19°C , Partly sunny | Kigali-Rwanda
Inyubako y'uruganda rwa Koperative Jyambere Muhinzi y'abaturage bahinga ibigori (Foto Nshimiyimana E)

Gisagara:Bishatsemo ibisubizo biyubakira uruganda rutunganya ibigori

Yanditswe na NSHIMIYIMANA EMMANUEL

Ku ya 09-02-2018 saa 07:30:04

Abaturage bo mu tugari tugeze Umurenge wa Mamba wo mu Karere ka Gisagara, barishimira ko kwibumbira muri Koperative KOJYAMUJYI byabafashije kongera umusaruro w’ibigori, banavanamo ubushobozi bwo kwiyubakira uruganda.

Inyubako y’uruganda rwa Koperative Jyambere Muhinzi y’abaturage bahinga ibigori (Foto Nshimiyimana E)

Bavuga ko kwibumbira hamwe byatumye bashobora kwitabwaho bakabona imbuto ku gihe, ndetse bagafashwa mu bikorwa bibafasha guhinga kinyamwuga, ari byo byavuyemo uruganda rutunganya ibigori bikavamo kawunga, ndetse rukanagurisha ibigori hirya no hino mu gihugu.

Rwamakuba Jean Damascene, utuye mu Murenge wa Mamba mu kagari ka Muyaga, avuga ko uruganda bungutse rwababereye igisubizo kubera impamvu nyinshi.

Aganira n’Imvaho Nshya yagize ati “Kwishyira hamwe tugahinga ibigori ni byo byatumye tuva no muri aka kandare k’inzara ishinze, kuko twunguka ubumenyi bwo guhinga neza ibigori ndetse tugahabwa imbuto nziza n’ifumbire kandi ubu dufite n’uruganda rudufasha gutunganya umusaruro.”

Uyu muturage kimwe n’abandi baganiriye n’Imvaho Nshya bemeza ko uruganda rwababarereye igisubizo cyo kubona isoko ry’umusaruro wa Koperative.

Kizanye Alphonsine, yagize ati “Uruganda ruradufasha cyane kuko dusarura tukajyana ku ruganda bakazaguha amafaranga cyangwa kawunga, mu gihe twabonaga kawunga yavuye kure ariko natwe ubu ujya ku ruganda wayishaka bakayiguha.”

Kabayiza Jean Claude, umucungamutungo w’uruganda rw’abahinzi b’ibigori ba Mamba, avuga ko kugeza magingo aya bafite abanyamuryango 4080 baboneka mu tugari twose tugize umurenge wa Mamba.

Kabayiza avuga ko muri iyi koperative habonekamo abagore 2000 ndetse n’abagabo 2080, ubu bakaba bageze kuri byinshi birimo kuvugurura ubuhinzi umusaruro ukiyongera, ari byo byatumye bagera ku rwego rwo gutungunya umusaruro.

Ati “Ubu umunyamuryango ashobora kuzana amafaranga akabona akawunga kimwe n’uko yazana ibigori akazatwara akawunga akeneye, inzira zose turazikoresha.”

Kabayiza kandi avuga ko kugeza uyu munsi uruganda rwafashije abahinzi kubona isoko ry’umusaruro, dore ko ngo bafite ibigori byiza bituma babona amabaruwa menshi y’abasaba kugura imbuto, ku buryo batabura isoko ry’imbuto n’iry’akawunga.

Umuyobozi w’Akarere ka Gisagara Rutaburingoga Jerome, na we agaragaza uru ruganda nka kimwe mu bigaragaza iterambere ry’ubuhinzi mu Karere, ndetse akanashimira abaturage nk’uko na Minisitiri w’ubuhinzi aherutse gushimira abahinzi b’ibigori ba Mamba ku bw’imbuto y’ibigori bagurisha abandi bahinzi b’ibigori mu Rwanda, mu gikorwa cyo gutangira icyumweru cyahariwe Girinka, cyabereye mu Murenge wa Mbamba.

Yagize ati “Mamba turabashimira ko mwabaye indashyikirwa muri iki gihembwe k’ihinga gishize aho na Minisitiri w’ubuhinzi yabigarutseho avuga ko ibigori mwejeje byabaye ibya mbere ku rwego rw’igihugu, natwe turabashimira uburyo mwabihinze neza.

Uburyo mwabifashe neza yarantumye ngo nzababwire muzakomereze aho, mukozemeze mukorane n’inganda bibafashe gukorana n’abashoramari batandukanye, kugira ngo mukire.”

 

 

 

 

 

 

 

TANGA IGITEKEREZO

Leave a Reply

Be the First to Comment!

avatar