20°C , Partly cloudy | Kigali-Rwanda

Gutanga imbabazi no kuzisaba ni ryo banga ry’amahoro- Padiri Ubald

Yanditswe na MUKAGAHIZI ROSE

Ku ya 17-04-2018 saa 07:17:18

Padiri Ubald Rugirangoga uzwi mu masengesho yo gukoreshwa n’Imana mu gukiza indwara z’umubiri n’umutima yigishije ku gusabana imbabazi haba ku wahemutse ndetse n’uwahemukiwe mu gihe cya Jenoside yakorewe Abatutsi kuko asanga gutanga imbabazi no kuzisaba ari ryo banga ry’amahoro.

Ibi yabivuze mu isengesho ryo gukiza abarwayi no gukira ibikomere, ndetse no gusabira abazize Jenoside yakorewe Abatutsi mu 1994, ryateguwe na Paruwasi ya Regina Pacis ku bufatanye na Minisiteri y’Umuco na Siporo, ryabaye ku cyumwe tariki ya 15 Mata 2018, kuri Stade Amahoro i Remera.

Padiri Ubald Rugirangoga atambagiza isakaramentu (Foto Mukagahizi R.)

Padiri Ubald yavuze ko abasabye imbabazi n’abazihawe byabahaye amahoro. Yagize ati “Guhungabana ni ikibazo cy’uko hari ibintu bigipfunditse mu mutima, yabuze abantu bamufasha, ihungabana rikizwa n’ikemezo dufata cyo gutanga imbabazi no gusaba imbabazi.

Yezu Kirisitu ni we udukiza ibikomere iyo tumurangamiye. Ni we uduha imbaraga zo gutanga imbabazi kuko iyo tumurebye ku musaraba ari gusamba na we yishatsemo imbaraga ababarira abamwishe. Abakirisitu  mufite urufunguzo rwo gukiza ibikomere by’ababakoreye nabi, turakeneranye twese”.

Yungamo ati “Urufunguzo rufitwe na we warokotse Jenoside igihe ubwiye uwakwiciye ngo nguhaye imbabazi, mwishakemo imbaraga, murangamire Yezu Kirisitu ukuntu ku musaraba yababariye. Twese turakeneranye mu bikomere byacu, abagize uruhare muri Jenoside bafite ibyabo natwe dufite ibyacu.”

Padiri Ubald yibutsa Abantu ko Imana yabagiriye neza kuko hari bamwe baba bavuga ngo nta cyo Imana yabakoreye, ngo Imana yarabatereranye. Yabibukije ko Imana yabakoreye ibintu byinshi nuko barangaye.

Yagize ati “Imana yakugiriye neza ni yo igusaba noneho kubabarira. Kubabarira ni ikintu gikomeye cyane, ariko iyo ubonye ko Imana yakugiriye neza, uwakugiriye neza nta kintu yagusaba ngo ukimwime, kubabarira ku neza yawe, urababarira, ugakira, ugakiza n’uwo ubabariye, urwo rugi rujyana n’urwo gusaba imbabazi.

Niba uzi ko hari uwo wagiriye nabi, si ibi bijyanye na Jenoside yakorewe Abatutsi gusa, ahubwo mu buzima bwawe bwose kuva uri umwana kugeza magingo aya, ni ngombwa gufata ikemezo cyo kujya gusaba imbabazi uwo wagiriye nabi wese kugeza no ku cyaha cya Jenoside”.

Uyu mupadiri asaba Abakrisito kubohoka kuri Sekibi y’urwango, umujinya, gahunda yo gushaka kwihorera, yo kunangira umutima, yo kudasaba imbabazi, yo kudatanga imbabazi, n’ibindi.

