17°C , Thunderstorms | Kigali-Rwanda

Guhanga udushya ni ugufasha urubyiruko guhatana ku isoko – Kampeta

Yanditswe na Rutayisire Emile

Ku ya 20-09-2019 saa 17:13:58
Umuyobozi Mukuru w’Ikigo k’Igihugu cy’Ubushakashatsi n’Iterambere mu byerekeye inganda (NIRDA) Kampeta Sayinzoga

Amarushanwa y’urubyiruko yateguwe ku bufatanye bwa Minisiteri y’Ubucuruzi n’Inganda MINICOM n’Ikigo k’Igihugu cy’Ubushakashatsi n’Iterambere mu byerekeye inganda (NIRDA) agamije guhanga udushya mu nganda, ik’ingenzi agamije ni ugufasha urubyiruko guhatana ku isoko.

Ibi ni ibitangazwa n’Umuyobozi Mukuru w’Ikigo k’Igihugu cy’Ubushakashatsi n’Iterambere mu byerekeye inganda (NIRDA) Kampeta Sayinzoga, yavuze ko basabye urubyiruko gutekereza ku bintu bishobora gufasha inganda zo mu Rwanda gutera imbere ari mu buryo bw’ubuhinzi, mu myenda, ibidukikije, mu bikoresho bikoreshwa mu ngo n’ibindi byinshi binyuranye, abazatsinda bakazabafasha guhatana ku isoko.

Agira ati «Twabahamagariye kugira ngo batange ibitekerezo by’uburyo hahangwa ibishya. Icyo dushaka nta bwo ari uguhatana hagamijwe gutsindira amafaranga gusa, ahubwo abazatsinda bazahabwa n’amahirwe yo kuzamara amezi 3 bahabwa amahugurwa, aho bagaragariza neza ibyo bitekerezo byabo n’uko byashyirwa mu bikorwa, bagirwe inama, bahuzwe n’ibindi bigo bikomeye ndetse n’impuguke zinyuranye zizabongerera ibitekerezo ku mishinga yabo, hagamijwe ko ibyo batekereje bishyirwa mu bikorwa kandi bikazagera ku isoko bimeze neza, bifatika. Mbese ni umwanya mwiza babonye wo kuzafashwa gushyira ibitekerezo byabo ku murongo uhamye ibyo batekereje gukora bikazajya ku isoko bimeze neza.»

Akomeza avuga ko ikigamijwe ari uko hakoreshwa ikoranabuhanga kandi mu buryo bushya budasanzwe kandi butigeze bubaho n’ahandi ku Isi kuko aricyo gisabwa kuko hatagomba kubaho kwigana ibikorerwa ahandi ahubwo hagomba kubaho umwimerere wabo w’ibishya byakorerwa mu Rwanda.

Kampeta avuga ko intego ari uko umuvuduko mu iterambere ry’inganda wikuba 2 kandi ko utabigeraho urebye gusa abantu bari mu nganda ahubwo ko ugomba kureba abantu bashya, urubyiruko rukumva ko rugomba kujya mu nganda kuko hari imirimo n’ibyo kungura inganda, bakaba bagomba guhanga udushya ku buryo abanyenganda baba benshi.

Agira ati «N’ubusanzwe dusanzwe dufasha abanyenganda basanzwe, ariko ni ngombwa ko twongera n’umubare w’urubyiruko bakinjira mu nganda kandi mu mashami atandukanye. Igishimishije urubyiruko rwibanze ku bintu bishyashya, twarabishimye kuko isoko ryacu riragutse turareba Akarere n’Isi yose ku buryo urubyiruko rugomba kubyaza isoko umusaruro.»

Ubwo urubyiruko rwashishikarizwaga kwitabira amarushanwa hapiganwe hafi 400 batoranywamo abafite ibitekerezo bishobora gushyirwa mu bikorwa byazafasha inganda hasigara abantu 100, ari na bo batangiye kurushanwa ejo hashize ku wa Gatanu tariki ya 20/9/2019. Abo barimo amatsinda 37. Ku munsi wo gusoza tariki ya 22/9/2019 ni bwo bazagaragaza neza imishinga, bavuga uko igitekerezo giteye, icyo umushinga ugiye gukemura n’uburyo uzakorwa, ugaragaza neza imikorere y’icyo kintu. Uwo munsi ni bwo hazatoranywamo imishinga 6, uwa mbere uhabwe miriyoni 2, andi matsinda 5 asigaye ahabwe miriyoni imwe imwe. Ariko n’indi mishinga izasigara nayo barayibika mu gihe yazakenerwa na bo bakabahamagara kuko ibitekerezo byabo byari byatsinze mu ntangiriro.

