Guhamagara mu mahanga: Ikibazo cy’ibiciro bihanitse mu nzira zo gukemuka

Yanditswe na Nshimyumukiza Janvier Popote

Ku ya 14-08-2019 saa 15:13:22
Umuyobozi Mukuru wa Smart Africa, Lacina Coné aganira na Visi-Perezida wa Syniverse Lacina Conte mu kiganiro n'abanyamakuru

Syniverse, sosiyete izobereye mu bijyanye n’itumanaho ku Isi, yakiriwe nk’umunyamuryango mushya w’ikigo cya Smart Africa gishinzwe kwihutisha ikoranabuhanga muri Afurika.

Visi Perezida wa Syniverse, John Macae, yabwiye abanyamakuru ko biteguye gufatanya na Smart Africa mu koroshya ibiciro mu gihe abari mu bihugu by’Afurika bahamagarana.

Ikibazo kivugwa, ni kuriya umuntu ajya mu kindi gihugu yagerayo akagomba kugura simukadi nshya, cyangwa se agakoresha simukadi ye (roaming) ariko guhamagara iwabo bikamuhenda.

Ubu bufatanye bwa Smart Africa na Syniverse bwitezweho gutuma uhamagara mu kindi gihugu yishyura amafaranga angana n’ayo abo mu gihugu arimo bishyura iyo bahamagarana (local tarrif).

Umuyobozi Mukuru wa Smart Africa, Lacina Coné yabwiye abanyamakuru kuri uyu wa 14 Kanama 2019, i Kigali, ati, “Twishimiye kwakira Syniverse muri Smart Africa Alliance.”

“Gukorana na Syniverse ni intambwe ikomeye mu kunga ubumwe bw’Abanyafurika binyuze mu koroshya urujya n’uruza rw’abantu, kongera ubuhahirane no kuzamura ’ubukungu.”

Umuyobozi Mukuru wa Smart Africa, Lacina Coné (iburyo) hamwe na Visi-Perezida wa Syniverse Lacina Conte, basobanurira itangazamakuru umumaro w’ubufatanye bwabo.

Visi Perezida wa Syniverse, John McRae, yavuze ko bishimiye gukorana na Smart Africa mu guteza imbere Afurika binyuze mu korohereza abaturage guhamagarana hatabayeho guhendwa.

Ibyo Syniverse izabikora ibinyujije mu kubaka igicumbi cy’itumanaho (hub) gihuza amasosiyete atanga serivisi z’itumanaho, ku buryo usohotse mu gihugu cye adahendwa no guhamagara.

Muri icyo gicumbi, amasosiyete y’itumanaho azakorana bya hafi ku buryo hatabaho ibiciro biri hejuru byo guhamagara mu kindi gihugu (roaming costs), nk’uko ababishinzwe babyemeza.

Ubuyobozi bwa Syniverse buvuga ko ikoranabuhanga (network) rya Syniverse rikoreshwa mu kohereza ubutumwa (messages) miliyari ebyiri ku munsi ku Isi, mu gihe 70% by’amasosiyete y’itumanaho yo muri Afurika ari abakiliya ba Syniverse.

Syniverse imaze imyaka 30 itanga serivisi z’itumanaho rya telefone ngendanwa, kuri ubu ikaba ikorera mu bihugu 150 ku Isi, nk’uko bisobanurwa na Visi Perezida wayo John McRae.

Mu ishyirwa mu bikorwa ry’umushinga wo kugabanya ibiciro byo guhamagara mu gihe umuntu ahamagara mu bihugu bikorana na Smart Afrika, harigwa ku bijyanye n’amategeko na tekiniki.

Nyuma yo kwakira Syniverse muri Smart Africa, impande zombi zafashe ifoto y’urwibutso

Umutekano w’itumanaho

Usibye iba roaming, Syniverse yitezweho no kubaka uburyo amakuru yo mu rwego rw’ikoranabuhanga igihe abantu bahamagarana (data) ahererekanywa n’Abanyafurika aguma muri Afurika, ntabanze kunyura muri Aziya n’i Burayi nk’uko bisanzwe.

Kuba umunyafurika ahamagara undi amajwi yabo akabanza kunyura hanze y’Afurika mbere y’uko babasha kuvugana, bitera impungenge z’umutekano na zo zirimo gushakirwa umuti, nk’uko ubuyobozi bwa Smart Africa bubivuga.

Amakuru kuba anyura hanze y’Afurika mu gihe Abanyafurika bavugana, biterwa no kuba Afurika idafite ikigo gihuza itumanaho rya Leta (public data center), ikibazo gihangayikishije.

Umunyasenegal Seyni Fati ushinzwe imishinga muri Smart Africa ati, “Dukeneye public data center, dukeneye ko amakuru (data) yacu aba hano muri Afurika, niba amakuru yawe abikwa hanze abayarinda bashobora kubyuka bakakwima uburenganzira bwo kuyageraho.”

Yunzemo ati, “Abakuru b’ibihugu barifuza ko amakuru y’Abanyafurika aguma muri Afurika, tukagira ibikoresho bihagije bituma tuyabungabunga ubwacu.”

Abajijwe ibijyanye n’aho icyicaro cy’icyo kigo (data center) kizaba, yasubije ko mu kwezi kumwe kuri imbere bazatanga isoko ku kigo gitanga serivisi z’ubujyanama (consultancy firm) ku bijyanye n’aho icyo kigo gikwiye kubakwa kuko ngo hari byinshi bikwiye kwigwaho birimo kuba udashobora gushyira data center ahantu hashyushye cyane, ahatari amashanyarazi, hatari AC (icyuma cyongera kikanagabanya ubushyuhe bw’ahantu) n’ibindi.

Ibihugu birebwa n’iyi mishinga y’iterambere ry’ikoranabuhanga muri Afurika, ni ibihugu 26 bikorana na Smart Africa.

Syniverse imaze imyaka isaga 10 ikorera muri Afurika, ikaba kuri ubu ifite ishami i Nairobi muri Kenya na Johannesburg muri Afurika y’Epfo mu rwego rwo kwegereza serivisi zayo Abanyafurika.

Smart Africa ni gahunda igamije kubaka ubukungu bushingiye ku bumenyi muri Afurika, aho ikoranabuhanga rifatwa nk’inkingi ya mwamba mu gutuma habaho iterambere ry’umugabane.

Smart Africa yatangijwe mu mwaka wa 2013 n’abakuru b’ibihugu by’Afurika barindwi bitabiriye inama ya Transform Africa Summit yigaga ku iterambere ry’ikoranabuhanga, aho bashyizeho imirongo ngenderaho (Smart Africa Manifesto).

Kuri ubu Smart Africa ihuriyemo ibihugu 25 bibumbatiye abagenerwabikorwa zi barirwa muri Miliyoni 600, nk’uko bitangazwa n’umuyobozi wa Smart Africa, Lacina Coné.

Bamwe mu banyamakuru bitabiriye iki kiganiro cyabereye mu cyumba cy’inama cya Smart Africa mu Mujyi wa Kigali

Amafoto yafashwe na Mucyo Régis

Umwanditsi:

Nshimyumukiza Janvier Popote

Tanga Igitekerezo

Email yanyu ntigaragazwa ku rubuga. Amazina na Email ni ngombwa.