18°C , Mostly cloudy | Kigali-Rwanda

Gusoma no kwandika bikwiye kuba inshingano ya buri wese – Dr. Munyakazi

Yanditswe na Mugisha Benigne

Ku ya 14-09-2019 saa 16:29:56
Aha abana barimo gusoma ibitabo, aho ababyeyi bashishikarizwa kujya babafasha muri urwo rugendo

Mu gihe u Rwanda rukizihiza ukwezi kwahariwe gusoma no kwandika, Abanyarwanda barahamagarirwa kubyitaho no kubitoza abana, mu mashuri no mu rugo.

Ibi ni ibitangazwa n’Umunyamabanga wa Leta muri Ministeri y’Uburezi ushinzwe amashuri y’inshuke, abanza n’ayisumbuye, Dr. Munyakazi Issac, muri uku kwezi kwahariwe gusoma no kwandika kuzasoza tariki ya 30 Nzeri 2019.

Agira ati “Buri mwaka u Rwanda rwifatanya n’Isi yose kwizihiza umunsi mpuzamahanga wahariwe gusoma no kwandika, tariki ya 08 Nzeri 2019, uyu mwaka insanganyamatsiko mpuzamahanga igira iti ‘Kumenya gusoma no kwandika no Kumenya indimi nyinshi’ naho insanganyamatsiko y’u Rwanda ni ‘Kumenya gusoma no kwandika mu ndimi zitandukanye ni isoko y’ubumenyi.”

Dr. Munyakazi yagize icyo avuga ku banditsi b’ibitabo, avuga ko ntawavuga gusoma no kwandika ngo yibagirwe abanditsi b’ibitabo kuko bagira uruhare mu kuzamura umuco wo gusoma no kwandika.

Ati “Ndashishikariza abanditsi bari hano gukomereza aho kuko ibihangano byabo bizagirira akamaro abazavuka mu bihe biri imbere.

Avuga kandi ko igikorwa cyose gituma abana bamenya gusoma no kwandika ari ingenzi cyane mu iterambere ryabo mu gihe kizaza, ku bwe ngo ibi ntibyagerwaho hatabayeho uruhare rw’ababyeyi n’abandi bireba kugira ngo uyu muco wo gusoma no kwandika ugere kuri bose.

Ashimangira ko ababyeyi ari bo bafatanyabikorwa ba mbere muri uru rugendo, iyo bashoboye gusomera abana babo. Yemeza ko bataba bari kubafasha kumva umwandiko gusa, ahubwo baba barushaho kubakundisha gusoma.

Ati “Iyo abana batojwe gukunda gusoma rero, bahitamo kujya bisomera ubwabo hanyuma bazavamo abasomyi beza kandi baba abahanga mu ishuri babikesha ababyeyi babatoje umuco wo gusoma no kwandika.”

Dr. Munyakazi yasabye ababyeyi ubufasha ku bana babo kuko gusoma no kwandika ari isoko y’ubumenyi.

Ati “Babyeyi, barimu namwe bayobozi, mureke duteze imbere uno muco duhereye ku bakiri bato maze abazavuka nyuma bazabashe kugera kuri byinshi mu iterambere twifuza.”

Umunyamabanga wa Leta ushinzwe Amashuri Abanza n’Ayisumbuye akomeza ashimangira by’umwihariko uruhare rw’ababyeyi, avuga ko uyu muco utagira imipaka, ko waba muto cyangwa mukuru, asaba imiryango kwimakaza uyu muco kugira ngo babishishikarize n’abana barera, aboneraho n’umwanya wo gusaba ababyeyi kugura ibitabo bakajya basomera imivugo abana babo, hanyuma hakabasaba gukora inshamake y’ibyo bumvise.

Dr. Munyakazi kandi akomeza avuga ko guteza imbere umuco wo gusoma no kwandika biri mu ntego igihugu kihaye kandi biri no mu ntego zigamije Iterambere rirambye cyane cyane hibandwa ku ireme ry’uburezi.

Yemeza ko kumenya gusoma no kwandika ari imwe mu nkingi mwikorezi mu iterambere rirambye kandi byafasha mu guhindura imibereho y’abaturage.

Avuga ko Ubushakashatsi bwagaragaje ko ubukungu cyangwa iterambere rya buri gihugu rishingiye ku kugira abaturage bajijutse, ngo ibi byagerwaho ari uko abana b’u Rwanda mu mashuri bafashwa gusoma no kwandika.

