26°C , Partly sunny | Kigali-Rwanda
Aha ni ho hazubakwa uruganda ruzabyaza amashanyarazi nyiramugengeri (Foto Nshimiyimana E)

Gisagara: Umushinga wo kubaka uruganda rwa nyiramugengeri wazamuye iterambere rya Mamba

Yanditswe na NSHIMIYIMANA EMMANUEL

Ku ya 21-02-2018 saa 07:21:06

Abaturage bo mu karere ka Gisagara mu Murenge wa Mamba baturiye aharimo kubakwa uruganda rubyaza amashanyarazi nyiramugengeri, barahamya ko ibikorwa by’uyu mushinga byabafashije kwiteza imbere

Aha ni ho hazubakwa uruganda ruzabyaza amashanyarazi nyiramugengeri (Foto Nshimiyimana E

Uruganda ruzabyazwa amashanyarazi nyiramugengeri rurubakwa mu kagari ka Kabumbwe hafi y’igishanga cy’Akanyaru. Ni umushinga mugari biteganyijwe ko uzatwara miliyoni 350 z’Amadorari.

Abaturage baturiye aharimo gukorerwa ibikorwa by’uyu mushinga mugari bavuga ko bawukesha iterambere, kuko harimo abamaze kubonamo akazi mu buryo butandukanye bakaba bahembwa, mu gihe abari bafite ubutaka bwakoreweho uyu mushinga nabo ngo babonye ingurane ihagije, baheraho biteza imbere.

Ku rundi ruhande kandi banavuga ko aka gace kanahinduye isura bigatuma abantu benshi bahita baza kuhubaka bakurikiye ibi bikorwa by’amajyambere begerejwe.

Gasana Gerard, ukora akazi k’izamu aho uyu mushinga urimo gukorerwa, yagize ati:”Nkora akazi ko kurara izamu ahakorerwa ibi bikorwa kandi bampembera ukwezi, ikiza amafaranga y’ukwezi uba uyizeye kuko byanze bikunze urayabona nta kibazo.”

Mugenzi we Nsekanabo Jean Claude, nawe ashima ko ibikorwa by’uyu mushinga byahinduye isura y’agace batuyemo, ndetse akavuga ko bashimishwa n’ingurane bahawe.

Yagize ati:”Kuva ibikorwa byo kubaka byatangira ubona ino harahise hatera imbere, kubera abantu baje kuhakorera hari abandi bahise bahubaka harushaho kuba heza.”

Ku bijyanye n’ingurane yagize ati:”Urebye nk’abari bahafite imirima n’amasambu n’amazu, hari abahawe za miliyoni 16 cyangwa 18 ukabona nk’umuntu ufite umurima yigurishirije n’umuturage bisanzwe bitarenga nka miliyoni 1 ariko ukumva umurima awubonyeho nka miliyoni 10.

Urebye nko kuri santere zacu nka hano Kabumbwe wabona ko abantu bafite amafaranga imibereho yahindutse, abari bahafite amazu yagize agaciro iyakodeshwaga ibihumbi 3 ubu irakodeshwa ibihumbi 15 cyangwa 20.”

Iby’iterambere ryazanwe n’ibi bikorwa kandi binashimangirwa n’Umuyobozi w’Akarere ka Gisagara Rutaburingoga Jerome, nawe uvuga ko muri aka gace habonetse impinduka zigaragara.

Yagize ati:”Bateganya gutanga akazi ku baturage 1000 ariko ubu bamaze guha akazi abageze kuri 800 kandi gahunda irakomeje, ariko biranongera gushora imari hano hafi kuko hari abatangiye kuhubaka utubari, bahise bahubaka amazu 34 y’abakozi b’uruganda.”

Rutaburingiga yishimira ko mu mafaranga abakozi bishyurwa amenshi aguma mu Murenge n’Akagari, bityo umuturage uhaturiye nawe akagira inyungu.

Yagize ati:”Ibyo umuturage akeneye kugurisha azabona aho abigurisha abona amafaranga menshi kandi bugufi, kuko aho ari hari amafaranga kandi byihutisha iterambere kuko urebye uburyo bavugurura amasantere bigaragaza ko uruganda rwatanze amikoro mu baturage.”

TANGA IGITEKEREZO

Leave a Reply

Be the First to Comment!

avatar