20°C , Mostly cloudy | Kigali-Rwanda

Guhindura imyumvire byagabanyije ibyago by’abagore batwite mu Rwanda

Yanditswe na TUMUKUNDE GEORGINE

Ku ya 01-04-2021 saa 11:53:58
Abagore bavuga ko bahabwa serivisi z'ubuvuzi bakanagirwa inama z'uko bitwara mu gihe batwite

“Kera abantu ntibipimishaga, babyariraga mu ngo ugasanga umubyeyi ahuye n’ikibazo akaba yapfa cyangwa umwana atwite akagira ikibazo ariko ubu abaganga baragukurikirana ukabyara neza…”, nk’uko bitangazwa na Bugenimana Cansilde,  umubyeyi wari waje kwipimisha inda ku Kigo Nderabuzia ya Mukarange mu Mudugudu wa Kabirizi, Akagari ka Kitazigurwa mu Murenge wa Muhazi, mu Karere ka Kayonza.

Ni umwe mu baturage bavuga ko basobanukiwe  akamaro ko kwita ku buzima bw’umugore utwite; bitabira gahunda zigamije gufasha umubyeyi n’umwana kugira ubuzima bwiza.

Kuzamura imyumvire ku buzima bw’umubyeyi n’umwana byagize uruhare mu kugabanya imfu z’ababyeyi bapfa babyara ndetse n’izabana bapfa bavuka, aho mu Rwanda ikigereranyo cy’ababyeyi bapfa babyara cyavuye ku 1020/100.000 mu mwaka wa 2000 kikagera kuri 203/100,000 muri 2020.

Imibare itangwa n’Ikigo cy’Igihugu cy’Ibarurishamibare mu Rwanda (NISR), igaragaza ko ikigereranyo cy’abana bapfa bavuka cyavuye kuri 107.7/1000 mu mwaka wa 2000 kikagera kuri 19/1000 mu 2020.

Abandi baturage baganiriye n’Imvaho Nshya mu Karere ka Kayonza bakaba biganjemo abagore batwite, bavuze ko guhindura imyumvire bijyana no kwitabira gahunda zirimo kujya kwa muganga kwipimisha inda, kwita ku mirire bategura indyo yuzuye, isuku, kubyarira kwa muganga n’ibindi.

Bugenimana Cansilde avuga ko kwipimisha ku mugore utwite ari ingirakamaro

Bugenimana yakomeje agira ati: “Twipimisha inshuro enye, iya mbere uzana n’umugabo bakabapima bakareba ko nta virusi itera SIDA mufite, bakaduha ibinini bya vitamini, ubukurikiyeho bakajya bakurikirana uko umwana ameze mu nda. Batubwira uko twitwara, tukarya indyo yuzuye irimo ibyubaka umubiri, ibitera imbaraga n’ibirinda indwara, tukaruhuka tukirinda imirimo ivunanye”.

Uwiragiye Betty wo mu Mudugudu wa Rebero, Akagari ka Mukarange, mu Murenge wa Mukarange, ubwo yari ku kigo nderabuzima agiye kwipimisha inda ku nshuro ya gatatu, yavuze ko yamenye ibyo agomba kwitaho kugira ngo we n’uwo atwite bamererwe neza.

Ati: “Namenye ko kwipimisha kwa muganga ari ngombwa; bakurikirana uko njye n’umwana ntwite duhagaze, bampa n’inama z’uko nitwara ubuzima bukagenda neza”.

Mushimiyimana Pierrine wo mu Mudugudu w’Akabeza, mu Kagari ka Nyagatovu, na we yagaragaje ko atasigaye inyuma mu kubahiriza inama ahabwa n’inzego z’ubuzima.

Ati: “Nubahiriza gahunda yo kwipimisha inshuro 4, bankorera ibizamini bakareba ko nta ndwara mfite, bagakurikirana uko umwana ameze mu nda. Bangiriye n’inama zo kurya ibiryo bifatika cyane cyane birimo imboga za dodo, isombe n’imbuto. Bakugira inama bakurikije uko bagusanze; niba ibilo bitiyongera, ufite amaraso makeya, bakakubwira ibyo ugomba kwitaho mu mirire”.

Mushimiyimana Pierrine yasobanukiwe ko atagomba kubura imbuto n’imboga mu mafunguro

Mukankusi Thacienne wo mu Mudugudu wa Gasogororo, mu Kagari ka Kayonza, asanga umugore utwite udakurikiza inama z’abaganga aba ari mu kaga.

Ati: “Nitabira kwipimisha inda kwa muganga kuko iyo utipimisha uba uri mu kaga […], ndya indyo yuzuye, nyuma ya saa sita ndaryama nkaruhuka, nabyuka ngakora siporo yo kugenda n’amaguru, na yo bayitugiriyemo inama”.