Dr. Munyakazi Isaac yakomeje avuga ko u Rwanda ruri gukora ibishoboka byose kugira ngo rugire imbaraga mu Isi y’ubucuruzi no mu bukungu bushingiye ku bumenyi, ko imwe mu ngamba zatuma bigerwaho ari ukugira abaturage bafite inyota yo gusoma no kwandika.

Ati “Gushishikaza umwana kandi ni ingenzi mu kwiga cyangwa gukurikira no kuguma mu gikorwa cyangwa imyitwarire runaka. Gushishikariza umwana ikintu ni byo bimutegura bikanamugeza ku cyo yifuza kandi ni yo nkingi ya mwamba mu myigire.”

Turizera kandi ko nidukomeza gushimangira umuco wo gusoma no kwandika umusaruro uzigaragaza mu byo tugenda tugeraho ku rwego rwisumbuye, kuzamura imyigire y’abana mu mashuri ndetse n’igabanuka ry’abana bata ishuri mu mashuri abanza n’ayisumbuye.

Byaragaragaye ko kumenya ururirmi ari ingenzi kurusha uko umuntu abasha kuvuga. Mu by’ukuri ni ingenzi cyane bitewe n’uko ururimi ari kimwe mu bigize umuco nyarwanda.

Minisitiri w’Umuco na Siporo, Nyirasafari Esperence, avuga ko ururimi by’umwihariko Ikinyarwanda rugomba kwitabwaho cyane.

Agira ati “N’ubwo muri uku kwezi dukomeje kuzirikana ku umunsi mpuzamahanga wahariwe gusoma no kwandika kandi tugashishikarizwa gukoresha indimi zose, dukwiye kugira n’umwihariko wo gukoresha Ikinyarwanda neza kuko kiri mu bigize umuco wacu.”

Ku bijyanye no gusoma no kwandika, umushakakashatsi w’Umudage Charlemagne avuga ko ari ngombwa ko umwana amenya ururimi rw’ababyeyi, nyuma akamenya iz’amahanga kuko ngo kumenya ururimi rwa kabiri ari nko kugira indi roho ya kabiri. Ashimangira ko akamaro ko kumenya gukoresha indimi nyinshi ari ngombwa mu iterambere ry’abatuye Isi.

Yagize ati “Gusoma no kwandika bigufasha kwimenya wowe ubwawe; igitabo cyose usomye kikwinjiza mu rundi rwego rw’imitekerereze. Iyo usoma igitabo, hari ukuntu uhuza ubuzima bwawe bwite n’ibivugwa mu nkuru, amarangamutima, ibyo wanyuzemo ndetse n’abavugwa mu nkuru. Ibi nta bwo bituma uguma wiziritse ku byo mu gitabo gusa ahubwo bituma unamenya uburyo wakwitwara uramutse ugeze mu bihe bimeze nk’ibivugwa mu gitabo niba bitari byakubaho.”

Charlemagne avuga ko iyi ari yo mpamvu mu mwaka wa 2012 Minisiteri y’Uburezi mu Rwanda yatangije umushinga witwa “Soma Rwanda” ku bufatanye na USAID mu rwego rwo guteza imbere umuco wo gusoma mu bato n’abakuru, ibinyujije mu Kigo Gishinzwe Guteza Imbere Uburezi (REB), aho uwo mushinga umaze imyaka irindwi.

Iyo nzobere mu bijyanye no gusoma no kwandika ivuga ko muri iki kinyejana cya 21 bikunze kuvugwa ko ik’ingenzi mu gitabo ari ubutumwa gitanga, ariko ngo icyo abantu benshi batazi ni uko gusakaza ubwo butumwa, kubusesengura no kubwamamaza ari ingenzi kurushaho.

Ati “Mu gihe ubu urubuga rwo kwandika ibitabo rwafungutse mu buryo bushya kandi bwiza, byaragaragaye ko hanakenewe umwanditsi w’umuhanga uzwi wo kuyobora abandi banditsi igihe bandika, bakwirakwiza cyangwa bamamaza ibitabo byabo.”

Ukwezi kwahariwe gusoma no kwandika kuzasorezwa mu Karere ka Nyagatare tariki 30 Nzeri 2019 mu muganda wo gusoma no kwandika, aho ababyeyi bazaba bakora umuganda naho abana basoma.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.