17°C , Partly cloudy | Kigali-Rwanda

Gushyira abarezi mu myanya byavanywe mu nshingano z’uturere

Yanditswe na Mugisha Benigne

Ku ya 10-04-2019 saa 14:30:29
Dr. Ndayambaje Irenee, Umyobozi mukuru wa REB

Umuyobozi Mukuru w’Ikigo k’igihugu cy’uburezi (REB), Dr. Ndayambaje Irenée atangaza ko gushyira abarezi mu myanya no gutanga ibizamini ku basabye akazi bigiye kuvanwa mu nshingano z’uturere bishyirwe mu nshingano za REB.

Yavuze ko ubusanzwe uturere ari two twashyiraga abarezi mu myanya, tugakoresha ibizamini, ababitsinze akaba ari bo REB iherwa urutonde, nayo igafatanya na Minisiteri y’Imari n’Igenamigambi ndetse na Minisiteri y’Abakozi ba Leta n’Umurimo mu gushyirwa mu bakozi ba Leta no gutegura imishahara yabo.

Avuga ko hagiye kujyaho ishami rishinzwe imicungire y’abarimu (Teacher Management) rizafasha mu gukoresha ibizamini by’abarezi, kubashyira mu myanya kuko bidakwiye ko umukwe arambagirizwa umugeni.

Ati “Gushyira abarimu mu myanya byakorwaga n’uturere, ariko ubu bigiye kujya bikorwa n’Ikigo k’Igihugu cy’uburezi. Byasaga nko kuturambagiriza abageni,ishami rishinzwe imicungire y’abarimu rizafasha mu mwitozo wo gushyira abarimu mu myanya ku bufatanye bw’inzego.”

Yatanze urugero rw’uko umwarimu yashoboraga gukora ibizamini ahantu habiri, yahatsindira hose, agahitamo aho ashaka. Ni mu gihe buri karere yakoreyemo kabaga kamubara nk’umwarimu mushya kabonye.

Ati “Nk’urugero umwarimu umwe ashobora gukora ikizamini mu Karere ka Gatsibo agakora ikindi mu Karere ka Rwamagana mu rwego rwo gushakisha akazi, yagira amahirwe akahatsindira hose, agahitamo gukora mu Karere ka Gatsibo mu gihe Akarere ka Rwamagana nako kamufite ku rutonde rw’abarimu bagomba gutangira akazi bikarangira kamubuze.”

Dr. Ndayambaje avuga ko inzego zinyuranye zirimo Minisiteri y’Uburezi, Minisiteri y’Abakozi ba Leta n’Umurimo binyuze mu Komisiyo y’abakozi ba Leta ari zo zizajya zikora ibyo guha abarimu akazi no kurambagiza abarimu bashoboye.

Umuyobozi Mukuru wa REB avuga kandi ko iyo umwarimu yagendaga byagoranaga kubona umusimbura kuko byafataga igihe kinini umusimbura ataraboneka bikadindiza abanyeshuri kuko hazagamo icyuho.

Ati “Kuri ubu bizadufasha kugira urutonde rw’abarimu batsindiye kwigisha amasomo anyuranye, aho ni ho tuzajya tuvana abarezi basimbura abandi cyangwa abarezi bakenewe kongerwa mu myanya.”

Yemeza kandi ko hagiye gutangira gufatirwa imyanzuro abarezi batitwara neza cyangwa badatanga umusaruro, aho ubu buryo buzakoreshwa mu gushimira abakora neza no gukurikirana abadatanga umusaruro n’abatitwara neza.

Yagarutse ku ruhare runini umurezi agira mu kurera no kurema umunyagihugu mwiza, akaba agomba gufashwa mu kubona ibyo yifashisha mu kazi ke.

Aha Dr. Ndayambaje yagarutse ku bitabo bigomba kwegerezwa abarezi ngo babashe kwigisha neza, gusuzuma imibereho ye, abarimu bakaba barazamuriwe imishahara batangiye guhabwa mu mpera z’ukwezi kwa Werurwe.

