20°C , Partly sunny | Kigali-Rwanda

Gisagara: Gahunda yo gutura ku mudugudu yazamuye imyumvire y’abaturage

Yanditswe na NSHIMIYIMANA EMMANUEL

Ku ya 16-04-2018 saa 07:10:07

Abaturage bo mu karere ka Gisagara, baravuga ko gahunda yo gutura mu midugudu yatumye kubagezaho ibikorwaremezo byoroha, ndetse n’iterambere ryabo rikarushaho kwihuta, byose bishingiye ku kuba imyumvire yarazamutse, buri wese aharanira kudasigara inyuma.

Abatuye muri uyu mudugudu bishimira ko ubu bacana amashanyarazi kandi bataratekerezaga ko azabageraho vuba

Ni ibivugwa n’abatuye mu mudugudu wa Gatobotobo uri mu kagari ka Bweya, Umurenge wa Ndora mu karere ka Gisagara, bahamya ko ubu batakiri mu bwigunge, kuko gahunda za Leta zigamije gufasha abaturage kwihutisha iterambere no kuzamura imibereho yabo zibageraho mu buryo bworoshye.

Uwihoreye Jean Bosco yagize ati “Gutura ku mudugudu ntitwabanje kubyumva kimwe, ariko ubu twese turabyishimiye kuko bituma ibikorwaremezo bitwegera, ariko binatuma umuntu ahindura imyitwarire n’imikorere.

Tutarajya ku mudugudu n’isuku yari ikibazo, ariko iyo ubonye mugenzi wawe yakarabye yanameshe na we urabyibwiriza, kuko ubwawe ushobora kureba ugasanga ntusa n’abandi ibyo bikakuzamo nta n’ubikubwiye.”

Uwanyirigira Florence, na we utuye muri uyu mudugudu wa Gatobotobo yagize ati “Iyo uri kumwe n’abandi ugerageza guhindura imyumvire n’imikorere, hari byinshi wigira ku baturanyi bawe mwegeranye kuko n’iyo ubonye umwana w’umuturanyi wawe agiye ku ishuri, na we uharanira ko n’uwawe ajyayo, usibye ko n’umwana ubwe yabikwibutsa.”

Aba baturage bavuga ko magingo aya bafite ibikorwaremezo by’ibanze bibafasha kwihutisha iterambere, kandi ngo iyo bakomeza gutura mu manegeka bahozemo kubibagezaho ntibyari kuzashoboka vuba.

Umunyamabanga Nshingwabikorwa w’Umurenge wa Ndora, Umumararungu Solange, avuga ko gahunda yo gutuza abaturage ku mudugudu ibafasha gutera imbere vuba, by’umwihariko bakumva ndetse bagashyira mu bikorwa gahunda za Leta zigamije iterambere ry’imibereho myiza yabo.

Ati “Nk’uko babyishimira ni byo koko n’iyo ugiye kubareba ubasanga hafi kandi n’iyo iterambere rije ribasanga hafi, ndetse nk’uko babivuga iyo umuntu yegereye mugenzi we usanga amwigiraho ibyiza byinshi.”

Yakomeje agira ati “Nk’ibijyanye n’isuku iyo umuntu aturanye na mugenzi we akabona akubura, akabona yoza abana abohereza ku ishuri, na we bimutera ishyaka ryo kubikora, tukabona rero gutura ku mudugudu ari igikorwa kiza cyo gufasha abaturage kugera ku iterambere ryuzuye kandi rirambye.”

TANGA IGITEKEREZO

Leave a Reply

Be the First to Comment!

avatar