‘Goliyati araguye’, igitabo gikubiyemo uburyo bwo guca burundu ibiyobyabwenge

Yanditswe na Kayira Etienne

Ku ya 02-12-2019 saa 09:38:49
Umunyamabanga Uhoraho muri MINALOC Dusengiyumva Samuel (ibumso) ari hamwe na Dr. Musenyeri Bilindabagabo Alexis wanditse igitabo yise Goliyati araguye, gikubiyemo inyigisho zo kurwanya ibiyobyabwenge

Dr. Bilindabagabo Alexis wahoze ari Musenyeri mu Itorero ry’Abangilikani mu Rwanda, yashyize ahagaragara igitabo yanditse gikubiyemo inzira n’uburyo bwo guca burundu ibiyobyabwenge mu Rwanda. Icyo gitabo gifite umutwe ugira uti ‘Goliyati araguye’

Rev. Dr. Bilindabagabo wahoze ari Musenyeri wa diyoseze ya Gahini, aragereranya ibiyobyabwenge nk’igihanda karundura cyayogoje Isi, kizwi nka Goliyati muri Bibiliya, uzwi nk’umuntu w’umunyambaraga wari ugejeje habi ubwoko bw’Imana, ariko ngo akaza kwicwa na Dawidi wari ukiri umusore w’umugenda.

Dr. Bilindabagabo yagize ati «Dawidi yagendanaga n’Imana kuko uretse no kuba atari munini, nta n’intwaro zikomeye yari afite ndetse no guhorahoza Goliyati wari uguye yagombye gukoresha inkota ya nyiri ubwite.»

Dr. Bilindabagabo mu gitabo ke, agereranya Dawidi n’u Rwanda rutera ntiruterwe, ngo rukaba rudasiba kwesa imihigo ikomeye mu ruhando mpuzamahanga. Aragaragaza kandi ko ubushake bwa poritiki, imiyoborere myiza n’ubufatanye bw’Abanyarwanda ari ibanga rikomeye, ngo bikaba n’intwaro zizarugeza ku gihugu Abanyarwanda bifuza, ari rwo Rwanda ruzira ibiyobyabwenge.

Umwanditsi agaragaza ibyakozwe kuri iki kibazo k’ibiyobyabwenge yita icyorezo, akongera akavuga n’ibyo buri Munyarwanda wese asabwa kugira ngo ibiyobyabwenge birandurwe burundu.

Asobanurira abari bitabiriye umuhango wo kumurika igitabom, Musenyeri Bilindabagabo Alexis yakomeje agira ati «Muri iki gitabo kandi, hagaragazwa igihombo gikomeye giterwa n’ibiyobyabwenge ndetse n’inyungu nyinshi twese twabona mu gihe twaba tubisezereye mu gihugu. Nk’uko Imana yakoresheje Dawidi akica Goliyati nk’uko bigaragara mu gitabo cya mbere cya Samweli ibice 17, uhereye ku murongo wa 1 ukageza kuri 58, ni ko Imana yiteguye kudufasha Abanyarwanda tugaca burundu ibiyobyabwenge mu Rwanda.»

Intego y’Igitabo «Goliyati araguye», ngo ni ukugira ngo abantu bose bamenye ububi bw’ibiyobyabwenge kandi buri wese amenye uruhare rwe kugira ngo Abanyarwanda bose bature mu Rwanda rwiza bifuza.

Umwanditsi yasobanuye ikiyobyabwenge icyo ari cyo, agira ati «Ikiyobyabwenge ni ikintu cyose kinjira mu mubiri w’umuntu kigahindura ubushobozi bwe bwo gutekereza, gufata ibyemezo, ndetse kikanahindura imikorere y’umubiri.»

Kurwanya ibiyobyabwenge ni inshingano ya buri wese

Mu gitabo “Goliyati araguye”, Musenyeri Bilindabagabo asanga kurwanya ibiyobyabwenge byagombye kuba inshingano ya buri Munyarwanda wese, ashingiye ku buryo iki cyorezo kirimo kica urubyiruko kandi ari rwo maboko n’ejo hazaza h’u Rwanda.

Ati “Umunyarwanda wese afite inshingano yo kurwanya ibiyobyabwenge kuko byangiza ubuzima bw’umuntu, bisenya umuryango, bisenya igihugu ndetse bikangiza n’Isi.”

Icyo buri wese asabwa ngo ni ukwemera ko bishoboka, gukangurira buri wese kubigira ibye no kwirinda kurebera ikibi, kumenya amakuru ajyanye n’ibiyobyabwenge mu gace atuyemo. Harimo no kumenyesha inzego z’ubuyobozi n’abashinzwe umutekano mu gihe umenye ucuruza, ukwirakwiza n’ukoresha ibiyobyabwenge.

