21°C , Partly cloudy | Kigali-Rwanda
Umuhanzikazi Gracious

Gracious yavuze ku buhanzi bwe

Yanditswe na Ndamyirokoye Francois

Ku ya 31-10-2018 saa 17:43:22

Imanariyo Grace ukoresha mu buhanzi izina rya Gracious Grace avuga ko yatangiye kuririmba akiri muto ajya kuririmba mu makorali y’abana aho yasengeraga.

Mu bigo by’amashuri bitandukanye yagiye yigamo avuga ko yagiye yinjira mu matsinda atandukanye ajyanye no kuramya Imana ndetse no kuyihimbaza. Avuga ko kandi na n’ubu abarizwa mu matsinda 5 yo kuramya no guhimbaza.

Aho akura inganzo ye avuga ko atakwemeza neza aho ayikomora ngo gusa na nyina araririmba.

Ikerekezo ke mu buhanzi avuga ko yifuza ko indirimbo ahimba zajya zirushaho guhindura abantu mu buryo bwiza.

Avuga kandi ko afite ikifuzo cyo kuzajya akorana indirimbo n’abandi bahanzi yaba aba hano mu Rwanda ndetse n’abo mu bindi bihugu.

Uyu muhanzikazi ufite ubuhanga mu gucuranga Piano avuga ko akiri muto yajyaga abona abantu bacuranga akifuza kugira icyo amenya mu gucuranga akomeza kubikunda aza kubyiga by’umwihariko abifashijwemo na mugenzi we.

Kuva yatangira ubuhanzi avuga ko amaze kwandika indirimbo 17 ngo ariko indirimbo yasohoye mu buryo bw’amajwi ni ebyiri gusa.

Imbogamizi ahura nazo mu buhanzi avuga ko ari uko abangikanya ubuhanzi n’amasomo kuko yiga muri Leta zunze ubumwe z’Amerika ngo kandi n’aho aba gukora umuziki mu nzu zitunganya umuziki birahenze.

Abahanzi bandi bo mu Rwanda baririmba indirimbo zo kuramya Imana no kuyihimbaza akunda uburyo baririmba avuga ko ari benshi. Umwe muri bo yavuze ko ari Aimé Uwimana.

Ku rwego rw’Afurika avuga ko akunda Sinach ngo n’aho ku rwego rw’Isi akunda abahanzi benshi barimo Tasha Cobbs, Kari Jobe, Jonathan McReynolds, Hillsong n’abandi.

Umuhanzikazi Gracious

TANGA IGITEKEREZO

Leave a Reply

Your email address will not be published. Required fields are marked *