Inyungu bafite ni uko bazafashwa kugurisha ikintu bahimbye cyangwa bakagurisha umushinga, ikindi n’uko na bo ubwabo bashobora guhitamo kubyikorera bakaba abashoramari. Muri icyo gihe bagafashwa kubona abaterankunga cyangwa uburyo babona inguzanyo muri Banki kuko umushinga uba wizewe neza kandi wakorewe igenzurwa.

Uhagarariye Ishami ry’Umuryango w’Abibumbye mu Rwanda ryita ku iterambere (UNDP), Stephen Rodriques yishimiye kuba ari kumwe n’urubyiruko rwabashije gutsinda amarushanwa yo guhanga udushya tuzagirira akamaro inganda zo mu Rwanda. Yavuze ko UNDP isanzwe itera inkunga imishinga igamije iterambere ry’urubyiruko n’iterambere ry’ibihugu muri rusange.

Umunyamabanga Uhoraho muri Minisiteri y’Ubucuruzi n’Inganda MINICOM, Sebera Michel mu gufungura igikorwa cy’ayo marushanwa mu rubyiruko yavuze ko ari igikorwa kiza cyane kigamije kureba ukuntu hatezwa imbere inganda binyuze mu guhanga udushya urubyiruko rushobora gukora kugira ngo ruteze imbere u Rwanda n’inganda zo mu Rwanda.

Yagize ati «Mushyire imbaraga mu mishinga yanyu, abazatoranywa bazahabwa amahugurwa meza azatuma ibyo batekereje biteza imbere Igihugu cy’u Rwanda. Hari ibibazo byinshi mu nganda kandi turashaka guteza imbere ibikorerwa iwacu (Made in Rwanda) ariko usanga ibibazo duhura na byo ari ubwiza n’ingano ( Quality and Quantity ). Amarushanwa nk’aya aba yateguwe ni ngombwa ko abatsinze bahugurwa nk’Abanyarwanda bakiri bato bafite ibitekerezo byiza, bikoresha ikoranabuhanga, bigomba kongererwa ingufu kugira ngo biteze imbere inganda zo mu Rwanda.»

Yakomeje avuga ko icyo gikorwa ari ikintu gishimishije cyane kandi gishyigikiwe na Minisiteri ashimira na UNDP yateye inkunga ayo marushanwa.

Sebera yagarutse kuri gahunda ibihugu by’Umuryango w’Afurika y’Iburasirazub, EAC, byihaye yo kujya buri wa Gatanu abantu bose bazajya bambara ibikorerwa iwabo. Iki gitekerezo kikaba cyaremejwe muri EAC mu gihe mu Rwanda hari harashyizweho gahunda yo kwambara ibikorerwa mu Rwanda (Made in Rwanda) buri wa Gatanu wa nyuma w’ukwezi.

Asanga ari ugushyigikira abanyagihugu bakora iby’iwabo kandi ku rwego rwa EAC, ibikorerwa muri ibyo bihugu bizajya byambarwa atari ukuvuga ngo ni ukwambara iby’iwanyu gusa ahubwo kwambara ibyo mu Karara ka EAC ku buryo ababikora bazabyungukiramo.

Ayihanganye Livingston na Mugabe Olivier ni umwe mu rubyiruko rwitabiriye amarushanwa bakoze umushinga wo gukundisha abantu ibidukikije akoresheje ikoranabuhanga. Ikintu bashaka gukora ni ugukorera Abanyarwanda ibikapu bikoresha imirasire y’izuba, ifite na Laptop ikaba yafasha abantu batuye mu cyaro, kuko nk’icyo gikapu kizaba gifite itara rikoreshwa n’imirasire y’izuba, rikaba ryafasha umunyeshuri kwiga nijoro ku bantu baba ahantu hatari umuriro.

Uwamariya Genevieve wiga muri IPRC we na mugenzi we bazanye umushinga ubafasha gutara ibitoki bivamo umutobe ukoreshwa mu gukora urwagwa n’izindi divayi. Umwihariko wawo avuga ko utuma ibitoki bishya mu minsi itanu kandi ukaba wizeye ko byahiye neza. Bavuga kandi ko ushobora no kumenya ko byahiye ukabibona ku ikoranabuhanga rya terefoni cyangwa ku mashini.

Byiringiro Bonifasi na Mugisha Naomi biga Kaminuza y’u Rwanda mu ishami rya Nyagatare, bakoze umushinga w’akamashini bise «Imboni Mining Tracker», kazajya kamenya aho amabuye y’agaciro ari mu butaka hatabayeho gushakisha batomboza aho bacukura.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.