Bamwe mu nararibonye mu burezi basanga iyi gahunda igiye gushyirwaho ari nziza cyane kuko izakemura ikibazo cy’amarangamatima yabaga mu gushyira abarimu mu myanya no kubakoresha ibizamini by’akazi.

Karinganire Valens ni umwarimu w’inararibonye mu burezi uri mu kirihuko k’izabukuru, avuga ko iyi gahunda ishyizweho ayishimye cyane kuko ijya gusa n’uko byakorwaga kera.

Avuga ko mu gihe cyabo umwarimu wasozaga amashuri yashyirwaga ku rutonde rw’abarangije, maze Minisiteri y’Uburezi ikabashyira mu myanya nta kindi gishingiweho uretse urwo rutonde.

Avuga ko aho bitandukaniye n’iki gihe ari uko umwarimu azajya ahabwa ikizamini yagitsinda akazabona gushyirwa ku rutonde rw’abatsinze ari na rwo ruzajya rwifashishwa mu gushyira abarimu mu myanya.

Yemeza ko ubu buryo budashobora kubamo amarangamutima ayo ari yo yose kimwe n’uko byakorwaga mu turere.

Kamunazi Marigarita na we ni umwarimu uri mu kiruhuko k’izabukuru, avuga ko yakoze uburezi imyaka 45, yemeza ko gushyira abarimu mu myanya byakorwaga n’uturere byazagamo amarangamutima kuko abantu akenshi babaga baziranye, hakagaragaramo amarangamutima.

Yemeza ko ubu buryo bugiye gukoreshwa ari bwo bwiza kuko buzatuma abashyirwa mu myanya baba bujuje ibisabwa kandi bagashyirwamo nta yandi marangamutima.

Dr. Ndayambaje Irenee, Umyobozi mukuru wa REB

TANGA IGITEKEREZO

10 Comments on “Gushyira abarezi mu myanya byavanywe mu nshingano z’uturere”

  1. Murakoze cyane, ntekereza ko iyo bikozwe gutya muba mwadutekerereje neza. Kugira ngo umushomeri uturuka mu Karere ka Nyagatare abashe gukurikirana iby’akazi mu Karere ka Rusizi cyangwa n’ahandi kure ntago byabaga byoroshye, uru ni urugero natangaga. Ibi mukoze rero ni byiza cyane twajyaga twibaza icyo muhora abize uburezi bikatuyobera kuko ahandi wasangaga MIFOTRA yarabashyiriyeho buryo bw’ikoranabuhanga bwo gupostula umuntu atiriwe akorwa n’amatike yo kwirirwa yirukanka mu Turere n’amadocs. Ntekereza ko Umuntu azajya adepoza rimwe Gusa mu mwana kandi agakora ikizamini rimwe Gusa akaba arangizanyije n’uturere rwose.

  2. Ibi bintu nibyiza kabisa ndabyifuza, ndetse byaba byiza bitangiranye n’imyanya ikeneye abarimu uyumunsi. Kuko imikorere y’uturere nka Musanze na Rwamagana ndetse nutundi ntarasobanukirwa neza imikorere yatwo yaringeze mumuhogo

  3. Nibyiza ariko ni ukubyigana ubushishishozi kuko umukoresha wa mbere ariwe akarere nawe ashobora guhura nimbogamizi mu micungire y’abarezi kimwe no kwitana ba mwana bitewe n’umusaruro mucye aho akarere kazavuga ko kahawe abadashoboye. Ikindi ntaho amarangamutima ataba, ntitwavuga ko uturere tutabikoraga neza. Imbogamizi Nini izagaragaramo ni imicungire ya mwalimu aho akarere katazabiha umwanya uhagije bitewe nuko inshingano zashubijwe REB. No decentralization (twavuga ko uburezi bugiye kuba ubwa REB hanyuma uruhare rw’Akarere rugasubira inyuma). Icyo nibaza, ese ni umwanzuro waganiriweho ninzego bireba babyemerenywaho, ndavuga MINALOC, MINEDUC na MIFOTRA cyangwa ni icyemezo cya REB.