Abagabo na bo bagaragaje ko bafite uruhare mu kwita ku buzima bw’umugore utwite.

Umwe mu bagabo witwa Misago Evariste utuye mu Mudugudu wa Gakurazo, Akagari ka Kayonza, ubwo yari aherekeje umugore we bagiye kwipimisha kwa muganga ku nshuro ya mbere, yagarutse ku byiza by’izi gahunda n’uruhare rw’abagabo mu kuzubahiriza.

Ati: “ … bifite akamaro, nzi neza ko bituma umwana avuka neza, n’umubyeyi akamererwa neza, iyo ushyigikira umugore wawe n’umwana aba yumva n’igituza cya se, kandi uko ukomeza kumuherekeza bishimangira urukundo mu muryango […]”.

Misago Evariste yaherekeje umugore we kwa muganga

Mukarurangwa Ancile ni Umujyanama w’Ubuzima ushinzwe ubuzima bw’umubyeyi n’umwana mu Mudugudu wa Gasogororo, ashimangira ko ababyeyi bahinduye imyumvire, muri rusange bubahiriza inama bagirwa.

Agaruka ku buryo afasha umugore utwite, yagize ati: “Umugore iyo mupimye kuko baduhaye udukoresho twifashisha (test de grossesse) ngasanga afite inda mwandikira urupapuro nkamwohereza ku kigo nderabuzima, yamara kwipimisha akanzanira ifishi yemeza ko atwite, ngatangira kumugira inama z’uko agomba kwitwara kugira ngo we n’umwana bamererwe neza”.

Abaturage bashima Leta yashyizeho iyi gahunda, ikaba inaha ifu ya Shisha Kibondo abari mu cyiciro cya mbere n’icya kabiri cy’ubudehe, igatuma umubyeyi n’umwana bagira ubuzima bwiza.

Uko umugore utwite akurikiranwa kwa muganga

Murekeyisoni Arlette umuforomokazi ushinzwe serivisi yo gukurikirana abagore batwite ku Kigo Nderabuzima cya Mukarange, yasobanuye ko umugore utwite aba agomba kwipimisha inda inshuro 4, hashingiwe ku bihembwe.

Murekeyisoni Arlette umuforomokazi ushinzwe serivisi yo gukurikirana abagore batwite ku Kigo Nderabuzima cya Mukarange

Ajyayo mu gihembwe cya mbere ( akimenya ko yasamye kugeza ku mezi 3), agasubirayo mu cya kabiri gihera ku mezi 4 kugera kuri 6, ajyayo no mu cya gatatu ku mezi 6,5 kugeza ku 8, mu cya kane ajyayo yujuje ibyumweru 38 (amezi icyenda) yitegura kubyara.

Ati: “Muri cya gihembwe cya mbere, iyo aje turamupima tukamenya ko atwite koko, kuko hari igihe ashobora kwigimba akibeshya ko atwite kandi adatwite. Mu gihembwe gikurikiyeho hari ibizamini tumukorera dukurikirana n’umwana uri mu nda kugira ngo batazagira ibibazo”.

Yakomeje avuga ibindi bizamini umubyeyi akorerwa birimo iby’inkari, bareba ko nta poroteyine zirimo kuko iyo zirimo zishobora kumutera ibibazo cyangwa umwana akavuka igihe kitageze.

Murekeyisoni ati: “Uwagize icyo kibazo ni gake ubuzima bwe bwongera kuzanzamuka. Ni yo mpamvu dukora ibizamini duhereye kuri cya gihembwe cya mbere tugapima inkari, tukamufatira umuvuduko w’amaraso, dupima isukari iri mu maraso, tugapima ingano y’amaraso yaba ari make tukamugira inama z’ibyayongera, yaba ahagije tukamubwira ibyo akora ntasubire inyuma. Umubyeyi ahabwa ibinini bya feri (fer) bituma amaraso atajya hasi, akongeraho n’indyo ituma atagabanyuka, bikanategura ubwonko bw’umwana”.

Hakorwa n’ ibizamini bya Virusi itera SIDA n’imitezi ku mugore n’umugabo, basanga ari bazima bakagirwa inama zo gukomeza kwirinda, baba banduye bagahita batangira gufata imiti.

Ati: “Iyo virusi zibaye nyinshi, umubyeyi aba afite ibyago byinshi byo kwanduza umwana. Indwara y’imitezi ishobora gutuma umugore atabyara cyangwa akabyara umwana igihe kitageze cyangwa se akavukana ibindi bibazo”.

