21°C , Intermittent clouds | Kigali-Rwanda

Gicumbi: Bacitse ku myumvire ‘ishaje’ y’uko kanyanga ivura mu nda

Yanditswe na Twizeyimana Fabrice

Ku ya 08-11-2019 saa 08:21:23
Abaturage b'i Kageyo bamaze gusobanukirwa ububi bwa Kanyanga

Bamwe mu baturage bo mu karere ka Gicumbi mu murenge wa Kageyo, bahamya ko nyuma y’ubukangurambaga bwakozwe n’inzego zitandukanye, ubu bamaze gusobanukirwa ko Kanyanga ari mbi ku buzima bw’umuntu, ku buryo n’abajyaga bayinywa bibwira ko barimo kwivura inzoka ubu bahinduye imyumvire bakitandukanya na yo.

Abaturage baganiriye n’Imvaho Nshya bagaragaje ko mu myaka yashize iwabo kunywa kanyanga byari nk’umuco, yemwe hari n’abari bafite imyumvire y’uko ngo ivura mu nda, ku buryo iyo bumvaga batamerewe neza bayigotomeraga.

Bemeza ko muri icyo gihe hahoraga ubusinzi bukabije, urugomo n’ibindi byaha bitandukanye bishingiye ku myitwarire idahwitse.

Kuri ubu ariko ngo imyumvire yarahindutse. Bamwe mu baturage bo mu murenge wa Kageyo baganiriye n’Imvaho Nshya bagaragaje ko ubukangurambaga butandukanye bwagiye bukorwa bwatumye basobanukirwa Kanyanga ari ikiyobyabwenge mu bindi, ndetse ibyo kuyinywa bibeshya ko bari kwivura mu nda ahubwo babaga biyangiriza ubuzima.

Uwitwa Kagemanyi Nicolas yagize ati “Kera iyo wageraga ino wasangaga ari Kanyanga gusa, abantu bakayinywa mu tubari, ahabaye umunsi mukuru ugasanga Kanyanga itapfa kuhabura, ndetse hari n’abari bafite imyumvire ishaje bavugaga ko ivura mu nda, utamerewe neza akayinywa.

Ariko ubuyobozi bwashyize imbaraga mu gusobanurira abaturage ko Kanyanga ari ikiyobyabwenge, tugenda tumenya ko yangiza ubuzima bwacu, igenda icika gake gake ku buryo kuri ubu kuyibona muri uyu murenge byakugora.”

Naho Musana Angelique we yagaragaje ko kuba begeranye n’igihugu cya Uganda aho gukora no kunywa Kanyanga bikorwa ku mugaragaro, ari imwe mu mpamvu zatumaga umubare munini w’abatuye muri aka karere barayinywaga.

Na we ahamya ko ubu Kanyanga yacitse, biturutse ku ngamba zikarishye zo kuyirwanya ubuyobozi bwashyizeho.

Umunyamabanga Nshingwabikorwa w’agateganyo w’umurenge wa Kageyo Uwera Viviane, yabwiye Imvaho Nshya ahamya ko gucika kwa Kanyaga ari umusaruro mwiza w’imbaraga nyinshi ubuyobozi bwashyize mu guca ibiyobyabwenge byose muri rusange.

Yagize ati “Ubuyobozi bwabishyizemo imbaraga, murabizi ko ibiyobyabwenge ari ikintu cyahagurukiwe kuva ku rwego rwo hejuru kugera hasi ku mudugudu, ubwo rero ni intambara turwana buri munsi kandi twigisha n’urubyiruko rwacu kuko cyane cyane ni rwo wabonaga rubyijandikamo.

Nk’abanyonzi tuba tuganira nabo kenshi tubabwira ko batagomba gutwara ibintu batazi, umuntu umuteze akabona afite umutwaro afitiye amakenga ko ashobora no kumwihorera ntamutware, ni intambara ni ukuzirwana buri munsi”.

Uwera yakomeje yishimira ko muri rusange abaturage bamaze guhindura imyumvire, bakazibukira Kanyanga yari yarabazahaje, magingo aya bakaba bafite ubuzima bwiza.

Yakomeje agira ati “Nabo bamaze kubyumva, yego bose ntibumvira ibintu kimwe ariko ntekereza ko abenshi bamaze kumva ko Kanyanga atari umuti nk’uko babivuga… Kanyanga rero twe kwishyiramo ngo ivura mu nda, ngo ivura iki…

Ni imyumvire itari yo mu by’ukuri kuko umuntu niba arwaye yarishyuye mituweri ajya kwa muganga akivuza agakira, ahubwo kanyanga yari yarabazahaje ugasanga umuntu yashaje imburagihe, ukabona ubuzima ntabwo bumeze neza, ariko ubu barabiretse bameze neza”.

Umwanditsi:

Twizeyimana Fabrice

Tanga Igitekerezo

Email yanyu ntigaragazwa ku rubuga. Amazina na Email ni ngombwa.