17°C , Mostly cloudy | Kigali-Rwanda
Abari bitabiriye inama nyunguranabitekerezo

Gusaba indonke na ruswa ku isonga mu kumunga ubukungu bw’igihugu

Yanditswe na Mugisha Benigne

Ku ya 17-01-2019 saa 17:11:06

Ubushinjacyaha bukuru butangaza ko gusaba indonke na ruswa ari byo byaha biza ku isonga mu kumunga ubukungu bw’igihugu.

Ibi ni ibyatangajwe na Nyirurugo Jean Marie Vianney, umushinjacyaha uyobora ishami rigenza ibyaha bimunga ubukungu bw’igihugu.

Yabivugiye mu mahugurwa y’iminsi 2 yagenewe abashinjacyaha muri za Parike, abo ku Rwego rw’Umuvunyi, abakorera mu Kigo k’Imisoro n’Amahoro, abagenzacyaha ba RIB n’abandi mu rwego rwo kurebera hamwe uburyo bwo kurwanya no gukumira ibyaha byo kunyereza umutungo wa Leta.

Nyirurugo agaragaza ko ibyaha byo gusaba indonke na ruswa byakozwe ku ijanisha rya 52%, ibyaha byo kunyereza umutungo biri ku kigero cya 27.3%, kunyereza umutungo w’amakoperative biri ku kigero cya 8% naho kunyereza umutungo w’amabanki byakozwe ku kigero cya 6%.

Yagize ati: “Duhura n’imbogamizi zo kugira dosiye nyinshi zijyanye no kwaka ruswa, guhisha umutungo ngo udafatirwa, hari abanyereza umutungo bagahungira hanze y’igihugu, gusaza kw’ibihano byo mu rwego rw’akazi, raporo y’umugenzuzi mukuru w’imari ya Leta isohoka ibyaha byamaze gusaza.”

Nsengiyumva Emmanuel, Umushinjacyaha ku rwego rw’Umuvunyi yagarutse ku ngano z’umutungo wanyerejwe n’umaze kugaruzwa.

Avuga ko umutungo wanyerejwe ukeneye kugaruzwa usaga amafaranga Miriyari 4, amaze kugaruzwa akaba asaga Miriyari 1 na Miriyoni 900.

Ati “Hamaze kugaruzwa 20% by’umutungo wose wanyerejwe, biracyari hasi, ni ngombwa ko hashyirwamo imbaraga ku bufatanye bw’inzego.”

Kugenda biguru ntege mu kugaruza umutungo wa Leta wanyerejwe ngo biterwa n’imbogamizi zihari zijyanye n’umubare muto w’abakozi bo mu bushinjacyaha n’izindi zo mu rwego rw’amategeko zigaragara mu murimo w’ubucamanza.

Nsengiyumva yavuze kandi ko ruswa yakunze kwiyongera aho kugabanuka, kuko mu mwaka wa 2014 yari ku kigero cya 4%, ni mu gihe mu mwaka wa 2016 ruswa yageze ku kigero cya 5%.

Iyaremye Richard, Umuyobozi w’ishami rishinzwe kurwanya ibyaha bimunga ubukungu bw’igihugu, yavuze ko RIB imaze kugenza amadosiye 116 kuva tariki 20 Mata 2018 itangira.

Avuga ko amadosiye akiri make bitewe n’uko abakozi bo mu bushinjacyaha bwa RIB ari bake kuko ari 16 gusa mu gihe bakiri muri Polisi y’Igihugu bari 38.

Inama nyunguranabitekerezo y’iminsi ibiri izasozwa ifatiwemo imyanzuro iganisha ku mikoranire y’inzego z’ubutabera mu kurwanya no gukumira ibyaha bimunga ubukungu bw’igihugu.

Abari bitabiriye inama nyunguranabitekerezo

TANGA IGITEKEREZO

Leave a Reply

Your email address will not be published. Required fields are marked *