18°C , Partly sunny | Kigali-Rwanda

Gisagara: Girinka yakuye mu bukene abaturage basaga ibihumbi 11

Yanditswe na admin

Ku ya 13-02-2018 saa 05:59:05

Ubuyobozi bw’Akarere ka Gisagara n’abaturage, burashimira Perezida wa Repubulika Paul Kagame, watangije gahunda ya Girinka Munyarwanda, yafashije abaturage 11 120 kwikura mu bukene, mu myaka 11 ishize.

Gahunda ya Girinka yafashije abaturage kwikura mu bukene

Umuyobozi w’Akarere ka Gisagara Rutaburingoga Jerome, avuga ko abaturage bahawe inka muri Girinka bazibyaje umusaruro ufatika, kuko babashije kunywa amata imirire mibi ikaba amateka, andi bakayagurisha bakinjiza amafaranga yabafashije kwihutisha iterambere ryabo, ubukene burahunga.

Uretse umusaruro w’amata, ifumbire itangwa n’izi nka ngo abaturage bayifumbije imirima yabo irushaho gutanga umusaruro mwiza w’ubuhinzi, imibereho y’abahoze mu byiciro by’abatishoboye irahinduka ku buryo bugaragarira buri wese.

Yagize ati “Muzakurikirane abahinga bagafumbira ni bo bakire dufite mu giturage. Nubona inka umenye ko umusaruro wezaga uzikuba nibura 2 aho wezaga ibilo 500 uzeza toni, ni byiza ko twumva ko inka ifitanye isano n’umwuga dukora w’ubuhinzi.”

Meya Rutaburingoga by’umwihariko ashimira aba baturage ko inka bahawe bazifashe neza, bakazibyaza umusaruro kandi bakibuka kwitura, ari nabyo byatumye izi nka zigera kuri benshi.

Yabasabye kandi kwakirana amaboko yombi uyu mugisha w’ubukire bakesha Umukuru w’igihugu, ndetse n’abataragerwaho n’iyi gahunda abibutsa ko bashonje bahishiwe.

Yagize ati “Kuba twaragize Umukuru w’Igihugu uvuga ngo buri munyarwanda agire inka ni umugisha w’ubukire, nkaba mbasaba kuwakira kandi nk’uko yabivuze buri wese azabona inka, ahubwo mugende mwubake ibiraro kuko niba Umukuru w’Igihugu yarabivuze buri wese akwiye kubyitegura.”

Umuyobozi wa Gahunda ya Girinka Munyarwanda ku rwego rw’Igihugu Dr. Kanyandekwe Christine, yasabye abaturage bo muri aka karere ko kugeza tariki ya 15 uku kwezi ari umwanya wo kungurana ibitekerezo ku buryo barushaho kubyaza umusaruro Girinka, kugira ngo iterambere ryabo rirusheho kwihuta.

Ati “Iki ni icyumweru cyo gukoramo imirimo itandukanye ya Girinka ku bufatanye n’inzego zitandukanye, abaturage n’aborozi nabo bagakora ibikorwa bitandukanye birimo korozanya no kwigishanya gufata inka neza no kwibukiranya amabwiriza ya Gahunda ya Girinka, no gufasha abatishoboye kubona ibiraro n’ibindi.”

Abaturage bo muri aka karere, bo bavuga ko iterambere bagejejweho na Girinka rigaragarira buri wese, kuko ubu bamwe bahoze mu kiciro cy’abakene ari bo ubu batunze za moto zikorera amafaranga, abandi biyubakiye inzu nziza, abandi bagura amasambu n’indi mitungo y’agaciro kanini.

Ntamfurayinda Martin, wo mu Murenge wa Mamba mu Kagari ka Muyaga, yagize ati “Nahawe inka kandi yarankenuye mbasha kubona amata, mbona ifumbire, ubu maze kugera ku iterambere rishimishije rwose, kuko n’umusaruro w’ubuhinzi wariyongereye, ubukene twabusezeyeho rwose.

Aba baturage bashimira cyane Umukuru w’igihugu washyizeho iyi gahunda yabahinduriye imibereho, bakavuga ko nabo bazaharanira ko na bagenzi babo batera imbere, kugira ngo ibyiza bakesha imiyoborere myiza bigere kuri buri munyarwanda.

 

 

TANGA IGITEKEREZO

Leave a Reply

Be the First to Comment!

avatar