21°C , Partly cloudy | Kigali-Rwanda
Kanimba Donatila, Umuyobozi Nshingwabikorwa w'Ubumwe nyarwanda bw'abatabona RUB

Gisagara: Hazakorwa urugendo rwo kwerekana inkoni yera

Yanditswe na KAYITARE JEAN PAUL

Ku ya 15-10-2018 saa 08:29:50

Umuyobozi Nshingwabikorwa w’Ubumwe nyarwanda bw’abatabona, RUB, Kanimba Donatila, atangaza ko ku munsi mpuzamahanga w’inkoni yera ikoreshwa n’abafite ubumuga bwo kutabona uzizihizwa tariki 24 Ukwakira 2018 mu karere ka Gisagara mu Ntara y’Amajyepfo, hazakorwa urugendo rwo kwerekana inkoni yera ariko akanagaragaza ko abafite ubumuga kubona iyi nkoni bikigoye.

Kanimba asobanura ko kuri uwo munsi hari byinshi bizakorwa ko uretse urugendo rwo kwerekana inkoni yera, hazanamurikwa bimwe mu bikorwa abafite ubumuga bwo kutabona bajya bakora birimo no kudoda imipira yo kwifubika.

Yagize ati “Tuzakora urugendo rwo kwerekana inkoni yera, hanyuma tunahurire hamwe mu cyumba k’inama tugirane ibiganiro, abafite ubumuga bwo kutabona bakazagira umwanya wo kwerekana ibikorwa byabo, abandi berekane ibyo bakora kuko nko mu karere ka Gisagara hari amashyirahamwe dufite akora ibintu by’ubukorikori, abakora ubucuruzi, ababoha imipira y’imbeho ikoze mu budodo, abo bose ni ko bazamurika ibyo bakora.”

Agaragaza ko hakiri imbogamizi zo kubona inkoni yera no kutagira uburyo bwo koroherezwa kuyibona. Ati “Hari abafite inkoni yera n’abatayifite kuko kuyibona nta bwo byoroshye, nta buryo bwo kuyitanga cyangwa korohereza abantu kuyigura. Nk’igihe twe twazibonye, turazitanga cyangwa tukorohereza abashaka kugira abo bazigurira.”

Kanimba Donatila, Umuyobozi Nshingwabikorwa w’Ubumwe nyarwanda bw’abatabona RUB

Kanimba avuga kandi ko hari igihe babona abagiraneza bazitanga ariko kuvuga ko umuntu ku giti ke yahaguruka akajya kuyishakira, atakwizera ko yahita ayibona, agashimangira ko bitoroshye kuko zitagurishwa mu Rwanda.

Umunyamabanga Nshingwabikorwa w’Inama y’igihugu y’abafite ubumuga NCPD, Ndayisaba Emmanuel, avuga ko hari byinshi bakorera abafite ubumuga muri rusange ariko by’umwihariko abafite ubumuga bwo kutabona, NCPD ibafasha gukura inkoni zera ziri muri gasutamo batazisoreye, ikindi kandi hari abo bazigurira.

Ati “Iyo bazizanye mu gihugu ikintu cya mbere tubakorera tubafasha muri gasutamo bakazikuramo batazisoreye. Icya kabiri ni uko natwe ubwacu nk’inama y’igihugu y’abafite ubumuga, hari abo tuzigurira.”

Akomeza avuga ko mu mwaka wa 2016, NPCD ku bufatanye na Minisiteri y’Ubutegetsi bw’igihugu MINALOC, baguriye abana inkoni 150 b’i Gatagara mu karere ka Rwamagana, akagaragaza ko ari ibishoboka byaba byiza mu gihugu bazikorera.

Ati “Mu gihugu byakabaye byiza tubanje kuzikorera ariko ntituragera kuri ubwo bushobozi, ariko nkuko dukora insimburangingo twatangiye kugera ku ntera yo hejuru, n’ibindi bizagenda biza kuko turabitekereza.”

Ashishikariza abafite ubumuga bwo kutabona kujya begera ubuyobozi bw’akarere batuyemo kuko n’uturere tujya tugurira inkoni yera abafite ubumuga bwo kutabona.

Umuyobozi bwa RUB, buvuga ko bufite ikigo cy’amahugurwa gihugura abafite ubumuga bwo kutabona, bimwe mu byo bahugurwamo akaba ari ugukoresha inkoni yera, akagaragaza ko inkoni umuntu yahuguriweho ayitwara.

Ashimangira ko abantu bataramenya akamaro k’inkoni yera n’icyo isobanura ndetse nuko ikora. Ati “Usanga umuntu ufite ubumuga bwo kutabona iyo afite inkoni yera ari mu rugo iwe, abandi barayimutwara cyangwa bakayimutira bakayigendana. Ibyo ubundi ni amakosa kuko ibyo biba ari ukubeshya abantu ko uyifite, afite ubumuga cyangwa akaba yayikoresha mu kugira nabi.”

Insanganyamatsiko y’uyu mwaka iragira iti ‘Kubaha inkoni yera, gushyigikira abafite ubumuga bwo kutabona’.

TANGA IGITEKEREZO

Leave a Reply

Your email address will not be published. Required fields are marked *