21°C , Partly cloudy | Kigali-Rwanda

Guha abana amata biri mu buryo 3 bwuzuzanya mu kurwanya imirire mibi

Yanditswe na Mugisha Benigne

Ku ya 09-06-2019 saa 08:30:11
Guha abana amata bikorwa na Leta y'u Rwanda muri gahunda zinyunranye n'abafatanyabikorwa bayo

Umuhuzabikorwa wa gahunda y’imbonezamikurire y’abana bato, Dr. Asiimwe Anita, avuga ko amata atangwa mu buryo butatu bwuzuzanya bugamije kurwanya imirire mibi mu bana.

Avuga ko hari amata atangwa ku bigo nderabuzima bifasha abana bakigaragaza ikibazo k’imirire mibi kubona amata aza yiyongera ku byo basanzwe bagaburirwa iwabo. Iyo abana bakigaragaza imirire mibi bahawe amata mu buryo bwihuse, ngo mu minsi 12 ikibazo k’imirire mibi kiba gikemutse.

Ati “Ayo mata ahabwa umwana uzanywe kwa muganga kuvuzwa bikagaragaza ko afite ikibazo k’imirire mibi, icyo gihe babashyira kuri gahunda yo kubaha amata mu buryo bwihuse kandi neza.”

Dr. Asiimwe avuga ko hari andi mata yatangiye atangwa ku bufatanye bwa Minisiteri y’Uburezi na Minisiteri y’Ubuhinzi n’Ubworozi ibinyujije mu Kigo k’Igihugu giteza imbere Ubuhinzi n’ubworozi RAB, iyo porogaramu yitwaga inkongoro y’umwana, akaba yarahabwaga abana bari mu mashuri y’inshuke kugera ku myaka ya 3 y’amashuri abanza.

Ayo mata yatangwaga kugira ngo abo bana bajya ku ishuri bashonje babashe kubona icyo bafata ngo batamara ya masaha menshi badafite icyo barya kuko bigira ingaruka ku mikurire yabo kuko bakiri muri ya myaka mito.

Indi mpamvu y’aya mata avuga ko umwana iyo ari ku ishuri akora yiga nta kintu afata, bituma agira ikibazo kuko ubwonko buba bukora cyane kandi nta cyo umwana yahawe.

Amata kandi yahawe abana biga mu turere tugaragaramo ikibazo k’imirire mibi, aho ayo mata yahabwaga amashuri ari mu turere 15 two mu gihugu.

Yongeraho ko aya mata yanatangiye gutangwa mu myaka ya mbere mu turere 19 tw’igihugu ariko mu bana bato bo mu mashuri y’inshuke aya mata ahabwa abana bose.

Guha abana amata bikorwa na Leta y’u Rwanda muri gahunda zinyunranye n’abafatanyabikorwa bayo

Bamwe mu babyeyi barerera mu mashuri y’inshuke n’abahabwa amata mu bigo nderabuzima bavuga ko iyi gahunda yaje ari ingenzi kuko yatumye abana barushaho kumererwa neza no gukura neza.

Mukantagara Chantal ni umubyeyi ufite umwana mu mashuri y’inshuke, avuga ko atakigorwa no kubona amata aha umwana we kuko basigaye bayahabwa ku ishuri, bityo ngo we akarwana no kumubonera igikoma kuko cyo ngo kidahenze kimwe n’amata.

Agira ati “Iyi gahunda yaje ikenewe kandi iradufasha cyane nka twe dufite imibereho icirirtse tudapfa kubona amata kuko ahenze, yatubereye igisubizo.”

Avuga ko guha amata umwana we byamugiriye umumaro kuko arimo gukura neza, kandi umubiri we uragenda utohagira nk’uw’umwana unywa amata koko. Yemeza ko iyi gahunda izatuma abana b’abakene batabasha kwigondera amata bayabona ku bw’ubufasha bwa Leta nziza ikunda abaturage.

Munyangeyo Jonas na we ni umubyeyi ufite umwana uhabwa amata ku kigo nderabuzima kubera ikibazo k’ibiro bike yasanganywe bidahuye n’imyaka ye.

Ati “Umwana wange yaje kugaragaza kudakura neza, agaragaza ibiro bike bitajyanye n’igihe afite, batangiye kumuha amata none ubu arangenda akura neza, hari ikirimo guhinduka ku mikorere ye.”

Avuga ko iyi gahunda ifasha cyane abaturage bafite imibereho iciriritse kuko umwana ubona amata buri munsi akura neza kandi akagira umubiri mwiza ndetse ntarwaragurike.

Umwanditsi:

Mugisha Benigne

2 Comments on “Guha abana amata biri mu buryo 3 bwuzuzanya mu kurwanya imirire mibi”

  1. ni byiza guha abana amata koko,ariko ndabona hari igikwiye, aba baturage bahererwa abana amata babifata nk’uburenganzira bwabo busanzwe bwa buri munsi,kuko niyo umwana akize ukamusezerera arabyanga akifuza guhora ayahabwa.
    Rero reka dusubire kuri uyu mugani ngo aho guha umwana ifi mwigishe kuyiroba. naho ubundi abaturage barimo gushaka guteteshwa ngo amata twayahawe na Nyakubahwa muduhe ibyacu.
    Ikindi n’uko usanga bakunze kugurisha kuko nta kuntu umwana ahabwa amata buri cyumweru aho kwiyongera ibiro bikagabanuka.ibyo mbivuzgiye ko hari imiryango ubona ntacyo amata abamariye.Ikindi dufite intambara hagati y’umwana uhabwa amata n’abo bava imdimwe aho usanga bayasaranganya bigatuma ntacyo amarira uwayahawe,ugasanga amata umuryango w’abantu barenga 5 barayasangiye.

    1. Amata ni meza,afite intungamubiri zihagije cyane cyane ibirebana mo kubaka umubiri,ariko si byiza kuyaha umwana nibura utaragira umwaka kuko iyo ayafashe atarayigeza si byiza rwose.
      Amata ni ibyo kurya by’mwana w’itungo inka rero atera igikuriro kwitungo byihuse dore ko ritanakeneye ubwenge.
      Bityo erero uyahaye umwana w’umuntu nibyo yagira igikuriro birumvikana ariko ntiyagira ubwnge bukenewe ku muntu.
      Duhe abana amata ariko abana nibura bageze ku kigero cy’umwaka ubundi yarabanje kubona amashereka ahagije.
      Ulimubenshi Jean Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.