19°C , Clear | Kigali-Rwanda
Biraro Obadian, Umugenzuzi mukuru w'imari ya Leta

Gucunga neza imari bigeza igihugu ku majyambere- Biraro

Yanditswe na MUGISHA BENIGNE

Ku ya 08-05-2018 saa 07:36:46

Umugenzuzi Mukuru w’Imari ya Leta, Biraro Obadiah, aratangaza ko Urwego rw’ubugenzuzi bw’imari ya Leta rufasha mu gukurikirana no kugenzura umutungo w’igihugu, ari na byo bigeza igihugu ku majyambere.

Biraro Obadian, Umugenzuzi mukuru w’imari ya Leta

Ibi yabivugiye mu nama yabaye kuri uyu wa Mbere, tariki ya 07 Gicurasi 2018 yahuje abashinzwe kugenzura umutungo n’imari mu bihugu 26 by’Afurika bikoresha ururimi rw’icyongereza mu rwego rwo kurebera hamwe uburyo uru rwego rwashyira  hamwe mu kungurana ubunararibonye no gukorera hamwe hagamijwe iterambere ry’ibi bihugu n’abaturage babyo.

Yagize ati “Muri iyi nama twe nk’Abanyarwanda turareba aho bageze n’ibyo baturusha, na bo barebe ibyacu n’icyo bashobora kutwigiraho, twese duhane amasomo tugamije guteza imbere abaturage b’ibihugu byacu”.

Biraro akomeza avuga ko ingengo y’imari ari ikintu gikomeye, ko hagomba kubaho ubugenzuzi buhoraho kandi bwimbitse kuko iyo idakoreshejwe neza ihera mu mibare ntibivemo ibyo umuturage akwiye kubona.

Ati “Muri raporo ya Transparency Internantional iheruka u Rwanda rwabaye urwa gatatu nyuma y’Ibirwa bya Maurice na Botswana, ariko intego dufite ni uko twazagera ku mwanya wa mbere, ibyo byose birashoboka mu gihe dushyizeho umurava tukagera kure, tukaza imbere y’ibi bihugu 2 bivuzwe haruguru”.

Avuga ko n’ubwo u Rwanda ruri ku mwanya mwiza nk’uwa gatatu, rugomba gukomeza kurahura ubwenge ku bandi bafite ubunararibonye bitewe n’ibipimo bya buri gihugu. Ati “Kwiga ni uguhozaho, ni ukurahura ubwenge tukabubyaza ibikorwa mugenda mubona hano mu Rwanda”.

Lara Taylor Pearce, umugenzuzi w’imari mu gihugu cya Sierre Leone, yavuze ko kugenzura imari n’imikoreshereze y’ingengo y’imari bifasha abaturage kugezwaho ibikubiye mu ngengo y’imari iba yatowe no kugenzura ko ikoreshwa neza mu nyungu z’abaturage b’igihugu.

Ati “Iyo tugenzura imari, tureba uko ingengo y’imari ingana n’uburyo yakoreshejwe, tukamenya ko ibyari bigenewe abaturage byabagezeho, kureba niba ibikorwaremezo byari biteganyijwe muri iyi ngengo y’imari byubatswe n’ibindi byinshi”.

Prof. Musa Djuma Assad, umugenzuzi w’imari muri Tanzaniya, avuga ko inshingano z’ubugenzuzi bw’imari muri iki gihugu ari ukugenzura imikoreshereze y’imari ya Leta, abagaragaweho ko bakoresheje nabi ingengo y’imari batumizwe mu Nteko Ishinga Amategeko bakabazwa amakosa yagaragayemo bagasubiza neza banasobanura uko byagenze.

Ati “Ubugenzuzi bw’imari mu gihugu butuma abayikoresha batinya kuko baba bazi neza ko bazabibazwa kandi bakabisobanura, bituma bigengesera mu kuyikoresha kandi bakagerageza kuyikoresha ibyagenwe”.

Abagenzuzi b’imari bitabiriye inama bahuriza ku kintu kimwe kijyanye no gukurikirana uko ingengo y’imari ikoreshwa n’uko igera ku baturage binyuze mu bikorwa bigamije iterambere ryabo.

 

 

 

 

TANGA IGITEKEREZO

Leave a Reply

Be the First to Comment!

avatar