18°C , Mostly cloudy | Kigali-Rwanda

Glory to God Temple, itorero ryiyemeje gusakaza ijambo ry’Imana ku isi

Yanditswe na Ntawitonda Jean Claude

Ku ya Oct 10, 2018 saa 4:58

Gusakaza ijambo ry’Imana ku Isi yose ni yo ntego nyamukuru y’Itorero Glory to God Temple rikorera mu Murenge wa Gatenga, Akarere ka Kicukiro.

Iri vugabutumwa bagambiriye kurikora bagendeye ku ijambo Yesu yabwiye intumwa azisaba kugenda amahanga yose bagahindura abantu abigisha be, abemeye bakabatizwa.

Bishop Jean Gatarayiha Sendahangarwa, Umuyobozi w’Itorero Glory to God Temple ahamya ko ryatangiye mu 2011.

Bishop Gatarayiha Gendahangarwa Jean, Umuyobozi w’Itorero Glory to God Temple

Ashimangira ko Ijambo rya Yesu Kristo ari ryo ryatumye  nk’Itorero ry’Umwuka (Pentecote) ryiyemeza gusakaza inkuru nziza ryigisha abantu ijambo ry’Imana riri muri Bibiliya ariko intego ari uko na bo bagomba kwigisha abandi.

Bahuza Abanyarwanda bakagirana ibiganiro bibateza imbere mu by’umwuka no mu bifatika, aho bagira ubushobozi bwo gusenga ndetse no kubasha kwigisha nyuma bagakora ibikorwa bibateza imbere n’igihugu muri rusange.

Bishop Gatarayiha avuga ko bafatanya na Leta mu kubaka igihugu kuko bigisha abantu gukora neza bubahiriza amategeko, akaba asanga uwubahirije amategeko ari muri Bibiliya yubaha n’amategeko y’igihugu.

Arasaba kandi gutandukanya abanyamafuti b’abavugabutumwa n’abakozi basizwe kuko hari igihe bafatirwa ibyemezo bikagira ingaruka no ku bakora neza.

Bishop Gatarayiha arasaba abakirisito gukora ibyo Yesu Kristo ashaka kugira ngo bamuheshe agaciro na bo bakihe, ati “Abanyabyaha bage babita aba shitani aho kubitiranya n’Abakirisito.”