Gushyira abarimu mu myanya biri kugera ku musozo-REB

Yanditswe na NYIRANEZA JUDITH

Ku ya 13-01-2021 saa 08:42:34
Umuyobozi Mukuru w'Agateganyo wa REB, Dr. Sebaganwa Alphonse ( foto Igihe-ububiko)

Ubuyobozi bw’Ikigo cy’Igihugu gishinzwe guteza imbere Uburezi (REB) buratangaza ko igikorwa cyo gushyira abarimu mu myanya kirimo gusatira umusozo, cyane ko umubare munini w’abarimu bari bakenewe bamaze gushyirwa mu myanya. Bivugwa ko mu byiciro bitatu by’abamaze gushyirwa mu myanya bigizwe n’abarimu  24,600. 

Umuyobozi Mukuru w’Agateganyo wa REB, Dr. Sebaganwa Alphonse mu kiganiro na RBA yagize ati: “Urugendo rwo gushyira abarimu mu myanya ruri kugera ku musozo. Mu cyiciro cya mbere n’icya kabiri abarimu 7,600 bashyizwe mu myanya.”

Ikindi kandi ni uko mu cyiciro cya gatatu kirimo abatanze indangamanota (transcripts), abarimu 17000 bashyizwe mu myanya.

Umuyobozi w’Ishami rishinzwe abarimu muri REB Bwana Nsengiyumva Jean Damascene, yatangaje ko mu gushyira abarimu mu myanya hitawe cyane ku bize uburezi, bahawe amahirwe arenze ay’abandi.

Yagize ati: “Mu gikorwa cyo gushyira abarimu mu myanya abantu bize uburezi ni bo bahawe amahirwe arenze ay’abandi.”

Kuba hari abarimu bashyizwe mu myanya batarize uburezi, bahawe igihe cyo kuba bize uburezi nk’uko byatangajwe na Dr. Sebaganwa Alphonse, Umuyobozi Mukuru w’agateganyo wa REB.

Yagize ati: “Abarimu bashyizwe mu kazi kandi batarize uburezi, bagomba kwiga uburezi mu gihe cy’imyaka ibiri ariko ayo masomo y’uburezi bazayiga bari mu kazi.”

Yongeyeho ko yaba abakoze ibizamini yaba abatanze indangamanota (transcripts), bashyizwe mu mwanya hagendewe ku manota bafite ndetse n’imyanya yatanzwe n’uturere.

Ishyirwa mu myanya ry’abarimu kandi riracyakomeza kuko hakiri imyanya itarashyirwamo abarezi. Umuyobozi w’Ishami rishinzwe abarimu muri REB, Nsengiyumva Jean Damascene yavuze ko nyuma y’ishyirwa mu myanya ry’icyiciro cya gatatu hakiri indi myanya 2000 nayo igomba guhabwa abarimu vuba.

Umuyobozi Mukuru w’Agateganyo wa REB, Dr. Sebaganwa Alphonse we ku ngingo yo gushyira abarimu mu myanya yavuze ko bagomba kuba bageze u kazi bitarenze tariki ya 18 Mutarama. Ati: “Aba barimu bose twashyize mu myanya bagomba kuba bahawe amabaruwa abashyira mu kazi bitarenze ku wa Mbere tariki ya 18 Mutarama 2021.”

Umwanditsi:

NYIRANEZA JUDITH

One Comment on “Gushyira abarimu mu myanya biri kugera ku musozo-REB”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.