18°C , Mostly cloudy | Kigali-Rwanda
Abaturage bahawe imbuto yo mu bwoko bwa Fiya 17 na Fiya 25 ( Foto Nshimiyimana E.)

Gisagara: Abaturage bashyikirijwe imbuto y’urutoki rwa kijyambere

Yanditswe na NSHIMIYIMANA EMMANUEL

Ku ya 11-10-2018 saa 18:50:12

Umunyamabanga wa Leta muri Minisiteri y’Ubuhinzi n’Ubworozi Nsengiyumva Fulgence yatangaje ko hari gahunda yo kuvugurura urutoki mu Rwanda ku buryo nibura mu mwaka wa 2024 bizaba bigaragara ko hari impinduka zakozwe kandi zigaragara mu turere tunyuranye.

Yabigarutseho mu Murenge wa Kibilizi, mu Karere ka Gisagara mu gikorwa cyo gushyikiriza abaturage imbuto y’urutoki ruvuguruye yo mu bwoko butandukanye harimo Fiya 17 na Fiya 25, imbuto yahise inahingwa mu mirima y’abaturage ifite ubuso bwa hegitari 4.

Nsengiyumva yagize ati: “Nk’uko tubiteganya muri iyi manda ya Nyakubahwa Perezi wa Repubulika kugeze mu mwaka wa 2024, twifuza ko byaba bigaragarira buri wese ko hari impinduka mu buhinzi mu gihugu. Uyu mushinga ntabwo urimo gukorerwa ino gusa, dufite abafatanyabikorwa hano muri Gisagara, Care International Rwanda na Duhamic-Adri n’abandi barimo kuwukorera mu tundi turere 5 natwo dufite ikibazo cy’urutoki rutari rwiza”.

Avuga kandi ko muri iki kirekezo bafatanyije n’Ishami ry’Umuryango w’Abibumbye ryita ku buhinzi n’ibiribwa (FAO), bazakorana mu turere twa Rubavu, Karongi, Muhanga, Kamonyi ndetse n’Akarere ka Rwamagana kandi ngo uwo mushinga ukazamara imyaka 2 nyuma ukaba wakwerekeza mu tundi turere.

Yibukije ko igihingwa cy’urutoki kiri mu bifite isoko kuko abana babona ibiribwa ndetse kikavamo n’ibinyobwa cyane ko muri aka karere hasanzwe hari n’uruganda rutunganya umusaruro rugakoramo urwangwa n’umutobe.

Nsengiyumva yasabye abaturage babonye insina ku ikubitiro kuzafasha n’abandi kubona imbuto kugira ngo umubare munini ubashe kubona imbuto itanga umusaruro ushyitse.

Abaturage bahawe imbuto yo mu bwoko bwa Fiya 17 na Fiya 25 ( Foto Nshimiyimana E.)

Bamwe mu baturage baganiriye n’Imvaho Nshya bemeza ko banejejwe n’iki gikorwa ndetse ko bazi neza ko ubu bwoko bw’insina butanga umusaruro.

Mukambayire Felicité yagize ati: “Ndishimye kuko batwegereje imbuto, tuzi ko yera cyane ariko ntabwo twari dufite amafaranga yo kuyigura, ariko ikiza ni uko Minisitri yavuze ko abahawe mbere natwe bazajya baduha imbuto tugatera”.

Muri iki gikorwa kandi hanajemo bamwe mu bahinzi biteje imbere babikesha izi nsina bemeza ko ubuhinzi bw’izi nsina iyo bwitaweho bushobora guteza imbere ubukora.

Kabandana Dominique, ni umwe mu bahinzi b’urutoki ntangarugero wari witabiriye igikorwa cyo gufasha abaturage kumva neza ubuhinzi bw’izi nsina na we akaba yemeza ko umuhinzi witabiriye ubu bwoko bw’insina atabura gutera imbere.

Avuga ko mu myaka amaze ahinga uru rutoki byamufashije, abana be bakiga neza, akagura inka 8 zitanga umukamo utubutse ndetse ngo akaba afite ubushobozi bwo kwinjiza ibihumbi 500 ku kwezi, akanakoresha abakozi 18 mu buryo buhoraho bamufasha gukurikirana urutoki ahinga ku buso bwa hegitari 5.

Yagize ati “Ibyo navuga nagezeho ni byinshi kandi ubu buhinzi bw’urutoki rwa kijyambere ni kimwe mu bitanga inyungu cyane, isoko riraboneka, ntabwo waba ufite ibitoki ngo uvuge ko wabura isoko”.

Abahawe imbuto y’urutoki rwa kijyambere basabwe kwita kuri ubu buhinzi buvuguruye bakabubyaza umusaruro, bakiteza imbere kandi no ku masoko umusaruro ukaboneka uhagije.

TANGA IGITEKEREZO

Leave a Reply

Your email address will not be published. Required fields are marked *