21°C , Partly cloudy | Kigali-Rwanda
Iki ni igishanga cya Duwani kiri hagati y'Akarere ka Gisagara na Huye (Foto Nshimiyimana E)

Gisagara: Gutunganya ibishanga byongereye umusaruro bakura mu buhinzi

Yanditswe na NSHIMIYIMANA EMMANUEL

Ku ya 14-10-2018 saa 19:19:46

Abahinga igishanga cya Duwani, mu Kagari ka Duwani mu Murenge wa Kibilizi barishimira ko gahunda y’igihugu yo gutunganya ibishanga yatumye umusaruro wiyongera bakabona ibiribwa bihagije.

Iki gishanga kiri mu Karere ka Gisagara ahahana imbibi n’Akarere ka Huye kikaba kimaze imyaka 3 gitunganyijwe.

Abaturage bahinga muri iki gishanga bemeza ko kugitunganya byongereye umusaruro ugereranyije n’uko byahoze.

Nziyonizeye Mark uhinga muri iki gishanga ati: “Mbere twihingiraga ibyo dushaka, ugasanga hariya hahinze amateke undi agahinga ibijumba undi ibirayi ntitubone umusaruro ushimishije ariko aho igishanga gitunganyirijwe umuceri uraboneka, cyaba ari igihe cyo guhinga ibigori cyangwa ibindi ukabona umusaruro ushimishije.”

Uyu mugabo avuga ko mbere yasaruraga ibiro nka 50, ubu akaba ageze ku rwego rwo kuba yasarura imifuka iri hagati y’ibiri n’itatu.

Mukankomeje Marie na we uhinga muri iki gishanga avuga ko kugitunganya ari byo byatumye babona umusaruro, ariko mbere ngo baragihingaga bagahomba kubera ko nta buryo bwo kuyobora amazi cyari gifite.

Ati:“Mbere kitaratunganywa ahubwo hari ubwo wahingaga bikagenda kuko imirima yanatwarwaga isuri, imirima ikarengerwa n’imyaka ikarengwaho, ariko uyu munsi igishanga cyaciwemo imiyoboro ijyana amazi nta kibazo dufite”.

Ikindi mu byo bagaragaza nk’ibyongereye umusaruo ni ifumbire bahabwa n’ubwo bifuza ko bazajya bayigurizwa bakajya bishyura basaruye kugira ngo hatagira ubura uburyo bwo gufumbira.

Umuyobozi w’Akarere ka Gisagara ushinzwe iterambere ry’ubukungu Hanganimana Jean Paul, avuga ko hazabaho kuganira n’abayobozi b’amakoperative y’abahinga muri iki gishanga kugira ngo harebwe niba abaturage bajya bahabwa ifumbire mu buryo babyifuza.

Yagize ati: “Iyo bari muri koperative biba byoroshye kuko koperative ishobora kwishingira abahinzi ikaba yagura ifumbire noneho kuko umuturage aba azacisha umusaruro muri koperative akazajya yishyura koperative aho gukorana n’abacuruzi bacuruza inyongeramusaruro”.

Iki ni igishanga cya Duwani kiri hagati y’Akarere ka Gisagara na Huye (Foto Nshimiyimana E)

Yemeranywa n’abaturage ku kwiyongera k’umusaruro wazamuwe no gutunganya ibishanga. Ati: “Ku birebana n’umusaruro, ugenda uzamuka kuko umuceri tugeze kuri toni 5 kuri hegitari imwe, mu gihe mbere yo kugitunganya wari munsi ya toni 4, mu by’ukuri ugenda uzamuka ariko ntituragera aho tugomba kugera.”

Hanganimana avuga ko intego ari uko bazagera kuri toni 8 kuri hegitari imwe, na ho mu Karere ngo hakaba hamaze gutunganywa hegitari zigeze ku 2500, bakaba bateganya gutunganya izindi ibihumbi 3, ngo bikazakorwa ku bufatanye bw’Ikigo k’Igihugu gishinzwe Ubuhinzi n’Ubworozi (RAB).

TANGA IGITEKEREZO

Leave a Reply

Your email address will not be published. Required fields are marked *