22°C , Partly cloudy | Kigali-Rwanda

Guinée-Bissau: Urukiko  rwemeye gusuzuma ubujurire ku matora ya Perezida

Yanditswe na Kayira Etienne

Ku ya 21-01-2020 saa 10:29:55
Domingos Simoes Pereira, Umukandida Perezida mu matora ya Guinée Bissau utemera ibyatangajwe na CEN

ku wa Gatanu w’icyumweru gishize, Komisiyo y’Igihugu  y’amatora (CNE) muri Guinée-Bissau, yatangaje ibyavuye mu matora ya Perezida bya nyuma. Yemeje ko Umaro Sissoco Embaló ari we ngo watsinze amatora ku buryo bidasubirwaho.

Ku mugoroba w’uwo munsi umwe, Urukiko rw’Ikirenga rwamenyesheje ko rwemeje ibyo CNE yatangaje, ariko Umukandida Domingos Simoes Pereira bari bahataniye uwo mwanya yatangaje ko Urukiko rw’Ikirenga rutagombye kwihutiraho kwemeza ibyatangajwe na Komisiyo rutarabanza kubigenzura.

Hagati aho, umuvugizi w’Urukiko yemeye ko utaranyuzwe n’ibyatangajwe ku matora ya Perezida yarugezaho ubujurire ngo bazabusuzumana ubushishozi batitaye kuko ari uburenganzira bwe kugaragaza ibitaragenze neza.

Ikinyamakuru Jeune Afrique (J.A) gitangaza ko ibyavuye mu  matora Komisiyo  ya Guinée-Bissau yatangaje Umukandida Umaro Sissoco Embaló ari we watsinze amatora ya Perezida, ngo byaje bishimangira ibyo CEN yari yatangaje by’agateganyo muri aya matora yo ku nshuro ya kabiri.

Iti «Icyateye urujijo abenegihugu ni uko Domingos Simoes Pereira, Umukandida w’Ishyaka PAIGC (Parti Africain pour l’Indépendance de la Guinée et du Cap-Vert) akimara kuvuga ko atemeye ibyavuye mu matora kuko asanga harabayemo kwiba amajwi, Komisiyo n’Urukiko rw’Ikirenga byagaragaje ko bidashaka kuva ku izima kandi Itegeko ryemerera utanyuzwe kujurira».

Ibiro ntaramakuru by’Abafaransa AFP, byemeza ko umukandida Domingos Pereira ngo yatunguwe n’uburyo yasabye ko Urukiko rw’Ikirenga ari rwo ruzamumara impungenge yagaragaje ko atemera ibyatangajwe na CEN, muri uwo mugoroba na rwo rukihutira kwemeza ibyatangajwe na Komisiyo rutabanje gusuzuma ubujurire bwe.

AFP iti «Icyakora, byaje kumvikana neza ho buke Salimo Vieira, umuvugizi w’Urukiko, atangaje ko ubujurire bw’Umukandida-Perezida Pereira nibubageraho bazabusuzuma bakurikije amategeko bazabone gutange imyanzuro».

Ku wa 17 Mutarama 2020,  Komisiyo y’Igihugu cya Guinée-Bissau y’amatora yemeje ko Umara Sissoco yatsinze ku majwi 53,55%, naho mugenzi we Domingos Simoes atsindanwa amajwi 46,45%. Ijambo rya nyuma kuri aya matora ya Perezida ritegerejwe ku rukiko rw’Ikirenga kuko CEN yo yarangije akazi kayo.

Umwanditsi:

Kayira Etienne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.