Gushaka umugore ni inyungu zange bwite – Mico The Best

Yanditswe na Gisubizo Gentil

Ku ya 15-10-2019 saa 20:09:24
Mico n'umukobwa bivugwa ko bakundana w'Umunyamerikakazi.

Umuhanzi Mico Prosper umenyerewe nka Mico The Best mu ndirimbo shya aherutse gushyira hanze yumvikanamo ubuvugizi ku basore bashyirwaho igitutu babazwa impamvu badakora ubukwe kandi bamaze igihe mu rukundo nawe arimo ariko agashimangira ko gushaka ari inyungu ze bwite ko nta muntu ufite inyungu mu ishaka rye.

‘Save The Date’ ni ko Mico yise indirimbo ye nshya aho amajwi yakozwe na Producer Devydenko naho amashusho agatunganywa na Bagenzi Bernard.

Uyu muhanzi mu kiganiro n’Imvaho Nshya yavuze ko yahisemo gukora iyi ndirimbo kubera ukuntu usanga umuhungu cyangwa umukobwa baba bafite abakunzi ariko bagashyirwaho igitutu n’abantu baba bavuga ko bashobora kuba badakundana bya nyabyo.

Ati “Nayikoze kuko nagombaga kuyikora, ikindi kandi gushaka umugore ni inyungu zange bwite, nta muntu ufite inyungu mu ishaka ryange, cyokora uretse mama nawe kandi nta gitutu aranshyiraho gusa arabyifuza.”

Iyi ndirimbo ifite aho ihuriye n’ubuzima bwa Mico bwite agace gato ariko abica hejuru yirinda kugira byinshi avugaho, yashimangiye ko ateganya gushinga urugo nubwo nta gihe nyacyo yavuze.

Yagize ati “Ndabiteganya nubwo ntazi umwaka ariko ku kifuzo cyange numva ntarenza umwaka utaha.”

Yagize n’icyo avuga ku nzu afitemo amasezerano aho akorera ibikorwa bye by’umuziki bya buri munsi, Mico yagize ati “Nk’umuhanzi wese biba byiza iyo ufite abo mukorana kurusha kwikorana, kuko hari byinshi utavunikamo ikindi usohorera ibihangano igihe bikakurinda kwirara.”

Yanakomoje ku imurika ry’alubumu ati “Ibyo kumurika alubumu ndabiteganya nubwo atari byo nshyize imbere kuko nshishikajwe no gutanga umuziki mwiza ku bafana bange maze nkabona kubamurikira alubumu iriho ibihangano byabanyuze.”

Ikindi alubumu yange nifuza ko yaba iriho nibura indirimbo zizwi neza kandi zakunzwe.

Mico The Best ari mu bahanzi bahagaze neza kandi bamaze igihe mu muziki nyarwanda, cyane cyane mu bakora Afrobeat. Ni umwe mu bahanzi bafite umwihariko mu miririmbire ye ndetse abasha no kuba yabasha kwikorera indirimbo ze.

Mu ntangiro z’uyu mwaka uyu muhanzi yatangiye gukorana byeruye n’inzu ifasha abahanzi mu bya muzika yitwa Kikac Music Label.

Mico The Best wamamaye cyane kubera indirimbo ‘Igikara’ yaherukaga gushyira hanze indirimbo nshya yise ‘Jamais’ ndetse n’indi yise ‘Twembi’.

Umwanditsi:

Gisubizo Gentil

2 Comments on “Gushaka umugore ni inyungu zange bwite – Mico The Best”

  1. Mico ni umwe mu bahanzi bazi neza icyo umuziki aricyo nubwo abatawuzi bumva ko atabizi ariko abazi neza umuziki bazi ibyo Mico akora ko ari sawa. hanyuma ibyo yavuze ni ukuri GUSHA NI INYUNGU ZE BWITE kuko abo bose bamushyiraho igitutu nashaka atarabiteguye neza ibibazo bizaza mu rugo rwe ndibaza ntashidikanya ko nta numwe azabona ashyiraho igitutu ngo amufashe kubicyemura.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.