Ati “Zimwe mu nyungu zo guca ibiyobyabwenge ni izi zikurikira: Kwigirira ikireze no kukigirirwa n’abandi; Iterambere ry’umuntu, umuryango n’Igihugu; Imibereho myiza; kugira ibitekerezo byiza n’ubuzima bwiza; Umutekano mu muryango no kugira imiryango itarangwamo amakimbirane aterwa n’ibiyobyabwenge.”

Mu kiganiro kihariye yagiranye n’itangazamakuru nyuma yo kumurika igitabo yanditse kigamije kurwanya no guca burundu ibiyobyabwenge, Dr. Bilindabagabo yatangaje ko kwandika iki gitabo ngo yabitewe n’ibintu bibiri. Icya mbere ngo ni igihe yagiye gushyingura umusore umwe wishwe n’abasore bagenzi be bane bari bafashe ibiyobyabwenge, hanyuma ngo abona agahinda ababyeyi bagize bituma afata umwanzuro wo gushora imbaraga mu bukangurambaga bwo gukangurira Abanyarwanda kurwanya ibiyobyabwenge mu Rwanda.

Ikintu cya kabiri cyasunitse Musenyeri Bilindabagabo gutangira urugendo rwo kurwanya ibiyobyabwenge, ngo ni ubwo yitabiraga gahunda yo “Kwita ku mwana wese nk’uwawe”, yatangijwe na Madamu Jeannette Kagame, ubwo ngo ubwo bukangurambaga bwatangizwaga Dr. Bilindabagabo ahari, byamuteye umwete udasanzwe wo gukomeza ubukangurambaga yari yaratangiye bwo kwamagana ibiyobyabwenge.

Mu kiganiro n’Abanyamakuru yagize ati “Ikibazo nabonye gikomeye cyane mu kurwanya ibiyobyabwenge, ni uko abacuruza ibiyobyabwenge batagaragazwa neza ngo babe ari bo bahanwa kuko ari bo babifitemo inyungu z’indonke bavanamo.”

Yasabye ko umuntu wese uzi abacuruza ibiyobyabwenge bagomba gutangwaho amakuru, bagashyikirizwa inzego zishinzwe umutekano kugira ngo babiryozwe. Icyo abari aho bose bahurijeho, ni uko ngo igituma ibiyobyabwenge mu Rwanda bidacika, abenshi bafunzwe muri gereza ngo ni ababinywa ariko ababicuruza kandi ari bo ba nyirabayazana, ntibagaragazwa.

Bose banzuye ko umuti w’ikibazo ari ugutanga amazina y’ababicuruza bityo akaba ari bo bafatwa bagashyikirizwa ubutabera, kugira ngo bahanirwe icyaha cyo kuroga urubyiruko kandi ari rwo Rwanda rw’ejo hazaza.

Mu ijambo rya Dr. Ndimubanzi Patrick, Umunyamabanga wa Leta muri Minisiteri y’Ubuzima ushinzwe ubuvuzi rusange wari umushyitsi mukuru muri uwo muhango wo gushyira ahagaragara igitabo “Goliyati araguye”, yashimiye cyane Dr. Bilindabagabo Alexis ku musanzu atanze mu nyandiko izafasha Abanyarwanda kumenya neza ububi bw’ibiyobyabwenge n’uburyo bakoresha mu kubirwanya bigacika burundu.

Ati “Turashima intambwe tumaze gutera mu kurwanya iki cyorezo. Ariko twese tumenye ko iki kibazo ari icyacu. Umusanzu wa mbere ni ugutanga ubumenyi, uwa kabiri ni ugutanga amakuru”. Yibukije ko ubushakashatsi bugaragaza ko iyo umuntu akoresha ibiyobyabwenge, ngo nta rugingo na rumwe rudakorwaho.

Dr. Ndimubanzi yasoje ijambo rye ashishikariza urubyiruko kwirinda ibiyobyabwenge, anasaba ababyeyi kuba bugufi bw’abana no kubaganiriza kuri icyo kibazo hamwe no kwita ku bo byagize imbata bagafashwa kubivamo.

Uretse kuba ibiyobyabwenge byangiza ubizama bw’ubikoresha, ni nabyo ahanini nkomoko y’ibindi byaha nk’ibyihohotera byiganjemo gufata abana n’abagore ku ngufu, ihohotera mu muryango, gukubita no gukomeretsa, kuko uwabikoresheje nk’uko izina ryabyo riri ‘ibiyobyabwenge’ ubwenge buba bwayobye bigasigara bimukoresha.

Umwanditsi:

Kayira Etienne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.