Umuforomokazi Murekeyisoni avuga ko abagore benshi usanga inda zivamo bitewe n’uko batigeze bagera kwa muganga ngo bipimishe, bagirwe inama bazabyare neza.

Umugore utwite ahabwa inkingo

Murekeyisoni asobanura ko iyo umugore agiye kubyara bwa mbere akingirwa indwara y’agakwega (tetanus), ahabwa inkingo 5.

Urwa mbere aruhabwa agiye kwipimisha ku nshuro ya mbere, urwa kabiri aruhabwa hashize iminsi 28, urwa gatatu nyuma y’amezi 6 uhereye igihe yafatiye urwa kabiri, urwa 4 arufata nyuma y’umwaka, urwa 5 na rwo arufata hashize undi mwaka.

Abagore batwite banakangurirwa kurya indyo yuzuye ibonekamo imboga rwatsi

Ati: “Izo nkingo ziba ari ingenzi ku mubyeyi; igihe abyara burya akenshi arakomereka n’ubwo udukomere tuba tutagaragara, kandi iyo ndwara y’agakwega tuzi neza ko yandurira mu gikomere, iyo umubyeyi abyaye nibura yarakingiwe inkingo ebyiri tuba twizeye neza ko itapfa kumufata kandi n’iyo yamufata itamuzahaza nk’umuntu utarigeze akingirwa, binafasha umwana”.

Abagore batwite banahabwa ibinini by’indwara y’inzoka mu gihembwe cya kabiri, ibya feri (fer) aba agomba kunywa kuva akimenya ko yasamye kugeza abyaye, agahabwa inzitiramibu imufasha kwirinda Malariya kuko iyo umugezeho imuzahaza, ishobora no gutuma akuramo inda.

Umushinga SPRP wateje imbere gahunda zo kwita ku mugore utwite

Kuba izi gahunda zo kwita ku buzima bw’umugore utwite zishyirwa mu bikorwa kandi zikitabirwa bituruka ku bwunganizi butangwa n’umushinga SPRP.

Uwanyirigira Chantal Umuyobozi w’Ikigo Nderabuzima cya Mukarange, yasobanuye ubufasha butangwa n’uyu mushinga, avuga ko utanga ifu y’igikoma ya Shisha Kibondo ku bagore batwite bari mu cyiciro cya mbere n’icya kabiri by’ubudehe no ku bana bafite amezi 6 kugera ku myaka 2, n’ibikoresho byifashishwa kwa muganga mu kwita ku bagore batwite.

Uwanyirigira Chantal Umuyobozi w’Ikigo Nderabuzima cya Mukarange

Unatanga agahimbazamusyi (PBF) ku Bajyanama b’ubuzima bapima abana imikurire no gukurikirana ubuzima bw’umubyeyi n’umwana no ku bakozi b’ibigo nderabuzima bakora mu bikorwa utera inkunga. Abo bose bakagahabwa hashingiwe ku buryo bahaye serivisi abagenerwabikorwa kandi bagejeje ku bipimo byatanzwe n’umushinga.

Ubwitabire muri serivisi zigenerwa umugore utwite buhagaze neza

Harelimana Jean Damascene, Umuyobozi wungirije w’Akarere ka Kayonza ushinzwe imibereho myiza, avuga ko abaturage bazamuye imyumvire kuri gahunda zo kwita ku buzima bw’umugore utwite; nko ku bijyanye no kubyarira kwa muganga, Akarere kari kuri 97%, abitabiriye kwipimisha inshuro enye zisabwa ni 56,7%, mu gihe intego yo ku rwego rw’Igihugu ari 55%.

Avuga ko uyu ari umusaruro w’ubukangurambaga bakomeje gukora bashishikariza umugore n’ umugabo kumenya ko iyo umugore atwite agomba kujya kwa muganga kwisuzumisha. Hiyongeraho na gahunda yo gufasha abagore bari mu kiciro cya 1 n’icya 2 cy’ubudehe, bagahabwa inkunga y’ingoboka kugira ngo ubuzima bw’umwana n’umubyeyi bumererwe neza.

Yasabye ababyeyi guharanira ko ubuzima buba bwiza ku mugore utwite. Ati: “Ibyo turakomeza kubisaba kugira ngo tugire abana beza, kandi iyo umwana ameze neza ni igisobanuro cy’uko azaba ari n’umuturage mwiza mu minsi iri imbere”.

Ashima n’Abajyanama b’ubuzima bashishikariza ababyeyi gahunda zashyizweho.

Uwiragiye Betty ashima gahunda zo kwipimisha inda kwa muganga

Mukankusi Thacienne (iburyo) ari kumwe na Mukarurangwa Ancile Umujyanama w’Ubuzima umukurikirana

Umwanditsi:

TUMUKUNDE GEORGINE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.