Yagize ati “Nange ibyo mbasaba narabikoze. Abakirisitu tugomba gusa  nka Yezu. Niba mushaka gukira ngo muve mu kinyoma, ugomba gusaba imbabazi nta buryarya, imbabazi ziherekezwe n’impuhwe, ugomba gutanga imbabazi abikore nta buryarya, imbabazi atanze ziherekezwe n’impuhwe, ubu tumeze nk’abantu bari guhira mu nzu ariko iyo nzu irafunguye, tekereza umuntu urimo guhira mu nzu kandi ifunguye”.

Kubabarira bikiza ibikomere

Padiri Ubald avuga ko ibikomere by’uwakoze nabi bikizwa na Yezu Kirisitu, yifashishije uwo yagiriye nabi igihe afashe ikemezo cyo kumusaba imbabazi, ibikomere by’uwagiriwe nabi bikizwa na Yezu Kirisitu yifashishije igihe asabwe imbabazi  bityo akazitanga.

Padiri Ubald avuga ko nta wifuza kubana n’igikomere, kuko iyo  igikomere  gifashe bamwe baracumbagira, abandi kikabica.

Yagize ati “Uko umubiri rero ukomereka, ni ko n’umutima ukomereka, Jenoside yaradukomerekeje twese. Iyi Jenoside yagaragaje urwango rudasanzwe ku buryo wagira ngo Abanyarwanda ntitwigeze twigisha ivanjili. Abakirisitu b’Abanyarwanda turakomeretse kuko wasangaga  abantu basengana umwe yica undi.

Ubundi nta mukirisitu wagombye kwica. Hari ukuntu njya ntera amahane n’abantu bavuga ngo Abakirisitu baricanye. Nta mukirisitu wishe umuntu, ahubwo abantu bishwe n’abantu babatijwe batigeze baba Abakirisitu. Ni ababatijwe badashaka guhinduka”.

Ibikomere biri ukwinshi

Padiri Ubald avuga ko hari ibikomere bituruka mu byo abantu babonye  mu gihe cya Jenoside, ibikomere bituruka ku byo bakorewe, ibikomere bituruka ku byo bakoze mu ri iki gihe, n’ibikomere bituruka ku byo abantu  bumvise kandi ngo  ibikomere iyo bigaragaye umuntu aba akize.

Yagize ati “Hari abakoze Jenoside bafite ibyo bakoze bibakomerekeje ariko kandi hari n’abatarakoze Jenoside bakomerekejwe nuko batagize icyo bakorera inshuti zabo, bagize ubwoba bwo kubahisha bafite inkomanga ku mutima.

Uwakoze Jenoside ni we ntangiriro cyane cyane kuko ni na we nyirabayazana amaze kumara abantu yabonye Isi yose yamaganye Jenoside arahungabana asigara avuga ngo ibi ni nge ubikoze, arebye amatongo, yibutse abantu babanaga, Isi iri kumwamagana ni cyo gituma byafashe igihe n’ubu ngubu baracyarwana n’umutima wabo banga kwemera ibyaha byabo bakanga kwemera ibyaha nubwo ari hahandi inkomanga iguma ku mitima yabo.”

Avuga ko   hari urugendo rukorwa n’uwo muntu ngo Yezu amukize ibyo yemere icyaha ke Yezu amugirire imbabazi.  Uyu mupadiri kandi avuga ko uwakorewe Jenoside na we ngo yarikanze nyuma yo kurokoka  akibaza ngo ibi kuki mbikorewe. Ni muri urwo rwego avuga ko aba bose bafite imfunguzo zo gukizanya ibikomere.

Ni ku nshuro ya gatatu muri Paruwasi Regina Pacis ya Remera mu Mujyi wa Kigali bibutse Abatutsi bazize Jenoside, basabira igihugu kandi Imana yakoze ibitangaza muri iryo sengesho kuko hari abatanze ubuhamya ko bakize  ibikomere byo ku mutima ndetse hari n’abatanze ubuhamya ko bakize indwara z’umubiri.

 

TANGA IGITEKEREZO

Leave a Reply

Be the First to Comment!

avatar