17°C , Partly cloudy | Kigali-Rwanda

Gutanga amaraso ni ugutanga ubuzima – Dr. Ndimubanzi

Yanditswe na Mutungirehe Samuel

Ku ya 14-06-2019 saa 15:58:41
Umunyamabanga wa Leta ushinzwe ubuvuzi rusange, muri Minisiteri y'Ubuzima, Dr. Ndimubanzi Patrick, asanzwe ari umwe mu bayobozi bakuru b'igihugu batanga amaraso ku buntu (Foto RBC)

Umunyamabanga wa Leta muri Minisiteri y’Ubuzima ushinzwe ubuzima rusange, Dr. Ndimubanzi Patrick, yatangaje ko abanyarwanda bakwiye kurushaho kugira umutima wo gutanga amaraso kuko ari impano ikomeye, yo gutanga ubuzima umuntu wese yakorera undi ku bushake.

Yabitangaje kuwa 14 Kamena 2019, ubwo u Rwanda rwakiraga ku nshuro ya mbere umunsi muzamahanga w’abatanga amaraso, ikaba n’inshuro ya kabiri nyuma y’imyaka 15 uwo munsi ubereye ku mugabane w’Afurika.

Ni umunsi waranzwe no gushima cyane abanyarwanda, abanyamahanga, abakora mu nzego za Leta n’iz’abikorera no mu miryango mpuzamahanga ikorera mu Rwanda batanga amaraso ku bushake buri gihe, barimo abarengeje inshuro 100 batanga amaraso kandi nta kibazo bahuye na cyo.

Dr. Ndimubanzi yavuze ko gutanga amaraso ari ikintu gito ku muntu ugikoze ariko kigakora impinduka z’ibitangaza ku buzima bw’uyahawe.

Ati “Gutanga amaraso ni impano y’ubuzima. Ni ubufasha buto ku bantu bayatanze ariko bufite impinduka z’ibitangaza ku bayahabwa. Nabibonye bwa mbere ubwo nageraga mu bitaro by’abana aho utanga amaraso make ukabona umuntu yongeye kugaruka mu buzima.”

Yakomeje avuga ko gutanga amaraso ari bumwe mu buryo bwo kuvura bukoreshwa kwa muganga kandi byatumye u Rwanda rugera ku ntego ikomeye yo kubungabuga ubuzima bw’abana.

Dr. Ndimubanzi yavuze ko mu ntumbero z’u Rwanda mu kuzamura serivisi z’ubuzima, Guverinoma yiyemeje kunoza serivisi zo gutanga amaraso mazima binyuze mu buryo bwo kuyakusanya ku bayatanga.

U Rwanda ruri gushyiraho gahunda yo kugira ngo abantu batanga amaraso 100% bakomeze kuyatanga no gukomeza gushyiraho gahunda yo gushishikariza abandi batanga amaraso ku buntu, hakaba guteza imbere ubufatanye hagati ya gahunda yo gukusanya amaraso n’abafatanyabikorwa bayo baba abo mu bigo byigenga, imiryango n’itangazamakuru n’abandi.

Umwe mu banyarwanda bamaze gutanga amaraso igihe kirekire, Rwagasore Majorite Jean de Dieu, inshuro 87, yavuze ko yatangiye ari umunyeshuri ukuriye abandi mu muryango utabara imbabare Croix-Rouge, afite imyaka 17 ariko kugeza n’ubu yishimira kugira ubuzima bw’umuntu akiza binyuze mu gutanga amaraso. Ati “Uko bwije uko bukeye, sindabona umunsi nzahagarara gutanga amaraso.”

Umunyamerika ufite inkomoko muri Nepal, Mainnal Arjun, wujurije mu Rwanda inshuro ya 171 atanga amaraso, yavuze ko yatangiye guhera ku myaka ye 19, ubwo yasomaga igitabo ku bijyanye n’akamaro ko gutanga amaraso akaba amaze gufasha abantu 514 babonye amaraso ku bwe.

Ashimwe Christine, Umunyarwandakazi wigeze guhura n’ibibazo bitanu bituma ahabwa amaraso, yavuze ko mu 2015 yabanje kugira ikibazo cyo kuvura kw’amaraso, agiye kwa muganga bamuha imiti, bimuviramo kugira amaraso y’amazi bituma ava amaraso ahari umwenge hose ku mubiri, biba ngombwa ko bamwongerera amaraso ari nabwo yabyaraga umwana we wa gatatu akaba bose ari kubarera neza kubera guhabwa andi mahirwe yo kubaho.

Dr. Dora Mbanya, Umuyobozi mukuru w’Ikigo nyafurika cyo gutanga amaraso gifite ikicaro mu Rwanda (AfSBT), yavuze ko mu bihugu byinshi usanga umuco wo gutanga amaraso ukiri hasi kubera imbaraga nke za guverinoma zishyira mu bukangurambaga bwo butanga amaraso ku buntu kandi hakiri indwara zihitana abantu bitewe no kubura amaraso cyane mu bihugu bikennye n’ibiri mu nzira y’Amajyambere nk’ibyo ku mugabane w’Afurika yo munsi y’ubutayu bwa Sahara.

Muri uyu munsi mpuzamahanga w’abatanga amaraso (World blood donor day) Igihugu cy’u Butaliyani cyahawe ikimenyetso cyo kuzakira umunsi mpuzamahanga utaha mu 2020 w’abatanga amaraso.

Umunyamabanga wa Leta ushinzwe ubuvuzi rusange, muri Minisiteri y’Ubuzima, Dr. Ndimubanzi Patrick, asanzwe ari umwe mu bayobozi bakuru b’igihugu batanga amaraso ku buntu (Foto RBC)

TANGA IGITEKEREZO

Leave a Reply

Your email address will not be published. Required fields are marked *