , Partly cloudy | Kigali-Rwanda
Ntawangundi Dominique, umutoza w'ikipe ya Gisagara VC

Gutwara irushanwa ribanziriza shampiyona byaduhaye ikizere – Ntawangundi

Yanditswe na Nkomeje Guillaume

Ku ya 08-11-2018 saa 16:23:52

Ikipe ya Gisagara VC ni yo yegukanye igikombe k’irushanwa ribanziriza shampiyona “Gisagara Pre-season Tournament 2018” itsinze REG VC ku mukino wa nyuma amaseti 3-2, irushanwa ryabereye i Gisagara kuva tariki 03-04 Ugushyingo 2018.

Aganira n’Imvaho Nshya, Ntawangundi Dominique, umutoza wa Gisagara VC yavuze babyishimiye kandi byabahaye ikizere ko bazitwara neza muri shampiyona.

Ntawangundi uri gutoza umwaka we wa mbere muri Gisagara VC aho yayigiyemo asimbuye Nyirimana Fidele werekeje muri UTB VC, yagaragaje ko icyabafashije kwegukana igikombe ari imyiteguro myiza bagize ndetse no gushyigikirwa n’abafana batari bake.

Uyu mutoza avuga ko gutwara iki gikombe byongeye kubagarurira ikizere cy’uko bashoboye nyuma yo kubura bamwe mu bakinnyi iyi kipe yari isanzwe igenderaho banayifashije kwitwara neza mu mwaka ushize w’imikino.

Yagize ati “Nyuma kubura Mukunzi Christophe, Sibomana Placide, Murangwa Nelson, Yvan Ongom nta bwo ikizere cyo kugaruka mu makipe akomeye cyari gihari ibi rero byatweretse ko ikipe igikomeye kandi abafatanyabikorwa n’abaterankunga bacu babyishimiye”.

Ntawangundi Dominique, umutoza w’ikipe ya Gisagara VC

Gusa umutoza wa Gisagara VC wanatoje Kirehe VC yemeza ko hakiri byinshi byo gukosora, kongeramo imbaraga no gukora cyane kugira ngo abakinnyi be haba abashya n’abasanzwe bamenyerane bityo ikipe ibe iri ku rwego rwiza.

Mu bakinnyi bashya muri Gisagara VC barimo Dusengimana Wilcriff, Akumuntu Kavalo Patrick, Ben Nakavoua ukomoka muri Congo Brazzaville na Adamou Djibril ukomoka muri Niger.

Gisagara VC inafite igikombe cya shampiyona y’umwaka w’imikino ushize wa 2017-2018, izatangira iy’uyu mwaka w’imikino wa 2018-2019, ihura na IPRC East (14h00), mu mukino uzabera kuri Sitade Nto i Remera ejo ku wa Gatandatu tariki 10 Ugushyingo 2018.

TANGA IGITEKEREZO

Leave a Reply

Your email address will not be published. Required fields are marked *