18°C , Partly cloudy | Kigali-Rwanda
Abadepite mu gikorwa kwemeza umushinga w’itegeko rigena ibyaha n’ibihano muri rusange

Gusebanya byakuwe mu mushinga w’amategeko ahana y’u Rwanda

Yanditswe na admin

Ku ya 29-12-2017 saa 10:28:09

Inteko rusange y’abadepite yemeje umushinga w’itegeko rigena ibyaha n’ibihano muri rusange nyuma y’uko uvuye muri komisiyo ya Politiki, Uburinganire n’Ubwuzuzanye bw’Abagabo n’Abagore mu Iterambere ry’Igihugu, perezida w’iyo komisiyo, Depite Kayiranga Rwaka Fred yavuze ko icyaha cyo gusebanya cyakuwe mu ngingo z’uwo mushinga kikazajya gihanirwa mu mategeko mbonezamubano.

Gusebanya byari byashyizwe muri uwo mushinga aho Minisiteri y’Ubutabera yasabaga ko byazajya bihanishwa igifungo n’ihazabu y’amafaranga ariko ibyo bihano bigatandukana bitewe n’uburyo icyo cyaha cyakozwemo, aho cyakorewe ndetse n’uwo cyakorewe.

Depite Mudidi Emmanuel abaza impamvu ingingo yo gusebanya yakuwe muri uyu mushinga w’Itegeko yagize ati, “Ikindi turasaba Komisiyo kugira ngo idusobanurire impamvu icyaha cyo gusebanya cyakuwe muri uyu mushinga kuko ubusanzwe tuzi neza ko gusebanya ari ibintu bibi cyane ku buryo bukomeye.”

Mu gusubiza  icyo kibazo Depite Kayiranga Rwaka Fred uyobora komisiyo yize kuri uwo mushinga  yagize ati “Hari ibintu twagiye tureka kubera impamvu za politiki ariko tukabigiriramo inyungu zitandukanye, hari ibihano bimwe byagiye biva mu mategeko y’u Rwanda twibaza niba bishoboka ariko inyungu nk’u Rwanda twabikuyemo turazizi.”

Akomeza agira ati “Gusebanya byakuwemo mu murongo wa politiki y’igihugu no mu kubahiriza uburenganzira bwa muntu ariko ntibivuze ko ibi byaha bitazahanwa, bizajya mu mategeko mbonezamubano cyangwa se mu mategeko agenga itangazamakuru. Icyo twakoze ni ukubikura muri iri tegeko, ntibiri mu mategeko ahana ariko ntibivuze ko bitazahanwa.”

Depite Kayiranga yakomeje asobanura ko ibyaha byo gusebanya bizajya bihanwa mu mategeko mbonezamubano anaboneraho gusaba abantu kutumva ko ibyo bikuyeho ko hirengagijwe amateka y’umwihariko u Rwanda rwanyuzemo ngo bibe bikuyeho guhana icyo cyaha.

Bamwe mu banyamakuru bagize icyo batangaza ku kuba icyaha cyo gusebanya kizakurikiranwa mu mategeko mbonezamubano bavuze ko ari ibyo kwishimirwa kuko bizaha uburenganzira urwego rubahagarariye ndetse bikanagaragaza ubwisanzure.

Umunyamakuru Kalinijabo Jean de Dieu yagize ati “Byanshimishije kuko n’ubundi bijya gushyirwamo nta gikuba cyari cyacitse mu itangazamakuru ku buryo umuntu yavuga ngo byari byacitse bigera ku rwego rwo kujya mu nkiko gusa n’ubwo nk’abanyamakuru twabyishimiye nta bwo biduhaye uburenganzira bwo kujya gusebanya.”

Ingingo yavugaga ku gusebanya mu gitabo gishya cy’amategeko ahana nk’uko kirimo kuvugururwa yari iya 169 muri 331 zigize icyo gitabo.

Abadepite 59 ni bo batoye bemeza raporo ya Komisiyo ya Politiki, uburinganire n’ubwuzuzanye bw’abagabo n’abagore mu iterambere ry’Igihugu ku ivugururwa ry’amategeko ahana mu Rwanda, 2 barayanga mu gihe 7 bifashe kuri iyo raporo. Ibyo byahise bituma raporo ifatwa ko yemejwe hahita hatangira igikorwa cyo gutora ingingo ku yindi mu zigize icyo gitabo nyuma kikazemezwa mu nteko rusange y’Abadepite.

Minisiteri y’Ubutabera ihagarariwe n’umunyamabanga wa Leta ushinzwe Itegeko Nshinga n’andi mategeko, Evode Uwizeyimana, yari yasabye ko gusebanya byafatwa nk’icyaha kijyana uwagikoze mu nkiko nk’uko byagaragaraga mu mushinga wasuzumwe na Komisiyo ya politiki, uburinganire n’ubwuzuzanye bw’abagabo n’abagore mu iterambere ry’igihugu.

NIYONSENGA SCHADRACK

TANGA IGITEKEREZO

Leave a Reply

Be the First to Comment!

avatar