20°C , Partly cloudy | Kigali-Rwanda
Ingabo, abaturage ndetse n'ubuyobozi barafatanya mu gikorwa cyo guhinga imyumbati (Ifoto Nshimiyimana E)

Gisagara: Barashima byinshi bakesha ibikorwa by’ingabo mu iterambere ry’abaturage

Yanditswe na Nshimiyimana Emmanuel

Ku ya 19-04-2019 saa 08:28:00

Abaturage kimwe n’ubuyobozi mu Karere ka Gisagara barashima uruhare rw’ibikorwa by’Ingabo z’u Rwanda mu iterambere ryabo bakavuga ko ruvuze byinshi birimo imibanire myiza bafitanye n’ingabo ndetse n’iterambere ry’ubukungu muri rusange.

Byagarutswe mu Murenge wa Kibilizi mu Kagali ka Ruturo, ahatangirijwe ibikorwa biri muri gahunda y’igikorwa by’ingabo mu iterambere ry’abaturage, ahahinzwe imyumbati ku buso bwa hegitari zigeze kuri 5.

Umuyobozi w’Akarere ka Gisagara, Rutaburingoga Jerome, agaragaza ko iyi gahunda imaze kuzana impinduka nyinshi mu iterambere ry’akarere.

Yagize ati “Iyi gahunda umwaka ushize twarayikoze idufasha guca inzara mu baturage nk’uko mubizi hahizwe ibintu bitandukanye birimo ibijumba birimo imyumbati, hahigwa ibishanga mbese ibintu byose byatuma umuturage atagira inzara nibyo twafatanyije. ”

Muri rusange, Rutaburingoga yemeza ko iki gikorwa nk’akarere bakitezeho byinshi, ati “Ni gahunda twitezeho byinshi, kuko nk’umwaka ushize dufatanyije n’Ingabo twubatse inzu zisaga magana abiri na mingo itanu (250) ”

Avuga ko ibikorwa bazafatanya n’Ingabo bimara amezi 3 bizaba birimo ibikorwa by’ubuhinzi, ubuvuzi ndetse no kubakira abatishoboye amacumbi byose avuga ko bivuze ikintu gikomeye mu mibanire myiza y’ingabo z’u Rwanda n’abaturage muri rusange.

Gusa imibanire myiza y’Ingabo z’u Rwanda n’abaturage, igarukwaho na bamwe mu baturage bishimira kongera kubona imbuto y’imyumbati izagera kuri benshi ariko by’umwihariko bakavuga ko bi bikorwa bigaragaza ko igisirikare cy’u Rwanda gihabanye n’icy’ingabo zitsinzwe.

Ntahondereye Emmanuel uri mu kigiro cy’imyaka 57, yagize ati “Iyo haje n’Ingabo natwe twifuza kuza gukorana na zo kuko zidushyiramo n’umwete bikagaragara ko twese dufite ubushake bwo gukora kandi nabo ntibiganda iyo barimo bakora wumva ari byiza kugendana nabo. ”

Avuga kandi ko ibikorwa nk’ibi byabakijeje ubwoba bwo kwishisha abasirikare kuko ngo kwegera umusirikare ntibyabagaho, yagize ati “Iyo twabonaga basirakare cyera twarabahungaga ariko mbere n’ubuyobozi twarabuhungaga cyane kuko hari imodoka bitaga uruhumbangegera, umugabo wese ubonye imodoka ya Leta akirukanka. ”

Ntahondereye ati “Ariko uyu munsi ingabo iraza ikakuganiriza mugafatanya ukabona ari byiza cyane kandi bishimangiye umubano n’ubufatanye, mbese iyi Leta ubona ko iruta izindi Leta zagiye zibaho mbere. ”

Ku rundi ruhande kandi abaturage bo mu murenge wa Kibikizi bishimira ko ikibazo cy’imbuto y’imyumbati kigiye gukemuka kuko ngo n’ubwo imbuto yatangiye kongera kuboneka ariko ngo yari itaragera kuri benshi.

Mukankusi Anne marie ati, ” Mu mwaka ushize nibwo twari twatangiye kubona imbuto y’imyumbati tukagenda tuyisaranganya ariko ukabona ko ikiri nkeya ariko turizeko noneho ubwo dubonye imbuto izahingwa ahantu haganga gutya byanze bikunze ikibazo kiracyemuka itugereho twese. ”

Abaturage muri rusange bemeza ko mu bihe byashize bigeze kugire ikibazo gikomeye cy’inzara ndetse ngo bakajya bajya gushaka imyumbati mu cyahoze ari perefegitura ya Gitarama ariko ngo uyu munsi kubera imbaraga Leta yakoresheje mu guhangana n’inzara ubugari burahari ndetse n’imyumbati barayifite n’ubwo bagikeneye kurushaho kongera umusaruro.

Ubuyobozi kandi bushamangira ko imbuto y’imyumbati usibye mu Murenge wa Kibikizi ngo imbuto izanagezwa mu yindi Mirenge yose igize akarere ka Gisagara.

Ingabo, abaturage ndetse n’ubuyobozi barafatanya mu gikorwa cyo guhinga imyumbati (Ifoto Nshimiyimana E)

Abaturage n’ingabo bafite gahunda yo guhinga ubuso bungana na hegitari 5 (Ifoto Nshimiyimana E)

Abaturage bitabiriye igikorwa ari benshi (Ifoto Nshimiyimana E)

TANGA IGITEKEREZO

Leave a Reply

Your email address will not be published. Required fields are marked *