25°C , Partly sunny | Kigali-Rwanda
Mureshyankwano Marie Rose Guverineri w'Intara y'Amajyepfo (uwa 4 iburyo) ari kumwe n'abandi bayobozi n'abubaka uruganda ruzabyaza amashanyarazi nyiramugengeri (Foto Nshimiyimana E)

Gisagara: Uruganda ruzabyaza amashanyarazi Nyiramugengeri rwitezweho impinduka

Yanditswe na NSHIMIYIMANA EMMANUEL

Ku ya 11-01-2018 saa 08:13:27

Guverineri w’Intara y’Amajyepfo Mureshyankwano Marie Rose yavuze ko umushinga wo kubaka uruganda ruzabyaza amashanyarazi nyiramugengeri ugenda neza kandi witezweho impinduka zikomeye mu gukwirakwiza amashanyarazi.

Mureshyankwano Marie Rose Guverineri w’Intara y’Amajyepfo (uwa 4 iburyo) ari kumwe n’abandi bayobozi n’abubaka uruganda ruzabyaza amashanyarazi nyiramugengeri (Foto Nshimiyimana E)

Yabitangaje ubwo yasuraga uru ruganda rurimo kubakwa mu Karere ka Gisagara, mu Murenge Mamba ku nkengero z’igishanga cy’Akanyaru kigabanya u Rwanda n’u Burundi.

Uru ruganda rwitezweho kuzatanga megawati 80 z’amashanyarazi, umushinga wo kurwubaka ukaba uzatwara  miliyoni 350 z’amadolari y’Amerika.

Guverineri Mureshyankwano yavuze ko uru ruganda  ruzabyaza amashanyarazi nyiramugengeri rutegerejweho gutanga 40% by’ingufu z’amashanyarazi.

Uyu mushinga ukaba witezweho impinduka zikomeye mu gukwirakwiza umuriro w’amashanyarazi mu gihugu ndetse no mu Ntara y’Amajyepfo ariko anashima ko wahaye abaturage akazi.

Yagize ati “Twasuye uyu mushinga uzatanga amashanyarazi akomotse kuri nyiramugengeri kandi ni umushinga mwiza cyane ufitiye akamaro abaturage kuko bazatanga amashanyarazi angana na 40% by’amashanyarazi yose akoreshwa mu gihugu. Niba hazaboneka 40% by’amashanyarazi akoreshwa mu gihugu byanze bikunze amashanyarazi aziyongera agere ku mubare munini w’abaturage, akaba ari umushinga twishimira nk’ubuyobozi bw’Intara y’Amajyepfo kuko uzageza  amashanyarazi ku Banyarwanda benshi by’umwihariko n’abaturage b’Intara y’Amajyepfo.”

Mureshyankwano atangaza ko nibura muri Werurwe mu 2020 uyu mushinga uzaba wararangiye abaturage batangiye kubona amashanyarazi bivuye kuri nyiramugengeri.

Ku rundi ruhande kandi anashima ko uruganda rwatanze akazi mu mirimo itandukanye yo kurwubaka. Yishimiye nkandi ko ibikorwa by’uyu munshinga birimo kwihutishwa.

Ati “Mperuka hano ari bwo bagitangira gusiza ariko ngereranyije n’amezi bamaze ahangaha barimo barihuta cyane ntekereza ko bazarangiriza ku gihe.”

Umuyobozi w’Akarere ka Gisagara Rutaburingoga Jerome na we agaruka ku kuba uru ruganda rwarabashije guha akazi abatari bake, akavuga ko ibikorwa by’uru ruganda byatangiye kuzana impinduka zigaragara ku baturage batuye aho rurimo kubakwa.

Ati “Bateganya gutanga akazi ku baturage 1000 ariko ubu bamaze guha akazi abageze kuri 800 kandi gahunda irakomeje ariko biranongera gushora imari hano hafi kuko hari abatangiye kuhubaka, hari abahubatse  amazu 34 y’abakozi b’uruganda.”

Bamwe mu baturage bahabonye akazi nabo bavuga ko uyu mushinga wagize akamaro mu iterambere ryabo kuko babonye akazi.

Gasana Gerard ukora akazi k’izamu ati “Nkora akazi kandi bampembera ukwezi kuko ndara izamu kandi ikiza amafaranga y’ukwezi uba uyizeye kuko byanze bikunze urayabona.”

Avuga kandi ko benshi mu baturage bari bahafite imirima babonye ingurane ishimishije kuko avuga ko babonye amafaranga batashoboraga kubona iyo bagurisha ubutaka bwabo n’abaturage bagenzi babo ariko ngo kubaha ingurane ikwiye byatumye bigurira ubundi butaka ndetse babasha no kubaka amazu meza ku masantere yabo atera imbere.

TANGA IGITEKEREZO

Leave a Reply

Be the First to Comment!

avatar