  4. Bikozwe no mu nzego z’ibanze (akarere) maze MINALOC ikajya ihinduranya abakozi b’uturere by’aba byiza kuko njyanama yitwa ko ibakurikirana isa ntidakora byongeye Komite Nyobozi yo isa niba itegetwe gukorana nabo kuko iyo yihaye kubakurikirana mu mikorere mibi yabo bayinaniza kugeza yegujwe cg yeguye

  5. Iyi ni intambwe nto itewe mu bijyanye no kuzamura ireme ry’uburezi ariko haracyari byinshi byo gukora… muhereye ku mwarimu ariko umunsi DOS, Headteacher,SEO, DEO bibonye muri REB-MINEDUC aho kwirebera mu ndorerwamo ya MINALOC Ni bwo twatangira gutekereza kurota ko ireme ryuburezi ryazaza ahari…. naho ubundi niba imyanzuro akarere gafata mu kuzamura mituelle, guca isuri, kurwanya bwaki izahuzwa no kwinjira mu bintu byinshi bituma ireme ryuburezi rizamuka turacyafite urugendo aho uburezi nka technical area bufatirwa imyanzuro numunyapolitique (Mayor) atitaye ku buryo ari career igoye isaba ubumenyi bwihariye kandi mbabwire learning ni ikibazo gikomeye pe….na teaching burya isoroma muri learning dukemure ikibazo cya learning mure ko tudatera imbere kurusha aho turi ubu byaba byiza kurusha pe….

  6. ÉVIDEMMENT, NTA HO U RWANDA RWAGERA RUKOMEREJE MU BUREZI BUDASHINGA. BIRABABAJE, BITEYE ISHAVU N’AGAHINDA KENSHI, GUKOMEZA GUTEMA ISHAMI TWICAYEHO:UBUREZI.
    IYI NI INKINGI IFASHE IZINDI NKINGI ZOSE. NIBAZAGA AHO INCURABWENGE Z’U RWANDA ZAGIYE BIKANCANGA. UZI GUKORESHA UMUNTU UDASHOBOYE, UZI GUKORESHA UMUNTU NGO NI UKO YATANZE AKAYABO, NGO NI UKO MUKOMOKA HAMWE N’IBINDI BYOSE.
    GUSIRAGIZA ABASHOMERI NA BYO BIGABANYWE KUKO NGE NABIFATAGA NK’AGASHINYAGURO VRAIMENT. NATWE TWUMVE BIDUTEYE ISONI RWOSE. ICYAKORA TUNISHIME NIBA KOKO BIKOSOWE ATARI AMASIGARABYICARO.
    MWARIMU NTIYAPFA NGO BANKI ZIBE NZIMA, NTIYAPFA NGO IBITARO BIVURE ABAKIRA, MWALIMU NTIYAPFAPFANA NGO ABACURUZI BAKORE NEZA. AMAZU YZTUGWAHO, IBIRYO BYATUBIHIRA, IMPANUKA ZATUMARA N’IBINDI BIBI BYINSHI.

    KUZANZAMURA ‘UBUREZI’ NI UKUMURIKIRA IGIHUGU, NI UKUZURA BURI DOMAINE, NI UGUTABARA ABARI MU KAGA BATEWE N’UBUJIJI. MURAKOZE CYANE ABATEKEREJE NEZA MWESE. NIBA RUSWA ARI NGOMBWA ‘YO GATSINDWA’ IZAGE AHANDI ARIKO TUYIRINDE CYANE ÉDUCATION.

  7. Ni ukuri gewe ndashimira REB kuri iyi gahunda nshya; kuko igiye gukemura byinshi harimo no kuzamura ireme ry’uburezi rero REB ihesheje agaciro abiga n’abize uburezi. REB ni umubyeyi mwiza ahubwo nibadufashe iyi gahunda nshya kandi nziza bayitangize vuba ku buryo guhera ubu uturere duhite dusezera mu gutegura ibyo bizamini bishyira abarezi mu kazi. Murakoze!

Leave a Reply

Your email address will not be published. Required fields are marked *